ضربتان بعصا بيسبول.. ماذا قال ضحية "طفل المرور" أمام جهات التحقيق؟

كشفت التحقيقات في القضية المعروفة إعلاميًا بـ"طفل المرور"، والمتهم فيها أحمد أبو المجد (18 عامًا) وآخرون، عن وقائع تعدٍ تعرض لها الشاب “يوسف خالد” أمام إحدى المدارس بمنطقة المقطم.

اعترافات ضحية "طفل المرور" أمام النيابة

وحصلت "تليجراف مصر" على نص التحقيقات، حيث سرد خلالها المجني عليه "يوسف خالد" البالغ من العمر (15 سنة) تفاصيل الواقعة كاملة أمام جهات التحقيق كالتالي:

س: ماهي تفصيلات حدوث إصابتك؟

ج: اللي حصل إن أنا كنت نازل من البيت بتاعي وكنت متفق مع صحابی محمود تامر ونصر محمد نروح المدرسة بتاعتنا عشان نمتحن أول امتحان وبعدين لقيت عربية مرسيدس وقفت قدام البيت بتاعي بالضبط.

“أنا مكنتش أعرف فيهم حد غير توني أخو روزاليندا ولقيت واحد منهم ماسك في إيده عصا خشبية وبعد كده لقيته مرة واحدة قرب مني وضربني ضربة واحدة في جنبي الشمال وأنا حاولت أبعده عني، وبعد كده لقيته لف بجسمه وضربني على رأسي ضربة واحدة ناحية اليمين وبعد كده وقعت على الأرض ومش فاكر إيه اللى حصل لحد ما فقت في المستشفى وهو ده كل اللي حصل”.

 س: متى وأين حدث ذلك؟

ج: الكلام ده يوم 2025/5/21 الساعة 7:55 صباحًا أمام بيتى في قطعة 7896 الدور الأرضي شقة 2 شارع الصفا الهضبة العليا.

س: ما سبب ومناسبة تواجدك بالمكان والزمان سالفي الذكر؟

ج: أنا كنت نازل من البيت بتاعتي وكنت رايح المدرسة عشان عندي امتحان.

س: من كان برفقتك آنذاك؟

ج: كان معايا محمود ونصر.

س: ما هي الحالة التي أبصرت عليها المتهمين لأول وهلة؟

ج: لقيت عربية مرسيدس وقفت ولقيت توني ومعاه اثنين كمان معرفهمش نزلوا من العربية وتوني شاور براسه ناحية محمود وقال للى معاه هو (…) ده.

س: ما هي الأفعال المادية التي قام بها المتهمون تحديدًا؟

ج: لقيت توني جري ناحية نصر وبدأ يتعدى عليه بالضرب وأنا لقيت التاني اللي كان ماسك العصا الخشبية جه عليا، وضربني ضربة على جنبي الشمال لف وضربني على رأسي من ناحية اليمين وبعد كده أنا وقعت على الأرض.

س: ما دور كل من المتهمين تحديدًا ؟

ج: هو توني جري ناحية نصر وبدأ يتعدى عليه بالضرب وأنا لقيت التاني اللى كان ماسك العصا الخشبية جه عليا، وضربني ضربة على جنبي الشمال، ولف وضربني على رأسي من ناحية اليمين وبعد كده أنا وقعت على الأرض والثالث اللي كان سايق العربية مركزتش وقتها إذا كان عمل حاجة ولا لأ.

س: وما التصرف الذي بدر منك آنذاك؟

ج: حاولت أدافع عن نفسي بس الموضوع كان مفاجئًا خصوصًا لما ضربني بالعصاية على دماغي وأنا وقعت على الأرض وما فقتش غير وأنا في المستشفى.

س: ما هو سبب نشوب تلك المشاجرة تحديدًا؟

ج: أنا مش عارف إيه السبب تحديدًا بس أنا كنت موجود قبل الواقعة دي بيوم وكنت قاعد مع واحد صاحبي وإحنا خارجين لقيت توني ومحمود بيتخانقوا مع بعض وتوني حاول إنه يضرب محمود في رجليه، ومحمود كان بيحاول يدافع عن نفسه ولما سالت إيه سبب إنهم يعملوا كده مع بعض فيه ناس قالت لي إن فيه حد كان بيحاول يضايق أخت توني وهو افتكر أن محمود هو اللي عمل كده.

س: هل يوجد بك ثمة إصابات؟

ج: أيوة.

س: ما هي الإصابات اللي لحقت بك تحديدًا؟

ج: الضربة اللي جت في جنبي أنا الحمد لله كويس، أنا مش حاسس بألم فيها والضربة بتاعة رأسي مخلیاني معنديش اتزان كامل هي عملت لي جرح فوق وداني اليمين واضطررت إني أخيطها.

