أديب مستنكرًا سرقة الإسورة الفرعونية: يعني إيه غافلتهم وخرجت؟

علّق الإعلامي عمرو أديب على واقعة سرقة أسورة فرعونية نادرة تعود للملك بسوسنس الأول من داخل المتحف المصري، قائلاً: "الأسورة الفرعونية دي قطعة من تاريخ مصر، ومش دي أول مرة تتم فيها سرقة أثناء عمليات الترميم".

وأضاف أديب، خلال برنامجه "الحكاية" على فضائية "إم بي سي مصر" متسائلًا:
"إيه المتحف اللي موظفة تقدر تشيل قطعة أثرية في صدرها وتخرج بيها بكل سهولة؟ فين أجهزة الاستشعار؟ فين بوابات التفتيش؟"، ومستنكرًا ما ورد بالتحقيقات بأن "الموظفة غافلتهم وخرجت بالأسورة الفرعونية"، قبل أن يضيف ساخرًا: "فين الخطة؟.. فين الإثارة؟"

وتابع: "الناس سايبة موضوع الإهمال والسرقة وركزوا في سعر الأسورة ووزنها.. ده تاريخنا اللي اتسيح. في الخارج سرقة المتاحف بتحصل بخطط معقدة زي اللي بنشوفه في أفلام توم كروز، إنما هنا الموظفة حطت الأسورة في صدرها وخرجت".

وأشار أديب إلى أن الذهب يمكن التعرف عليه علميًا، متسائلًا: "في جدول مندليف كل معدن له وزن ذري.. هل حد فحص الذهب بتاع الأسورة اللي اتسيحت في الصاغة؟ ولا القطعة خرجت وشكرًا؟"، مضيفًا بسخرية: "واضح إن العلم عندنا بيكيل بالبدنجان".

وكشف مقدم "الحكاية" تفاصيل بيع الأسورة: "الجواهرجي كسب مصلحة في تاريخ مصر.. اشترى الأسورة الذهبية اللي وزنها 37 جرامًا بـ180 ألف جنيه وباعها بـ194 ألف جنيه، كسب 14 ألف جنيه".

واستطرد: "لما سرقة قطعة فريدة من المتحف تحصل قبل شهر من افتتاح المتحف الكبير وتتصدّر الصحف الأجنبية.. دي الصورة اللي عايزين نصدّرها للعالم؟ برة كل الجرائد بتتكلم عن سرقة أسورة فرعونية نادرة عمرها 3 آلاف سنة بـ2750 إسترليني.. وده تمنه ميجيبش قميص من محلات هارود في لندن".