أحمد حسن يرد على شوبير: "كفاية فتن وخليك في شغلك"

دخل الثنائي نجم منتخب مصر السابق وعميد لاعبي العالم، أحمد حسن، والإعلامي أحمد شوبير، في سجال علني بعد تصريحات متبادلة بينهما.

بداية الأزمة

شوبير علّق عبر قناة الأهلي على فيديو متداول يجمع أحمد حسن وعصام الحضري، قائلاً: “مفيش داعي حد يطلع يقول كلمة ويغلس فيها على حسام حسن، هخدها يا سيدي هزار لكن مش وقته، خلوها بعد التوقف الدولي”.

وأضاف: “لكن مش علشان كان نفسك تبقى معاه في الجهاز أو تبقى مدير عليه في المنتخب ومحصلش، نعمل كده! هل ده مقبول؟”.

وأضاف: “يا جماعة خلونا نركز.. الحاجات الصغيرة دي مش عايزينها، وحبوا بعض شوية”.

ورد نجم منتخب مصر السابق وعميد لاعبي العالم، أحمد حسن، على تصريحات الإعلامي أحمد شوبير.

لو حابب تتطوع بنصيحة فأكيد رقم تليفوني معاك

وحرص أحمد حسن على الرد على تصريحات أحمد شوبير، حيث كتب عبر حسابه الرسمي على "فيسبوك"، قائلاً: “الكابتن شوبير طالع يدينا نصيحة على الهواء، وردي هيكون هنا على الهواء”

وكتب حسن عبر حسابه على “فيسبوك”: “لو حابب تتطوع بنصيحة فأكيد رقم تليفوني معاك وكمان أرقام السادة المحترمين في اتحاد الكرة المصري، ولو كانت النصيحة صادقة ولوجه الله أكيد نتقبلها ونشكرك كمان، لكن طالما الكلام على الهواء فالرد هيكون على شوبير هنا على الهواء”.

وأكد قائد المنتخب الوطني الأسبق أنه يعمل مديرًا لمنتخب مصر المشارك في البطولة العربية "بتكليف رسمي ومتطوعًا دون أجر"، مشيرًا إلى أن ذلك يأتي "محاولة لرد جزء للمكان الذي صنع اسمه وتاريخه".

فاهمين دفعاك بقوة وليه اعتراضك بالشكل ده

وتابع: “بالنسبة لقصة الهزار بيني وبين عصام الحضري فده أمر معتاد من سنين والجميع يراه، ولم نرك يا كابتن يا كبير يومًا تنصح أو تعترض، لكن طبعًا كلنا فاهمين دفعاك بقوة وليه اعتراضك بالشكل ده”.

الموضوع مش مستحمل فتن وخناقات جديدة

ووجه أحمد حسن رسالة مباشرة لشوبير قائلًا: "اهدأ شوية، ونصيحتي ليك ركز في شغلك بس، ووفر نصايحك لحاجة تانية، علشان الموضوع مش مستحمل فتن وخناقات جديدة، وكفاية اللي بنشوفه كل يوم".