اعتداء وحشي على طالبة بالهرم.. ووالدتها: "حق بنتي لازم يرجع"

وقعت طالبة بالمرحلة الإعدادية ضحية اعتداء وحشي من قبل أسرة إحدى زميلاتها، على خلفية خلاف بسيط وقع بينهما داخل إحدى المدارس بمنطقة الهرم.

والدة طالبة الهرم تروي التفاصيل

تقول والدة الطالبة: "يوم التلات حصلت مشادة بين بنتي سما وزميلة ليها، البنت وقفت وسط صحابها وقالت على بنتي ساقطة، وهي مش كده أصلًا، وده تسبب في شجار صغير، لكن بنتين من تالتة إعدادي تدخلوا وفضّوا الخناقة، والموضوع خلص وماخدش أي حجم".

وأضافت الأم في بث مباشر لـ"تليجراف مصر": "يوم الأربع، تاني يوم، رُحت أدي لبنتي المفاتيح عشان كانت ناسيها وأنا رايحة شغلي، وهي مدرستها مسائي، الساعة 4 ونص لقيت تليفونها بيرن، أنا متعودة تقولي (أنا مروحة)، لكن المرة دي قالتلي: الحقيني، وبعدها التليفون اتسحب منها، وواحدة ست كلمتني وقالتلي إن بنتي ضربت بناتها الخمسة وليها حق عندي".

سمعت صراخ بنتي في التليفون

وتابعت: "سمعت صوت بنتي وهي بتصرخ وبتتشتم، وعرفت إنهم مسكوا فيها، لكن ما تخيلتش الموضوع يكبر كده، قولتلها تديها التليفون ونقابل مديرة المدرسة، ولو ليها حق أنا هجيبهولها. لكنها قالت لبناتها سبوها وقفلت السكة، اتحركت من شغلي في حدائق الأهرام، وبعدها صحاب سما كلموني قالولي: الحقي سما سايحة في دمها ومغمى عليها".

وأكدت الأم: "بنتي مالهاش ذنب، إيه اللي عملته عشان يحصل فيها كده؟! دي بلطجة. الخمسة نزلوا عليها من غير رحمة، بنتي من يومها مش بتتكلم ولا بتأكل، وحالتها النفسية منهارة، وبتقول مش هروح المدرسة تاني".

حق سما لازم يرجع

وأشارت: "المدرسة رفضت تتعاطف معايا أو تقف معايا، وقالولي: طول ما المشكلة بعيد عن المدرسة ملناش دعوة، في الوقت نفسه، أصحاب سما عملوا جروب على الواتس بعنوان (حق سما لازم يرجع) عشان يقفوا معاها، جسم بنتي كله بقى مزرق، ووشها متورم ومجروح لدرجة إنها مش متحملة ألم تدليك وشها. وواحدة من البنات اللي اعتدوا عليها قالتلها: خسارة فيكي الضوافر اللي اتقلعت من وشك".

إذن نيابة

واختتمت الأم حديثها قائلة: "المدرسة رفضت تديني أي بيانات عن الأم أو الطالبة، وقالولي: هاتي إذن نيابة. وأنا فعلًا حررت محضر رسمي في قسم الطالبية، وكل اللي بطلبه إن حق بنتي يرجع".