رضا حامد يرد على شريف إدريس: بيشوه سمعتي وتاريخي البسيط

أثار الفنان شريف إدريس، جدلًا واسعًا في الوسط الفني، بعد حديثه عن سبب طرد الفنان رضا حامد من مسرحية "بودي جارد" للزعيم عادل إمام.

وأكد شريف، في منشوره عبر "فيسبوك"، أن زعيم الكوميديا قرر طرد رضا حامد من المسرحية بسبب اصطحابه لفتاة في الكواليس وليس بسبب تفاعل الجمهور معه أكثر من عادل إمام.

ووجه رضا حامد رسالة لـ شريف إدريس بعد منشوره الأخير، قائلًا: "عايز يتشهر، ولا أعرفه ولا اسمه ولا شكله، وده يمكن كان جاي يعمل دور مساعد، وجه يوم أو اتنين، الله أعلم إذا كان جه ولا لأ، وأنا معروف عني في الشارع المصري إني فنان محترم، والناس بتقولي انت فنان محترم، ميحاولش يشوه سمعتي وتاريخي البسيط، بشوية كلام معرفش مين اللي زقه",

وتابع: "هو إنسان مأجور، وأنا عمري ما أعمل كده، ولو كان حصل كده من ساعتها كان عمل ضجة في المسرح، والدنيا اتقلبت، والخلاف كان شخصي بيني وبين الأستاذ وخلص ساعتها، وهو هرم كبير".

وأشار رضا إلى أنه لم يتعاون مع الزعيم عادل إمام في عمل فني بعد المسرحية، وأن تصوير فيلم "أمير الظلام"، كان في وقت عرض المسرحية.

منشور شريف إدريس

وكشف شريف إدريس كواليس مسرحية "بودي جارد"، خلال منشور عبر حسابه الرسمي بـ “فيس بوك”، قائلًا: "فيه ممثل زميل كبير سنًا.. بقاله فترة طويلة جدًا كل ما يطلع في لقاء يقول إن الأستاذ عادل إمام مشاه من مسرحية بودي جارد علشان كان بيضحك أكتر منه، طيب لأول مرة هحكي الواقعة اللي حضرها ناس كتير عايشين معانا في الدنيا".

وتابع: "في واحدة من ليالي العرض الجميلة الزميل الممثل كتب رقمه في ورقة وحدفها لواحدة معجبة في الصالة خلال تحية العرض، شافه حد من بتوع أمن المسرح وراح بلغ الأستاذ عادل إمام، تاني يوم كان أستاذ عادل قبل العرض بيقعد يوميًا في الأوضة اللي بقعد فيها أنا وزمايلي الممثلين بنقعد ندردش شوية قبل العرض، فجأة الزميل دخل من باب المسرح ومعاه واحدة غريبة وفي حالة لا يرثى لها هما الاثنين، فالأستاذ عادل قال لمساعده مين دي وعرف إنها نفس الشخصية اللي حدفلها الرقم فبعت جابه وقام معاه بالواجب".

واختتم: "وطبعا أستاذ عادل أخد موقف في لحظتها ودي كانت آخر ليلة عرض لهذا الزميل الممثل في مسرحية بودي جارد، أنا أول مرة أحكي الواقعة بس حقيقي الوضع بقى مستفز وياريت الزميل الممثل يحترم سنه وعيب إنه يطلع يكذب على الناس".