12 سنة من المطاردة والتشهير.. أسرة دمياطية تستغيث من ابتزاز ابن العم

لم تكن تدري أسرة بسيطة من دمياط أن رفضها ارتباطًا عائليًا قبل سنوات سيقودها إلى رحلة طويلة من المعاناة والابتزاز الإلكتروني، استمرت على حد قولهم لأكثر من 12 عامًا كاملة، خلال هذه السنوات، تحولت حياتهم إلى سلسلة من المضايقات والتشهير عبر رسائل وصفحات وهمية، لتجد الأم وبناتها الخمس أنفسهن عالقات داخل دائرة مغلقة من الخوف والقلق، على الرغم من عشرات البلاغات التي تقدمن بها للجهات المختصة.

بداية القصة

تروي ياسمين الجيوشي، إحدى بنات الأسرة، في تصريحاتها لـ"تليجراف مصر": "إحنا من دمياط وبقالنا 12 سنة كاملة بنتعرض لابتزاز إلكتروني من قريبنا.. ابن عمنا، راجل عنده 55 سنة ومتجوز وعنده 3 أولاد".

واصلت الجيوشي: "القصة كلها بدأت من يوم ما اتقدم لأختي منال، ورفضناه، من ساعتها وهو بدأ حرب ابتزاز وتشويه سمعة ضدنا كلنا، بابانا الله يرحمه متوفى بقاله 10 سنين، وإحنا 5 بنات مع والدتنا، وكلنا بنتعرض للابتزاز من الراجل ده.

من الخطوط للصفحات

تابعت الجيوشي: "في الأول، أيام ما كانت خطوط الموبايل بتتباع بـ10 جنيه، كان بيشتري خطوط ويبعت رسائل للناس يشهر بينا، كمان سرق موبايل بابا وخد منه أرقام قرايبنا وأصحابه وكل اللي يعرفنا، وبدأ يبعتلهم رسايل يسيء فيها لسمعة أختي ويتكلم عننا وعن بابا بكلام مسيء".

واصلت الجيوشي: “بعد ما بقى شراء الخطوط بالبطاقة، بدأ يعمل صفحات وهمية على الفيسبوك ويشهر بينا هناك، كل شوية يفتح صفحة جديدة وينزل صور أختي ويحط رقم تليفونها، وتلاقي الساعة 3 الفجر التليفون بيرن وتسمع أصعب الألفاظ”.

اتهامات باطلة

وأضافت الجيوشي: "لما بينشر أرقامنا بيقول إننا بنشتغل في أعمال منافية للآداب، وبابا الله يرحمه بعد ما مات مسلمش منه، دا غير إنه صور شقة أختي في القاهرة، وصور عيالها وهما رايحين المدرسة، ونزل الصور على النت".

وأكدت الجيوشي: “إحنا متأكدين مليون في المية إنه هو ورا كل ده، بس مش معانا دليل رسمي ضده، هو عارف في القوانين وعارف الثغرات اللي ممكن يستعملها ومحدش يمسك عليه دليل”.

وتابعت الجيوشي: "عايش حياته للأذى، بني آدم فاضي من غير شغل ولا مسؤولية، حتى الناس اللي كان بيشتغل معاهم قالوله يقعد في البيت وهما هيبعتوله مرتبه عشان يبعدوه عنهم، لأنه مؤذي، وإحنا صراحة بنتكسف نقول إنه ابن عمنا، لأن عيلتنا كلها محترمة وطيبة، وهو الوحيد اللي مسبب لنا العار".

قدمنا بلاغات بدون نتيجة

وأوضحت الجيوشي أن الأسرة لجأت لكل الطرق القانونية: "وزارة الداخلية عاملة شغل ممتاز جدًا الفترة الأخيرة وقدرت تمسك ناس كتير في قضايا ابتزاز وجرائم مشابهة"، وتابعت: “روحنا مباحث الإنترنت، عملنا بلاغات، وأختي منال عملت كل المطلوب منها، وفي الآخر الرد: لم يستدل على الفاعل، وفي مرة اتهمته اتهام مباشر، راح رافع قضية ضد أختي واتهمها إنها شهرت بيه، ولولا تدخل ولاد عمنا كانت اتحبست”.

وقالت الجيوشي: “هو هدفه الوحيد إنه يتجوزها يوم واحد، وقالها صراحة: “أنا لو اتجوزتها يوم واحد هبطل اللي بعمله”، وأردفت: ”ده يرضي مين؟ إحنا نعمل إيه بعد ما الطرق القانونية ما جابتش نتيجة؟ بقينا بنتمنى إنه يموت عشان نرتاح، مين هيجيب لنا حقنا؟ إحنا عايزين حل.. عايزين الدولة تجيب حقنا".

تشهير ما بيخلصش

واستطردت الجيوشي: "كل ما حد فينا ينجح في شغله أو دراسته، يتجدد الهجوم، أختي جابت تقدير حلو في الجامعة، تاني يوم نلاقيه كاتب عنها كلام وحش على الفيس، إحنا مش بتوع مشاكل، أنا ومنال صحفيين، أختنا التالتة شغالة في شركة أمريكية، وواحدة في شركات خاصة، إحنا عايشين عشان نكافح ونبني مستقبلنا، بس هو عايش بس عشان يأذينا".

وأضافت الجيوشي: "بيتصل بأزواجنا ويقولهم إننا بنعمل الفواحش في غيابهم، اتصل بجوزي وجوز أختي أكتر من مرة، وعايز يخرب بيوتنا".

استغاثة برئيس الجمهورية

واختتمت الجيوشي: "جربنا كل الطرق ولجأنا لكل الوزارات وموصلناش لحاجة، ومبقاش قدامنا غير إننا نناشد رئيس الجمهورية بنفسه: يا ريس، إحنا ست ستات، أمي وخمس بنات، بقالنا 12 سنة بنتعرض للابتزاز والتشهير، وسمعتنا بتتشوه كل يوم، اعتبرنا زي بناتك واتدخل لحل الموضوع".