باسم يوسف: فقدت الحق في لقب "دكتور" ووصفي بالـ "أراجوز" مش بيضايقني

كشف الإعلامي باسم يوسف حقيقة مشاعره تجاه عودته لمصر بعد سنوات من الغياب، قائلًا: "مصر أكيد وحشتني ولكن فيه 11 سنة فاتوا، مصر اللي في دماغي هي اللي كانت 2014، أما 2025 مصر بقت حاجة تانية خالص".

خلال ظهوره مع الإعلامي أحمد سالم في برنامج "كلمة أخيرة"، على قناة "ON": أضاف يوسف: "أخاف أرجع الاقي نفسي غريب عن البلد اللي عشت فيها 40 سنة من حياتي"، مشيرًا إلى أن "الغربة مش بتتغرب في بلدك الجديد، أنت بتبقى غريب عن بلدك اللي أنت سيبتها".

وعن قراره بعدم استكمال برنامجه "البرنامج" من خارج مصر، أوضح يوسف: "ماعملتش البرنامج من برة مصر، لأن "البرنامج" دا وليد عصره وظروفه وتوقيت، ونجاحه كان بسبب ارتباط الناس بظروف الوقت بتاعته".

وتابع: "الكوميديا عمرها قصير، والكوميديا السياسية علشان تتكلم عن أحداث جارية عمرها أقصر"، مضيفًا: "أنا مستحقش كل دا وبحس إني في مكان مش بتاعي.. ودائمًا الناس تقولي لا إنت مش كوميديان إنت وليد صدفة".

وتابع: "فقدت الحق إني يتقالي يا دكتور، وأنا أساسا بقالي 15 سنة محطتش إيدي على عيان ودا لمصلحتهم".

وعن دوره في دعم القضية الفلسطينية. قال باسم: "بالنسبة للقضية الفلسطينية، فهناك العديد من الأشخاص الذي يعرفون أكثر مني تفاصيل عن فلسطين، وأشخاص أفنوا حياتهم في الدفاع الحقيقي عن القضية، ولكن لم يحصلوا على جزء صغير من الزخم التي حصلت عليه مقابلاتي".

وتابع: "في أول الصيف كان فيه حفلة كبيرة لجمع التبرعات للأطباء اللي بيروحوا غزة فجابوا المشاهير ومغنيين والكوميديان وأنا".

وأكد أن "الناس راحت كانت رايحة تساند الأطباء اللي بيروحوا فلسطين، ولكن لو عملت حفلة وجبت الأطباء ماحدش هيدفع تذكرة ويروح يتبرع، ودا العالم اللي إحنا عايشين فيه".

واختتم يوسف: "الناس عايشة في عالم الانفلونسر، لو هتفتح محل أكل هتجيب انفلونسر، لو هتعمل فيلم هتجيب انفلونسر، لو هتتكلم عن القضية هتجيب انفلونسر، أو أراجوز.. أنا مابضايقش من وصفي بالـ (أراجوز)، أنت تطول أنك تخلي الناس تضحك".