الخادمة المثقفة.. زينب العبد تكشف تفاصيل دورها في مسلسل "لينك"

كشفت زينب العبد، عن تفاصيل دورها في مسلسل "لينك"، بطولة سيد رجب، ورانيا يوسف، والمقرر عرضه قريبًا.

وقالت زينب العبد، في بيان اليوم: "أجسد شخصية بسنت، بتشتغل عند الست يسرية (ميمى جمال) ، لكنها مربياها من وهي عندها خمس سنين، فبالنسبة لها بنتها فعلًا. علمتها وربّتها وصرفت عليها زي أولادها بالضبط، وهي اللي بتراعيها في الكبر".

“سلاح ذو حدّين”

وأضافت:"الشخصية خفيفة على المتفرج، لكنها سلاح ذو حدّين، لأنها لو اتقدمت باستخفاف هتضيع، فكان لازم أركز جدًا في تفاصيلها".

وتابعت: "بسنت مش البنت الشغالة الساذجة اللي اتعودنا عليها، دي بنت متعلمة ومثقفة، والست يسرية بتصرف عليها كويس، ومتطلعة على أمور الحياة الإيجابية والسلبية، خصوصًا في اللي بيخص الشباب".

كواليس التصوير

وعن كواليس التصوير، قالت: "اشتغلت قبل كده مع الفنانة ميمي، وهي بالنسبة لي زي أمي، والكيميا بينا عالية جدًا، وكمان اتبسطت جدًا بالشغل مع الفنان سيد رجب، وأحمد صيام، ورانيا يوسف اللذيذة والخفيفة على قلبي، والجو كان كله خفة دم وسلاسة، وده انعكس في المشاهد".

أما عن رسالة المسلسل، فقالت:"لينك بيناقش أكتر من قضية مش بس السوشيال ميديا، لكن كمان بيعرض إزاي كبار السن ممكن يقعوا في مشاكل كبيرة بسببها، وفي كل بيت حكاية مختلفة وأزمة شبه اللي بنشوفها حوالينا كل يوم".

قصة مسلسل “لينك”

المسلسل يتناول قضية النصب الإلكتروني وما يسببه من معاناة كبيرة للأشخاص والعائلات، إذ يسلط الضوء على الكيفية التي يقع بها الضحايا فى فخ المحتالين عبر الإنترنت، وما ينتج عن ذلك من مشكلات مادية ونفسية واجتماعية تهدد استقرار الكثير من الأسر، بالإضافة إلى التطرق للعديد من القضايا الاجتماعية الأخرى مثل العلاقات العائلية وحياة الجيران مع بعضهما مع قضايا الشباب المختلفة.

أبطال مسلسل "لينك"

مسلسل "لينك" بطولة سيد رجب، رانيا يوسف، ميمي جمال، محمود ياسين جونيور، فرح الزاهد، مينا أبو الدهب، لينا صوفيا، سليم الترك، أحمد صيام، تامر فرج، زينب العبد، هيثم نبيل، بلال أحمد بلال، آية عبد الرازق والعمل من تأليف ورشة "ج" بقيادة الكاتب محمد جلال، وإخراج محمد عبد الرحمن حماقى، ومن إنتاج “إيما لاين” للمنتجين إيمان أبو الدهب وأحمد بلال.