"الممثل والمعجبة".. شريف إدريس يكشف مفاجأة من كواليس "بودي جارد"

علق الفنان شريف إدريس، على الشائعة المتداولة عن طرد الزعيم عادل إمام لأحد الفنانين المشاركين في مسرحية “بودي جارد" (إنتاج 1999).

وكتب شريف إدريس، عبر حسابه الرسمي بمنصة “فيسبوك”: “فيه ممثل زميل كبير سنًا بقاله فترة طويلة جدًا كل ما يطلع في لقاء يقول إن الأستاذ عادل إمام مشاه من مسرحية بودي جارد علشان كان بيضحك أكتر منه، طيب لأول مرة هحكي الواقعة اللي حضرها ناس كتير عايشين معانا في الدنيا”.

وأضاف: "في واحدة من ليالي العرض الجميلة الأستاذ الزميل الممثل كتب رقمه في ورقة وحدفه لواحدة معجبة في الصالة أثناء تحية العرض، شافه حد من بتوع أمن المسرح وراح بلغ الأستاذ عادل إمام".

وتابع: "تاني يوم كان أستاذ عادل قبل العرض بيقعد يوميًا في الأوضة اللي بقعد فيها أنا وزمايلي الممثلين.. بنقعد ندردش شوية قبل العرض، وفجأة الزميل دخل من باب المسرح ومعاه واحدة غريبة وفي حالة لا يرثي لها هما الاتنين، فالأستاذ عادل نده مساعده وقاله مين دي وعرف إنها نفس الشخصية اللي اتحدف لها الرقم فبعت جابه وقام معاه بالواجب، وطبعًا أستاذ عادل أخد موقف في لحظتها ودي كانت آخر ليلة عرض لهذا الزميل الممثل في مسرحية بودي جارد".

واختتم: "أنا أول مرة أحكي الواقعة بس حقيقي الوضع بقى مستفز ويا ريت الأستاذ الزميل الممثل يحترم سنه وعيب إنه يطلع يكذب على الناس، عيب بجد ويا ريت لو سمحتم لو أي حد يعرف اسمه بلاش يذكره في التعليقات نهائي".

شريف إدريس

ويقدم شريف إدريس بودكاست بعنوان “مع شريف إدريس” برعاية "تليجراف مصر"، واستضاف عددًا كبيرًا من أبرز الفنانين منهم أحمد وفيق، وأحمد مجدي، ومحمد علي رزق، وغيرهم.