"الحلم لسة مكملش".. أمنية الحسيني أول مصرية تحصد فضية الجودو للمكفوفين

بين دفاتر الدراسة وعرق التدريب، كانت أمنية السيد الحسيني، الطالبة بالفرقة الرابعة بكلية الاقتصاد والعلوم السياسية بجامعة القاهرة، تحمل حقيبة كتبها بيد، وتحمل باليد الأخرى حلمها نحو الأولمبياد، وبين قاعات المحاضرات وحلبة المصارعة، صنعت قصة مختلفة لا تشبه إلا إصرارها.

لم تكن تتخيل أن خطواتها الأولى فوق بساط الجودو ستقودها يومًا لتصبح أول مصرية تحصد ميدالية فضية في بطولة الجائزة الكبرى لجودو المكفوفين، التي استضافتها مصر يوم 18 أغسطس بمدينة 6 أكتوبر، بمشاركة 237 لاعبًا ولاعبة من 27 دولة حول العالم.

تقول أمنية الحسيني في تصريحاتها لـ"تليجراف مصر": "أنا عندي 25 سنة، ودخلت الكلية عن حب، وبرضو الرياضة جزء من حلمي".

البداية مع الجودو

تروي الحسيني: "بدأت علاقتي برياضة الجودو في أواخر سنة 2022، نزلت بطولة الجمهورية وبعد كدا كانت تصفيات المنتخب فدخلتها، وربنا كرمني وانضميت للمنتخب، وبعدها دخلت 6 بطولات نزلت بطولتين، وبعد كدا ريحت فترة لكن رجعت اللعب جودو تاني".

لماذا الجودو؟

توضح الحسيني "أنا بحب الرياضة العنيفة، والجودو في نظري أكتر لعبة عنيفة بالنسبة للمكفوفين، وهي الأقوى فعلًا".

دعم وتشجيع كبير

تقول الحسيني: "أهلي كانوا أول حد دعمني، والكباتن طبعًا ليهم دور كبير، بس الأساس كان أهلي"، وتابعت: "كان في دعم نفسي كبير من المدير الفني وكباتن المنتخب والنادي كانوا بيدعموني ويشجعوني".

بين التحديات والإحباط

كأي رياضي، واجهت أمنية الحسيني لحظات صعبة من الهزيمة والإحباط، تستعيد الذكريات: "كان في لحظات يأس، خصوصًا لما كنت أخسر في ماتشات المنتخب، لكن مع الوقت بقيت واثقة في نفسي أكتر، والإحباط ما بقاش يوصلني لليأس".

شعور البطولة

عن دخولها بطولة الجائزة الكبرى، تقول الحسيني: “كنت خايفة ومتوترة، لكن الكابتن بتاع المنتخب شال عننا أي ضغط، وقالي: اعملي اللي عليكي وبس”، وأضافت: "ربنا كرمني وجبت مركز تاني، ودا مكنش حلمي، لكن أنا واثقة إن اللي جاي أفضل، والبطولة الجاية مش هتنازل عن الأول".

أصعب مباراة

توضح الحسيني: "الماتش التاني كان أصعب حاجة، هو اللي خسرت فيه، لكنه إداني دعم أكبر إني أكمل واضغط على نفسي لحد الآخر".

الحلم الأولمبي

وتابعت الحسيني: "أنا نفسي أوصل لأولمبياد 2028 في أمريكا، دا حلمي ومش هتنازل عنه،  قطعت تلت الطريق، ونفسي يكون فيه دعم أكتر من وزارة الشباب والرياضة"، وتابعت: "حاليًا تصنيفي الخامسة عالميًا، وده إنجاز كبير في أول بطولة أرجع ألعب فيها بعد سنتين توقف".

بين الدراسة والرياضة

قالت الحسيني: "أنا داخلة الكلية عن حب، وبرضه التمرين بحبه، فطبيعي هعرف اتعمق واعرف أواكب وأواظب بين الاثنين لأنهم بالنسبالي حلم، كنت بخلص الامتحان واطلع على التمرين على طول عادي جدا مكنش فيه مشكلة".

لحظة الفخر

وقالت الحسيني: "أول حد اتبلغ بالفوز بتاعي هو بابا لأن هو الوحيد اللي ما مكنش معايا من أهلي في البطولة".

وتابعت الحسيني: “لحظة التتويج كانت لحظة فخر إني أول بنت مصرية تجيب ميدالية فضية أو تحصل على ميدالية في مصر في الجودو للمكفوفين، ده بالنسبالي فخر كبير بنفسي وعزة، كان نفسي أرفع علم مصر وأرفع النشيد الوطني، وده خير من ربنا واللي جاي أفضل، وفيه بطولات جاية كتير وهعمل اللي عليا وزيادة فيها إن شاء الله".

طموح روحي وعلمي

واختتمت الحسيني: "أنا خلاص بتخرج ونفسي أطلع عمرة عشان أدعي ربنا كتير هناك أنه يكرمني في البطولات الجاية وأوصل فعلًا للأولمبياد، وكمات تفسي أعمل ماستر في الـAUC".