نجم البانتوميم أحمد نبيل يتذكر: هددت بالقفز من الدور الثامن في روسيا

كشف نجم فن البانتوميم المصري، أحمد نبيل، كواليس سفره إلى روسيا لدراسة البانتوميم، كما تحدث عن تفاصيل المكالمة التي جمعته بالسفير المصري في موسكو.

وقال أحمد نبيل، خلال لقائه مع سامي عبد الراضي، رئيس تحرير موقع “تليجراف مصر”: "كنت بعمل حاجات صامتة للأطفال، ومن سنة 1962 قاعد أعمل تمرينات إلى سنة 1972 جاتلي منحة للاتحاد السوفيتي، وجت بالغلط لوزارة الثقافة، ورجعوا المنحة قالوا مفيش حد بيعمل فن البانتوميم دا، ولا حد افتكرني".

البانتوميم بالتمرينات

وتابع: "قبلها كنت عامل حفلة وحضرها السفير الروسي، وقالهم إزاي محدش بيعمل البانتوميم، قالهم لأ دا كان في حد وأنا شوفته، وأنا في وقتها كنت بمنظمة الشباب في الزمالك، قالهم حفلة المنظمة، وعرفوا عنواني، وكان فاضل أسبوع على السفر، وأيامها كنت خايف من روسيا بسبب الشيوعية، وطلعوا باسبور مخصوص ليا، وسافرت، وأنا كنت متعلم البانتوميم بالتمرينات، وقولت للمدرب أنا عامل لبس وميك آب وشريط، وعملت فقرة قدام اللجنة، وسقفولي جامد".

"هترجع مصر"

واستكمل: "وعرفت النتيجة في الأوتيل، والمترجم قال لي انت هترجع مصر، قولتله أنا حياتي كلها مستني اللحظة ديه، واللجنة قالت لما تتعلم مش هتبقى كدا دا أنت أعلى من اللي هنعلمهولك، طلعت أوضتي وكلمت السفارة المصرية، وقابلوني علشان محدش يخليني شيوعي، قفلت على نفسي في أوضتي وكلمتهم، وقلت لهم أنا في الدور الثامن".

"هرمي نفسي من الشباك"

واختتم: "خلال 24 ساعة إذا هيرجعوني هرمي نفسي من الشباك، ولا هاكل ولا هشرب، والسفير قال هيكلمهم، ومكنتش بفتح الباب ولا باكل ولا بشرب، والسفير كلمني بنفسه، قال لي هتقعد، كنت هتفضحنا، ومش هتتعلم البانتوميم، وروحت أتعلمت كل ما يخص فن البانتوميم، وكان فيه مهرجان بموسكو، وطلعت الثالث على 42 دولة، وأدوني جائزة".