أحمد السعدني: "مابحبش الشهرة.. والتمثيل مكنش في نيتي"

كشف الفنان أحمد السعدني جانبًا من تفاصيل حياته الشخصية وعلاقته بوالده الفنان الراحل صلاح السعدني، متحدثًا عن ذكريات مؤلمة عاشها منذ طفولته، وأصعب لحظاته مع وفاة طليقته وأم أولاده.

"مابحبش الشهرة.. والتمثيل مكنش في نيتي"

قال السعدني، خلال لقائه مع الإعلامي أنس بوخش في برنامج "Abtalks": "من وأنا صغير ماكنتش بحب الشهرة، لأن الناس كانت بتتلم حوالينا عشان والدي، وكانوا بينادوني وأنا بلعب في الشارع أو المدرسة (ابن الممثل)، وخايف أولادي يحسوا بنفس الإحساس".

وأضاف: "أهم نصيحة قالهالي والدي لما قولتله عايز أمثل: (صدق اللي بتعمله.. الناس هتصدقك)، وأنا أصلاً دخولي التمثيل مكنش في نيتي".

أولى الصدمات

واسترجع السعدني أولى صدماته: "بكره عيد ميلادي بسبب موقف حصلي وأنا عندي 8 سنين، عملت حفلة وعزمت صحابي من المدرسة، وماجاش غير 2 بس.. نزلت الشارع أستناهم ومفيش حد جه في الآخر".

وتابع: "وأنا عندي 16 سنة حبيت بنت جدًا، ومعرفتش أتجاوز التجربة دي، فروحت لدكتور نفسي. يمكن التجربة دي خلتني أتعلم من بدري إن طلب المساعدة من حد متخصص مش عيب".

طليقته أمل.. ورسالة لأولاده

وعن طليقته وأم أولاده، أمل، قال: "أنا طبعي من صغري مبحبش أشيل مسئولية. أمل كان فيها مميزات كتير، وعيوب برضه، بس وأنا صغير مكنتش قادر أتحملها أو أستوعبها. دلوقتي اكتشفت إنها عيوب بسيطة جدًا ممكن أتقبلها. ولو هوجه لها رسالة هقولها: اتطمني على العيال.. هما كويسين".

الزواج مرة أخرى

وعن فكرة الزواج مجددًا، قال السعدني: "الزواج والطلاق والإنجاب مش قرار الإنسان لوحده.. مش محتاج حسابات مسبقة، أنا سايب نفسي زي اللي راكب على موجة بالبورد.. اللي يحصل يحصل".