قرار جديد من النيابة في واقعة تعدي أم وابنتها على طالبة

أمرت النيابة العامة، بحبس سيدة وابنتها الكبرى 4 أيام على ذمة التحقيقات، لاتهامهما بالتعدي على طالبة أمام مدرسة بمنطقة الهرم، وإحداث إصابتها.

القبض على المتهمين بالتعدي على الطالبة سما بالهرم 

 وزارة الداخلية كانت قد كشفت ملابسات منشور مدعوم بصور تم تداوله عبر مواقع التواصل الاجتماعي، يتضمن تضرر إحدى السيدات من قيام طالبة وأفراد من أسرتها بالتعدي على ابنتها بالضرب باستخدام عصا، ما أسفر عن إصابتها، وذلك أثناء خروجها من المدرسة في منطقة الهرم بمحافظة الجيزة، ونشر "تليجراف مصر" تفاصيل الواقعة.

تفاصيل الواقعة

وبالفحص، تبين أنه بتاريخ الخامس والعشرين من الشهر الجاري، ورد بلاغ إلى قسم شرطة الطالبية من ربة منزل كانت بصحبة نجلتها المصابة بكدمات وسحجات متفرقة بالجسم.

وأفادت في بلاغها بتعرض ابنتها للاعتداء من قبل طالبة وأسرتها، عقب مشادة سابقة بين الفتاتين داخل المدرسة.

ضبط المتهمين

تمكنت الأجهزة الأمنية من تحديد وضبط الأطراف المشكو في حقهم، وهم: الطالبة، ووالدتها، وشقيقتها، وشقيقها، وجميعهم مقيمون بدائرة قسم شرطة الأهرام.

وبمواجهتهم، أقروا بارتكاب الواقعة على النحو الوارد في البلاغ، وتم اتخاذ الإجراءات القانونية اللازمة حيالهم.

والدة الطفلة المصابة تروي التفاصيل

وفي وقت سابق، روت والدة الطفلة المصابة تفاصيل الواقعة، قائلة: "يوم الثلاثاء حصلت مشادة بين بنتي سما وزميلة لها، والبنت وقفت وسط أصحابها وقالت على بنتي إنها ساقطة، وهي مش كده أصلًا. وده تسبب في خناقة صغيرة، لكن بنتين من تالتة إعدادي فضّوا الخناقة، والموضوع خلص وماخدش أي حجم".

وأضافت الأم في بث مباشر لـ"تليجراف مصر": "يوم الأربعاء، تاني يوم، رُحت أدي لبنتي المفاتيح عشان كانت ناسيها، وأنا رايحة شغلي. بنتي مدرستها مسائي، الساعة 4 ونص لقيت تليفونها بيرن، وأنا متعودة تقولي (أنا مروحة)، لكن المرة دي قالتلي: الحقيني! وبعدها التليفون اتسحب منها، وواحدة ست كلمتني وقالتلي إن بنتي ضربت بناتها الخمسة، وليها حق عندي".

سمعت صراخ بنتي في التليفون

وتابعت الأم: "سمعت صوت بنتي وهي بتصرخ وبتتشتم، وعرفت إنهم مسكوا فيها، لكن ما تخيلتش الموضوع يكبر كده. قلتلها تديها التليفون ونقابل مديرة المدرسة، ولو ليها حق أنا هجيبهولها. لكنها قالت لبناتها: (سبوها)، وقفلت السكة. اتحركت من شغلي في حدائق الأهرام، وبعدها صحاب سما كلموني وقالولي: الحقي سما سايحة في دمها ومغمى عليها".

وأكدت: "بنتي مالهاش ذنب، إيه اللي عملته عشان يحصل فيها كده؟ دي بلطجة! الخمسة نزلوا عليها من غير رحمة. بنتي من يومها مش بتتكلم ولا بتأكل، وحالتها النفسية منهارة، وبتقول مش هروح المدرسة تاني".

حق سما لازم يرجع

وأشارت الأم إلى أن: "المدرسة رفضت تتعاطف معايا أو تقف معايا، وقالولي: طالما المشكلة خارج المدرسة، ملناش دعوة. في الوقت نفسه، أصحاب سما عملوا جروب على الواتس بعنوان (حق سما لازم يرجع) عشان يقفوا معاها، جسم بنتي كله بقى مزرّق، ووشها متورم ومجروح لدرجة إنها مش قادرة تتحمل ألم تدليك وشها. وواحدة من البنات اللي اعتدوا عليها قالتلها: (خسارة فيكي الضوافر اللي اتقلعت من وشك)".

إذن من النيابة

واختتمت حديثها قائلة: "المدرسة رفضت تديني أي بيانات عن الأم أو الطالبة، وقالولي: هاتي إذن من النيابة. وأنا فعلًا حررت محضر رسمي في قسم الطالبية، وكل اللي بطلبه إن حق بنتي يرجع".