في أول ظهور له.. علي حسين مهدي في حوار حصري لـ"تليجراف مصر": اتحبست في أمريكا عشان الإخوان باعوني (انفراد)

حمل الحوار الحصري الذي أجرته “تليجراف مصر” مع الناشط علي حسين مهدي، مفاجآت وتفاصيل كثيرة عمّا جرى في الشارع الأمريكي عقب عملية “طوفان الأقصى” في 7 أكتوبر 2023، وكانت النواة التي شنت من خلالها الولايات المتحدة حملة تضييقات على العرب والمسلمين هناك، وأزاحت عن عينيه هو الآخر الكثير من الغشاوة، ما دفعه لتغيير قناعاته والاصطفاف خلف الدولة المصرية وقيادتها الحكيمة.

تفاصيل صادمة واعتذار وتحذير

في أول ظهور إعلامي له بعد العودة إلى مصر، روى الناشط علي حسين مهدي تفاصيل صادمة عن الاضطهاد الذي تعرض له العرب والمسلمون في أمريكا عقب أحداث 7 أكتوبر 2023، واعتذر بشجاعة للرئيس عبدالفتاح السيسي عن انتقاده السابق له، وحذّر من تهور إسرائيلي متوقع لتنفيذ مخطط التهجير.

وقال مهدي في حواره مع رئيس تحرير "تليجراف مصر" الكاتب الصحفي سامي عبدالراضي: "كنت عايش ملك في أمريكا لكن بعد 7 أكتوبر انقلبت كل الموازين بالنسبة لي واضطريت أعود إلى مصر والموضوع كان درامي جدًا ومكنتش حاسب له خالص".

وأضاف: "وقتها كان يتم التنكيل بكل الطلاب العرب وأي حد بيتكلم عن فلسطين وغزة، والعرب والمسلمين كانوا مستهدفين عشان بيدافعوا عن القضية الفلسطينية، لدرجة إن كان فيه ناس بيتقبض عليها وتاني يوم أهاليهم بيعرفوا إنهم اترحلوا السلفادور".

اضطهاد في الجامعات والشوارع

وكشف عن معاناة العرب والمسلمين بسبب مواقفهم من القضية الفلسطينية: "في الجامعات كان بيتم فصل الطلاب منها، والأساتذة الجامعيين كانوا بيتسحلوا في الشوارع، وعلى فكرة كان بينهم أمريكان، دا غير العرب اللي اتفصلوا من شغلهم".

وفيما يخص تعامل الأمن في أمريكا، قال مهدي: "اللعب هناك على أصوله، لو إنت عامل أي مشكلة في أمريكا بيدخلوا عليك أول حاجة بالضرائب، ويقولوا لك مثلا في 5 دولارات من 2015 مادفعتهمش للضرائب، فتعالى نحبسك خمس سنين يا إما تبطل اللي إنت بتعمله دا وتشتري دماغك، ولو إنت ملتزم بالضرائب هيزق عليك واحدة تتهمك بالاعتداء عليها، المهم إنه يلبسك قضية، وساعتها الناس هتقول دا بيلتزم بالقانون، والحقيقة إنه بيتلاعب بالقانون".

وتابع: "ولو كل دا مانفعش يلعب لعبة أقذر ويروح الشغل بتاعك بلبس (FBI) ويسأل عنك، وطبعًا كل الناس اللي معاك تتخض، وصاحب الشغل يقول أنا مش عايز وجع دماغ ويفصلك، ودا قطاع خاص ماحدش يقدر يكلمه أو يرفع عليه قضية".

غلطت وعارف العواقب

وكشف مهدي أنه تعرّض للفصل من عمله والطرد من الجامعة، واضطر لإنفاق كل أمواله على المحامين، وعن السبب الذي أدى لحبسه قال: "غلطت غلطة وأنا عارف عواقبها، وهي إني كنت ببعت مساعدات مادية للأشقاء في اليمن وغزة، ودا بالنسبة لهم يعتبر مساعدة جماعات إرهابية، ولأني كنت بلاعبهم بالقانون اللي بيلزمهم مايدخلوش بيتك غير لما يجيبوا لك محامي وعملت كدا خمس مرات، تعنتوا معايا وقضيت في الحبس 6 شهور".

