"وقع علينا وخد 5 شقق".. متضررو حادث انهيار عقار باب الشعرية يروون التفاصيل

شهد شارع اللباري بمنطقة باب الشعرية في القاهرة مأساة حقيقية، بعدما انهار عقار سكني بالكامل، ما أدى إلى تشريد خمس أسر كاملة بينهم أطفال ونساء وكبار في السن، دون وقوع إصابات خطيرة، وسط حالة من الفزع وخسائر فادحة في الممتلكات.

أهالي عقار باب الشعرية

أوضح الأهالي لـ"تليجراف مصر" أن بوادر الكارثة ظهرت قبل ساعات من الانهيار، بعدما لاحظوا تشققات مريبة في إحدى الشقق بالعقار المقابل لهم، وسمعوا أصوات تصدع بالجدران. 

وعلى الفور، جرى إخطار السكان بضرورة إخلاء منازلهم حفاظًا على حياتهم، لكن لم يتوقع أحد أن العقار سينهار بهذه السرعة.

وأضاف أحد المتضررين: "كنا قاعدين وفجأة لقينا البيت بيقع قدام عينينا، نزل مرة واحدة كأنه مشهد من فيلم سينما، والعقار وقع على البلكونات والشقق المقابلة وسقطت في الشارع. معانا أطفال صغار وكبار في السن، ومنهم راجل عامل عملية قلب مفتوح ما قدرش حتى يتحرك من الصدمة."

سندات خشبية للبيت

وتابع: "الأمن قال لنا اطلعوا ساعتين وهتدخلوا تاني شققكم، لكن بعدها العمارة انهارت بالكامل. قعدونا في الشارع وخدوا أقوالنا، وقالوا هيعملوا سندات خشبية للبيت، لكن قبل ما يلحقوا يثبتوا أي حاجة، العقار انهار وسقط معاه كل ممتلكاتنا."

خمس أسر في الشارع

من جانبها، قالت إحدى السيدات المتضررات: "إحنا خمس أسر قاعدين في الشارع من غير أي مأوى، ومعانا أطفال وبنات وملناش مكان نروح له. كل حاجتنا اتدفنت تحت الأنقاض: الملابس، الأجهزة، حتى الأوراق الرسمية."

واختتم أحد المتضررين حديثه قائلاً: "إحنا مش طالبين غير حقنا في شقق بديلة أو مكان نأوي فيه أطفالنا، مش معقول خمس أسر يناموا في الشارع بالشكل ده. محتاجين حل سريع قبل ما نتشرد أكتر من كده."