مي عز الدين تكشف سر غيابها وتؤكد: "أنا مش كوميديانة"

كشفت  الفنانة مي عز الدين قلبها  للجمهور وتحدثت عن محطات مهمة في مشوارها الفني، بداية من دخولها عالم التمثيل مع النجم محمد فؤاد، وحتى تجاربها الأخيرة مع الدراما الاجتماعية والملحمية.

الزراعة والسعادة

وقالت مي عز الدين خلال لقاء تلفزيوني مع الإعلامي معتز الدمرداش: "بصراحة مش قادرة أزرع أرض كاملة، دي مسؤولية كبيرة، لكن بحب أزرع شتلات صغيرة وأصاري أقدر أتحرك بيها، ومرة في أوتيل شوفت الجنايني بيزرع وماقدرتش أمسك نفسي، نزلت وشمرت إيدي وزرعت معاه نخلة صغيرة.. حسيت بسعادة رهيبة".

“الكوميديا مش لعبتي”

وتحدثت مي عن أدوارها الكوميدية: "أنا مش كوميديانة.. الكوميديا محتاجة سرعة بديهة وارتجال، ودا مش عندي، لكن اتعلمت من عمالقة زي حسن حسني، وسمير غانم إزاي أفرش للي قدامي عشان يطلع الإفيه مظبوط، ودوري إني أسلّم، مش إني أشوط".

“بوحه” ذكرى لا تُنسى

تعود مي بذاكرتها إلى البدايات: "أول بطولة كانت مع محمد فؤاد في فيلم (رحلة حب)، ودي كانت صدفة كبيرة لأنهم كانوا هيأجلوا الفيلم لحد ما يلاقوا البطلة المناسبة، والحمد لله كنت أنا. بعد كدا فيلم (بوحة) مع محمد سعد فضل علامة في مشواري، وبفتكر كواليسه بكل حب وضحك".

“عمر وسلمى”

وأضافت: "اشتغلت 3 أجزاء من (عمر وسلمى) مع تامر حسني.. ودي من أكتر التجارب اللي ضحكنا واتخانقنا فيها في نفس الوقت، وتامر مدرسة، دماغه شغالة طول الوقت وبيموت في الشغل، ودا سر نجاحه واستمراره، ولو لاقينا ورق قوي أنا جاهزة لجزء رابع".

"يسرا مدرسة.. والزعيم وقف جنبي"

عن محطاتها المهمة، علّقت: "الشغل مع يسرا علّمني إن التمثيل مش صوت ولا استعراض، لكن إحساس. يسرا خدتني على جنب وعلّمتني أتكلم بصوتي الطبيعي، وكمان الزعيم عادل إمام وقف جنبي من البداية، كرّمني وساندني واتكلم عني في برامج كتير.. ودا فضل عمري ما أنساه".

“جزيرة غمام” تجربة ملحمية

وصفت مي تجربتها في مسلسل “جزيرة غمام” قائلة: "الورق كان تحفة.. عبدالرحيم كمال كتب عمل بيوصل رسالة حقيقية، ودا نادر في الوقت دا. العمل كله كان طاقة إيجابية من أول يوم".

“قلبي ومفتاحه”

وفيما يخص أحدث أعمالها، قالت: "في (قلبي ومفتاحه) كنت خارجة من فترة صعبة بعد وفاة والدتي. كنت موجودة في الكواليس جسديًا بس مش ذهنيًا، ولكن لقيت دعم كبير من أسر ياسين، دياب، وعايدة رياض.. والأهم كان المخرج تامر محسن، اللي وقف جنبي جدًا وقتها".

"أنا ممثلة بالفطرة"

واختتمت حديثها بقولها: "دراستي لعلم الاجتماع ما فرقتش معايا في التمثيل.. اللي فرق هو الموهبة والتجربة والمشاهدة، وأنا كنت من وأنا طفلة بقلد الفوازير والأفلام وأمثل في المدرسة.. الفن كان هو الطريق الطبيعي ليا".