"Money box"يمنحك قرضا لم تطلبه ثم يبتزك: هنشر صور أهلك

حيلة جديدة للنصب الـ"أونلاين"، بطلها تطبيق إلكتروني، جديد، يحمل اسم Money box، حكى العشرات من مستخدمي موقع التواصل الاجتماعي فيسبوك عن تعرضهم للابتزاز، والتهديد بالتشهير من خلاله.

القصص المروية تكاد تكون متطابقة في تفاصيلها، فالتطبيق الذي يبدو للوهلة الأولى، وكأنه أحد تطبيقات التجارة الإلكترونية، أو “الجمعيات” الشعبية، يستقبل المستخدمين الجدد، بإشعارات تستأذنهم في السماح له بالدخول إلى سجل مكالماتهم، وقوائم الهاتف لديهم، وكذلك معرض الصور، ثم يعرض عليهم فرصة الحصول على المال، وأحيانا يضخها إلى محفظتهم البنكية، دون استئذان.

بعد أيام، تصلهم مكالمات هاتفية ورسائل واتساب متكررة تطالبهم فيها بدفع مبلغ ما، قيمة القرض الذي حصلوا عليه، مضاعفًا، بدعوى الفائدة.

بداية انتشار الأمر، كانت عبر شاب يدعى محمد أمير، كتب عبر صفحته على فيسبوك: "فيه كارثة وبدأت تنتشر في مصر .. كارثة في صورة ابتزاز ممكن يطولك انتا او اهل بيتك، خلي بالك واقرا الكلام ده كويس اوي .. اللي في الصورة ده ابلكيشن موجود على جوجل ستور اسمه زي ما مكتوب كدة “Money box” .

أبلكيشن قروض

وأضاف أمير: "الأبلكيشن ده عبارة عن أبلكيشن قروض، الفكرة العامة انه بيدي قروض صغيرة للناس من باب الفلوس السهلة يعني، هتلاقيه منتشر في الجروبات من نوع "عايز تكسب فلوس بسهولة ابعتلي خاص" والجو ده، وطبعا كلنا في عرض الجنية، فمش خسرانين حاجة، فا بكل سهولة بنروح ننزله ونتبع الخطوات اللي هيا عبارة عن رقم محفظتك ومعلومات عنك وصورة بطاقتك وصورة سيلفي ليك واربع ارقام ثقة مقربين ليك ورسالة كونفرم والحاجات دي جميل؟وبعد كدة بيعمل loading لحد ما يقولك تم التسجيل بنجاح". 

واستكمل: "وفجأة بتلاقي مبلغ نزل على محفظتك فعلا من غير ما تطلبه، اجباري، وأنت وحظك ممكن يبقا 1200 جنية مثلا، لحد ما يعدي 6 أيام بالظبط.. وهنا المصيبة بقا.. هتلاقي أرقام واتساب بتكلمك تطالبك بتسديد ضعف المبلغ كفوايد وده بعد 6 أيام بس، يعني لو ادوك 1200 جنيه هتلاقيهم بيطالبوا ب2400  جنيه، ولو رفضت، فا لما البرنامج كان بيعمل loading هما سحبوا بيانات تليفونك كلها، ارقامك وحسابك عالفيس وصورك انتا واللي يخصوك من عالموبايل، وتبدأ لهجة التهديد والشتايم بقا، هتدفع ولا ننشر صورك ونبعتها لجهات اتصالك".

ابتزاز إلكتروني

وتابع: "لو عملت بلوك للرقم هتلاقي رقم تاني بيبعتلك، رقم تاني وتالت ورابع وأرقام بتتصل بيك هدفها تخوفك وتشوه سمعتك، ونفس اللهجة والشتايم والأبتزاز، وهتلاقي صورك اتركبت على صور عريانة وبيبتزك بأرقام وحسابات اقرب الناس ليك، وأرقام أغلبها برة مصر يعني مش مرخصة ومفيش جهة قانونية تعرف تطاردهم، طيب لو سددت؟ هتلاقي باقي الأرقام بتهددك بردو كأنك مسددتش حاجة، وظيفتهم كلها أنهم يسحبوا منك أكبر مبلغ ممكن، ولو سددت هينزلك قرض تاني بمبلغ أعلى إجباري، وبعد كام يوم هتلاقي نفس الابتزاز على ضعف الرقم اللي سلفوهولك بالغصب، دايرة مبتنتهيش".

الرسائل المزعجة

وبالتواصل مع الأرقام التي نشرها رواد موقع “فيسبوك”، فلم يتم التجاوب معها، ومسجلة على أبلكيشن “تروكولر” للكشف عن الأرقام الغريبة، أن تلك المكالمات مصنفة ضمن الـ Spam والرسائل المزعجة نهائيا.

وتواصل تليجراف مصر، مع أحد المتضريين من الأبلكيشن، وهو طالب جامعي يدعى "عبدالرحمن أسامة"، مؤكدًا أنه تعرض للنصب بسبب أبلكيشن "Money box"، مما استدعى الأمر في النهاية إلى غلق المحفظة الإلكترونية الخاصة به وتحرير محضر في مباحث الأموال العامة ومباحث الإنترنت.

المحفظة الإلكترونية

وأضاف، أن بداية القصة كانت أثناء تصفحه موقع "فيسبوك"، لتقوده الصدفة إلى اكتشاف الأبلكيشن فعمل على تحميله عبر الهاتف الخاص به في اعتقاد منه أن هذا التطبيق مثل التطبيقات المالية ومنها فاليو والبطاقات المدفوعة إلكترونيا، مشيرًا إلى أنه فور الدخول على الأبلكيشن وتجربته طلب منه وضع رقم البطاقة الخاصة به ورقم المحفظة الإلكترونية.
 

"تلقيت رسالة بتحويل مبلغ مالي"، هكذا أكمل الشاب حديثه، مؤكدًا أن من ضمن الخطوات التي يطلبها الأبليكشن هو وضع 4 أرقام لأشخاص من الأقارب وبعد أسبوع من تلقي المبلغ تبدأ الاتصالات من قبل أرقام خارجية وليست مصرية للمطالبة بضعف المبلغ الذي تم تحويله، وعليه بدأ البحث عن ما يخص هذا الأبلكيشن ليتفاجيء بشكاوى كثيرة من رواد السوشيال ميديا.

مباحث الإنترنت

وأشار إلى أنه قرر حينها أن يتم توقف المحفظة الإلكترونية الخاصة به حتى لا يستقبل أي أموال أخرى، وحرر محضرًا في مباحث الأموال العامة ومباحث الإنترنت حتى لا يتم ابتزازه كما اشتكى عدد من الأشخاص الذين تواصل معهم عبر "فيسبوك".