المتهمة في واقعة مصر القديمة: "باركتلها على الخطوبة من طليقي فشتمتني" (خاص)

تنشر “تليجراف مصر” تفاصيل جديدة في قضية التعدي على فتاة بمنطقة مصر القديمة بالقاهرة من قِبل طليقة خطيبها، والتي أسفرت عن إصابتها بجرح غائر في الوجه استلزم عملية جراحية انتهت بـ41 غرزة.

انفراد تليجراف مصر بالتحقيقات

وتنفرد “تليجراف مصر”، بنشر نص التحقيقات الكامل مع المتهمة “مريم. ا”، (18سنة ـ مقيمة بمصر القديمة)، ربة منزل، والتي جاءت على النحو التالي:

س: ما قولك فيما هو منسوب إليكِ من أنك متهمة بالتعدي بالضرب على المدعوة منصورة ياسر مستخدمة في ذلك سلاحا أبيض ومحدثة إصابتها المبينة بالأوراق والتي أعجزتها عن أشغالها الشخصية مدة تزيد عن العشرين يومًا؟

ج: محصلش.

س: ما الذي حدث إذن وما ظروف ضبطك وعرضك على النيابة العامة؟

ج: اللي حصل إن منصورة وعيلتها جيرانا في عزبة خير الله وكنت بروحلهم أفراح وهما بيحضروا أفراحنا، وفي فبراير السنة دي أنا اتطلقت، ومنصورة عندي على الفيسبوك، نزلت من حوالي 10 أيام منشور بتقول إن فرحها على طليقي يوم 24 سبتمبر، روحت قلتلها ألف مبروك ابقوا اعزموني، راحت شتمتني وقالتلي إنتِ مش كويسة وعشان كده طلقك، وإنه رجعلها، بعد كده عملتلي حظر، أنا اتضايقت فاتصلت بمصطفى وليد عشان هو صاحب طليقي، وكنت عاوزة أقعد مع أمها عشان البنت غلطت فيا، وهو قالي تعالي وهنروح، بعد كده ندى بنت عمة منصورة بعتتلي وقالتلي ابعدي عن مصطفى.

منصورة اتعورت في وشها

وأضافت المتهمة: “أنا كنت رايحة معاهم، ولما وصلت لقيتهم تحت البيت، مسكوا فيا وخنقوني، ومصطفى كان بيحوش بينهم، هو طلع مطواة عشان يبعدهم، بعد كده الناس مشتني، وركبت توكتوك، وأنا راكبة سمعت صويت إن منصورة اتعورت في وشها، أنا روحت قعدت عند خالتي يومين، وطليقي كلمني بعدها بيومين وقال إن الموضوع مش كده، وإنه عاوز يردني وأنا وافقت، بعد كده لقيت منصورة وأهلها منزلين منشورات، وبعدين جالي ناس من الشرطة الساعة 5 الفجر وخدوني أنا وطليقي”.

س: متى وأين حدث ذلك؟

ج: هي نزلت المنشور من حوالي 10 أيام، والخناقة كانت يوم الحد اللي فات الساعة 10 بالليل في عزبة خير الله عند المعهد الديني، وأنا اتاخدت من بيت طليقي في المطرية الفجر.

س: ما مناسبة وجودك بالأماكن والأزمنة سالفة البيان؟

ج: أنا رحت عند بيتهم عشان أقابل أم منصورة بعد ما غلطت فيا، ومصطفى قاللي هيأدبوها، لكن لقيناهم شدوني من الطرحة وقلعوهالي، وبعد منصورة ما اتعورت أنا خفت ورحت عند خالتي.

س: من كان برفقتك آنذاك؟

ج: كان معايا مصطفى وليد عثمان وقت الخناقة، ولما اتمسكت كان معايا طليقي أحمد سيد وشهرته أحمد الأبيض.

س: وما علاقتك بالمجني عليها منصورة ياسر محمد؟ وهل توجد ثمة خلافات سابقة؟
ج: مكنش في أي حاجة بيننا قبل كده، هي اللي بدأت المشاكل بعد ما باركتلها على جوازها من طليقي.

س: من القائم بضبطك تحديدًا؟

ج: ناس من شرطة قسم مصر القديمة، معرفش بياناتهم.

س: هل من ثمة حوار دار بينك وبين القائمين بالضبط آنذاك؟

ج: لا، هما دخلوا بيت أحمد وخدونا أنا وهو وركبونا عربية ميكروباص.

س: وهل قام القائمون بضبطك بتفتيشك آنذاك؟

ج: آه، فتشوني وأنا داخلة القسم.

س: وما الذي أسفر عنه التفتيش تحديدًا؟
ج: ولا حاجة.

س: وأين هو المدعو أحمد سيد الآن؟
ج: معرفش، مشفتوش بعد ما نزلت من المباحث.