"ياريت بابا كان عايش".. تفاعل واسع مع رسالة أب لابنه العاق بسوهاج

في فيديو مؤثر نقل أب مريض رسالته عبر “تليجراف مصر” لابنه الذي يعمل استاذًا في إحدى الجامعات يرجو منه الحضور لرؤيته ولو لمرة واحدة قبل وفاته، وذلك بعد انقطاع دام 11 عاما.

رسالة الأب لنجله

وقال الأب ابن محافظة سوهاج في المقطع: “حرام عليك يا ولدي حرام عليك ميرضهالكش ربنا عايز أشوفك يا زعيم عايز أشوفك يا ولدي، واحشني أوي وعايز أشوفك قبل ما أموت”.

وأضاف: “اليوم اللي هتيجي فيه هموت فيه، 11 سنة كل يوم افتكرك يا زعيم، ده أنا أبوك يا زعيم حرام عليك يا ولدي متوحشك وهموت عليك”.

أنا بابا توفى من 5 سنين

أثار المقطع حالة واسعة من الحزن  بين المتابعين، منهم من دعى للأب بالصحة والعافية، ومنهم من شارك تفاصيل حياته مع والده المتوفى، حيث كتب أحد المستخدمين: “أنا بابا توفي وأنا عندي 5 سنين ولحد النهاردا مش مستوعبة إنه خلاص مات ومش هشوفة تاني”.

وتابع: “مكنتش بروح أزوره عشان مش مقتنع إنه في المكان دا وبعيد عني من حبي فيه ووجعي على فراقه، في بالي كل لحظة وكل ثانية وسبحان الله فاكرة كل تفصيلة صغيرة فاكرة ملامحه وضحكتة وكلامه، لبسه، مشيته، حتى طريقته اللي كان بيمشط بيها شعره فاكراها”.

وأضاف: “لما بروح أزوره بحس روحه حواليا فعلا ومش عايزه أمشي بحس بحضنه اللي اتحرمت منه بدري في عز احتياجي ليه ومفيش مخلوق عوض مكانه”.

وأردف: “الأب والأم والله ميتعوضوش أبدا أنا عايشة برضا ودعوة أمي.. أنا بشوف الحاجات دي قلبي بيتقطع حرفيًا إنتوا إزاي كدا؟.. قسى القلب دا جالكم منين؟.. طب مفيش لحظة كدا بتحنوا ليهم؟.. طب شفتوا حد حنين وفني عمرة كله ليكم زيهم؟”.

ياريت بابا كان عايش

واختتم: “أنا هدعيلكم ربنا يحنن قلوبكم عليهم عشان ميغضبوش عليكم وتعانوا في الدنيا وفي الآخرة، رضي ربنا من رضي الوالدين”.

وكتب حساب آخر: “ياريت بابا كان عايش كنت عيشت تحت رجله العمر كله الله يرحمك يا بابا ويغفرلك ويسكنك الفردوس الأعلى”.

أتمنى أشوف أبويا 10 ثوان

وعلق آخر: “أولا لازم تحط ف بالك مهما عمل أبوك سيظل أبوك قال صلى الله عليه وسلم أنت ومالك لأبيك”.

وأضاف: “ثانيا لازم تكون على يقين أنها ديون وبتترد شئت أم أبيت هايترد ليك سواء عملت خير أو شر هتشوفه هتشوفه، ثالثا أنا واحد من الناس أتمنى لو أشوف أبويا الله يرحمه لو 10 ثواني فقط أبوس رجله وإيده وأحضنه”.