وفيما يخص قراره بالعودة إلى مصر، قال: "الناس اللي بتقول إنت رجعت مصر ليه؟ أنا كان ممكن أفضل قاعد في أمريكا، لكن كنت هدخل في قضايا كانت هاتستنزفني بشكل كبير جدًا ماديًا وهاتخلّيني على الحديدة".

تحذير من مخطط التهجير إلى سيناء

خلال حواره المزدحم بالمعلومات، حذّر مهدي من مخطط إسرائيلي يتخوف منه لتهجير الفلسطينيين إلى سيناء، كاشفًا أنه سمع هذه المعلومات قبل عودته إلى مصر: "دي معلومات أنا سمعتها قبل ما أرجع من أمريكا في عز هجمات 7 أكتوبر، لأن الدولة المصرية رافضة التهجير".

وأضاف: "شايف إن الفترة اللي جاية دي إسرائيل هتعمل ضربة على معبر رفح بالتزامن مع التوغل البري بتاعهم، ولما أهل غزة يوصلوا للجنوب ويقربوا من مصر، الاحتلال هيضرب الجدار الفاصل بين المعبر في رفح المصرية والفلسطينية عشان يفتح طريق لأهل غزة إنهم يدخلوا سيناء".

سمعت عن المخطط في أمريكا

وردًا على سؤال الكاتب الصحفي سامي عبد الراضي: "مين قال لك إن الاحتلال هيقدر يعمل دا؟"، قال مهدي: "دا اعتقاد بناء على اللي سمعته في أمريكا قبل ما أرجع مصر".

كما اعتذر مهدي للرئيس السيسي عن انتقاد سابق قائلًا: "الناس عارفة إني مش بطبّل لحد، وهو الزعيم الوحيد اللي وصف إسرائيل بـ(العدو) في القمة العربية الإسلامية، والشعب المصري حين يرى قيادته تتحدث بهذا الشكل يشعر بالعزة".

وعن دور مصر في حماية الأشقاء العرب، قال مهدي: "في أخبار بتقول إن المخابرات المصرية هي اللي حذرت قيادات حماس ودا اللي أنقذهم، مش زي ما بيتقال إن قطر هي اللي أحبطت الهجوم".

وحذّر دول الخليج، متسائلًا: "قاعدة العديد أكبر قاعدة أمريكية فيها طيارات في الشرق الأوسط كله، والرادارات تقدر تلقط الطائرات الإسرائيلية من على بعد 400 كيلومتر، فإزاي الأمريكان ماقدروش يتصدّوا للهجوم في الدوحة؟ دول الخليج لازم تعرف إن وقت الجد اللي بيتحاموا فيهم هم اللي هيبيعيوهم سواء أمريكا أو أوروبا أو دولة الاحتلال".

وعن إشادة قناة “الجزيرة” بالإعلامي أحمد موسى بعد هجوم الدوحة، قال مهدي: "دا حصل لأن قطر عرفت في الآخر إنه في وقت الشدّة مفيش حد هيحميها غير مصر وقيادتها، وإن القيادات دي هي اللي وقفت معاها وقت الشدة وهم الوحيدين اللي حركوا طائرات في سماء قطر".

واختتم المهدي حديثه بالإشارة إلى كلمة الرئيس السيسي في القمة العربية الإسلامية بالدوحة، التي وصف فيها إسرائيل بـ"العدو"، مؤكدًا أن مصر رفضت أي محاولات لتهجير الفلسطينيين أو فرض ترتيبات أمنية أحادية، ودعت إلى جدول سلام عادل بناء على حدود 1967.