س: من محدث تلك الإصابات تحديدًا؟

ج: اللي عمل كده هو اللى كان واقف مع توني لما كانوا جايين بالعربية وكان ماسك في إيديه عصا خشبية (عصا بيسبول) وكان واقف وش لوش وبعد كده لف وضربني الضربة اللي جت على دماغي.

س: ما هي وجهتك بالنسبة المتهم أحمد أبو المجد حال ارتكابه الواقعة؟

ج: كان وش لوش.

س: وبأي أداة أحدثها؟

ج: ضربني بالعصا الخشبية (عصا بيسبول) وهو اسمه أحمد أبو المجد وأنا عرفت اسمه لما لقيت بابا بيزورني في المستشفى ولقى حد من طرف توني وبيقول له إحنا بنعتذر لك فبابا قال له أنا عاوز أعرف مين اللي كان ماسك العصا.
 

س: وبأي يد كان المتهم ممسكًا الأداة؟

ج: هو كان ماسكها بكلتا يديه.

س: من أين تحصل المتهم على تلك الأداة؟

ج: معرفش هو جابها منين بس لما وقفوا بالعربية قدام بيتي لقيت أحمد نازل وماسكها في إيديه.

س : كم عدد الضربات التي كالها لك المتهم تحديدًا؟

ج: هما ضربتان؛ واحدة جات في جنبي الشمال وواحدة على رأسي من ناحية اليمين.

س: ما المسافة بينك وبين المتهم حال ارتكابه واقعة التعدي؟

ج: المسافة كانت حوالي أقل من نصف متر في الضربتين.

س: أين استقرت تلك الضربات تحديدًا؟

ج: واحدة في جنبي من ناحية الشمال والتانية في رأسي من ناحية اليمين.

س: هل بدر منك ثمة مقاومة جراء ذلك التعدي؟

ج: أيوة حاولت أزقه لما ضربني في جنبي الشمال إنما الضربة التانية أنا مقدرتش أدافع عن نفسى لأنها كانت مفاجئة.

س: هل كان بإمكان المتهم متابعة التعدي عليك؟

ج: مقدرش أحدد هو كان يقدر يضربني تاني ولا لأ بس لما أنا وقعت على الأرض أكيد هو خاف وجري.

س: ما قولك فيما جاء بمحضر جمع الاستدلالات من أقوال؟

ج: اللي حصل أنا قلت عليه.

س: ما قولك فيما جاء بأقوال المجني عليهم بتحقيقات النيابة العامة؟

ج: اللي حصل أنا قلت عليه.

س: ما قولك فيما جاء بتحريات وحدة البحث الجنائي بقسم شرطة المقطم والمحررة بمعرفة النقيب طارق ممدوح؟

ج: اللي حصل أنا قلت عليه.

س: ما قولك فيما جاء بأقوال مجري التحريات بتحقيقات النيابة العامة؟

ج: اللي حصل أنا قلت عليه.

س: ما قولك فيما جاء بأقوال شهود الواقعة بتحقيقات النيابة العامة؟

ج: اللي حصل أنا قلت عليه.

س: ما قولك فيما جاء بأقوال المتهمين بتحقيقات النيابة العامة؟

ج: هو ده اللي حصل وده بيأكد صحة أقوالي.

س: ما قولك في الثابت بمحضر جمع الاستدلالات المؤرخ في 2025/5/21 في تمام الساعة 1 مساءً والثابت به قيامك باتهام توني شریف واثنین غیر معلومين لك بسرقة مبلغ مالي قدره 8 آلاف جنيه وهاتف محمول ماركة أوبو A5 برو؟

ج: بخصوص موضوع السرقة أنا بعدل عن اتهامي لتوني وأحمد والولد التاني اللى كان معاهم وإن الحاجة دي ممكن تكون فقدت مني أثناء نقلي للمستشفى وأنا مش بتهمهم بالسرقة.

س: هل يوجد ثمة علاقة أو خلافات فيما بينك وبين المتهمين؟

ج: لا أنا مفيش بيني وبينهم أي خلافات ولا سابق معرفة قبل كده بس روزاليندا اللى معايا في المدرسة كان فيه أخ ليها بيجي ياخدها من المدرسة والدروس.

س: ما قصد المتهم من ارتكابه الواقعة؟

ج: هو قصده يضربني.

س: هل لديك أقوال أخرى ؟

ج: لا.

• لمعرفة قوال الطرف الآخر المتهم أحمد أبو المجد والمعروف إعلاميًا بـ"طفل المرور" اضغط هنــــــــــــــــــــــا.