أرملة الإبراشي تكشف كواليس معركة الميراث: تجاوزت حدود المال

فتحت سحر محمود، أرملة الإعلامي الراحل وائل الإبراشي، قلبها لـ"تليجراف مصر" كاشفة عن تفاصيل ما وصفتها بـ"المعركة المؤلمة" حول ميراث زوجها، التي خاضتها ابنتها جيلان في مواجهة عمتها. 

تحدثت سحر محمود بمرارة للكاتب الصحفي سامي عبدالراضي رئيس تحرير "تليجراف مصر" عن مواقف صعبة عاشها بيت الإعلامي الراحل، مؤكدة أن القضية تجاوزت حدود المال لتصل إلى صلة الرحم، ومعاملة اليتيم، وروح المودة التي غابت وسط النزاع.

“كل شوية يجيلنا محضر”

قالت سحر: “تخيل إن بيت وائل الإبراشي كل شوية يجيله محضر، وحصلت مواقف بحمد ربنا إن البنت مكانتش في البيت، بعتذر مش هقدر أحكي عنها عشان تفاصيلها سيئة جدًا”.

"بقدر  أتصرف ومش بخاف"

وتابعت سحر: “بعتوا ناس للبيت، وكأني بخاف مثلًا، لا دا شيء قانوني وتقدر تروح المحكمة تدي لك تصريح وتروح الشركة تديلك العقد”، وأضافت: “الحمد لله أنا بقدر أتصرف ومش بخاف، وانا ما بتسندش على حد غير ربنا لوحده".

وواصلت سحر حديثها: "مينفعش إن بيت وائل الإبراشي يجيله اتنين رجالة.. مش حلوة، حمدت ربنا إن البنت في اليوم دا مكانتش موجودة، تخيل لو كانت موجودة. 

"الدنيا أبسط من اننا نتنازع"

قالت سحر: “يا جماعة والله الدنيا أبسط من كدا وأسهل، مش محتاجة إننا نتنازع، اللي جاله حاجة.. ألف حمد وشكر ليك يا رب، اللي خصص لبنته حاجة.. كويس، دا أخويا مقصرش معانا وكان ساتر بيوتنا، مش تيجي تحاولي تزعزعي بيت أخوكي.. مينفعش”.

"استفدتي إيه بعد كل دا؟"

وتابعت سحر: “وفي النهاية.. إيه الاستفادة بعد سنين حروب ومحاولات ولعب وكلام؟ استفدتي إيه؟ هل طبقتي شرع ربنا؟ لا اسمحي لي حضرتك لم تطبقي شرع ربنا.. لأن الشرع مش في الفلوس بس، شرع الله في صلة الرحم، في مراعاة اليتيم"، وأضافت: ”في الآية الكريمة بيقول: فأما اليتيم فلا تقهر، فدا شرع ربنا اللي الناس بتتكلم فيه كتير، خففوا من حدة العصبية شوية لأن شرع الله مش في الفلوس بس، شرع الله في المودة والرحمة والطبطبة".

وأضافت سحر: “لما ربنا قال إن الناس تورث، هو بيلزمهم إنهم يصرفوا جزء من أموالهم على الأطفال اليتيمة، إنت مش بتاخد وتجري، ربنا ألزمك إنك في أعياد تود عيال أخوك، في رمضان أو أي مناسبة، خد من الفلوس اللي أخدتها من الأب وراعي بيها، وحتى لو وديت من غير حاجة خالص، حتى لو شوكولاتة، أو سؤال: يا حبيبتي عاملة إيه؟”

مأساة أول رمضان بعد الرحيل

وقالت سحر: "أول رمضان يعدي من غير وائل كان يوم صعب بطريقة نفسية مش عايزة أقول كان عامل إزاي، ارفعي سماعة التليفون وقولي لبنت أخوكي كل سنة وانتي طيبة، تعالي افطري معانا ونبقى اتلمينا عيلة، تعالي قولي أنا جاية أفطر معاكم بمناسبة رمضان، وإحنا نعمل لك أحلى حاجة في الحياة تكريمًا ليكي ولزيارتك، ونقول لك بيتنا زاد بركة ونور.. كسبتي إيه؟ في النهاية ولا شيء غير القطيعة والحساسيات اللي مش هيصلحها حاجة".