وفاة غامضة لشقيقين ببني سويف في أقل من 48 ساعة.. والأم والأخت بالرعاية

في واقعة مأساوية هزت قرية السعادنة التابعة لمحافظة بني سويف، رحل شقيقان عن الحياة في أقل من 48 ساعة، لتسود حالة من الصدمة والحزن بين الأهالي، بينما ما يزال السبب الحقيقي للوفاة محل غموض حتى الآن.

تفاصيل القصة

وقال وائل صلاح، أحد جيران الأسرة، في تصريحات لـ"تليجراف مصر": “إحنا هنا في البلد مصدومين، الاتنين راحوا ورا بعض في مأساة غامضة في أقل من 48 ساعة ومحدش عارف إيه السبب".

تفاصيل الوفاة

وأضاف الجار: "مروان محمد عبد الصمد عنده 11 سنة، طالب بالمرحلة الابتدائية، توفي مساء يوم الخميس، وتم تشييع جنازته عقب صلاة الجمعة، ولم تمر ساعات طويلة حتى لحق به شقيقه الأكبر إسلام، في العشرينات من عمره وخريج دبلوم فني، الذي وافته المنية مساء الجمعة، وشيّعت جنازته عصر السبت".

أعراض المرض

وواصل: "مروان الصغير جاله سخونية شديدة مع ترجيع، دخلوا بيه الرعاية لكنه ماكملش 24 ساعة وتوفي، وبعده إسلام الكبير جاتله نفس الأعراض بالظبط.. سخونية وترجيع، ودخل الرعاية هو كمان، وماعداش يوم واتوفى".

الأم والشقيقة بالمستشفى

وأضاف: "الناس كلها بتقول إن السبب تسمم غذائي، خصوصًا إن الأم وأختهُم دلوقتي محجوزين في المستشفى وتحت العلاج، بس لحد دلوقتي مفيش حد عارف السبب الحقيقي بشكل أكيد".

واختتم حديثه: "الموضوع كسر قلب البلد كلها، تخيّل جنازتين في يومين.. مروان اتدفن الجمعة وإسلام اتدفن النهارده السبت، ومفيش بيت هنا إلا وهو متأثر ومتوجع".