بعد استبعاده من "شمس الزناتي 2"، عمرو سلامة: "شايفين المخرج مصوراتي"

أعرب المخرج عمرو سلامة، عن استيائه من الظاهرة التي تحدث مع عدد من المخرجين الذين يصورون عمل ما وبعد ذلك ينقطعوا عنه ويستبدلوهم بمخرج آخر.

وتأتي تصريحات عمرو سلامة، على خلفية استبداله في فيلم شمس الزناتي 2، بالمخرج أحمد خالد موسى.

عمرو سلامة يتحدث عن ظاهرة غريبة مع المخرجين

وكتب عمرو سلامة عبر صفحته على “فيسبوك”: “على مدار العشر سنين اللي فاتوا، تكرر بغرابة حدث شــاذ على أعراف صناعة السينما، أن مخرج يسيب عمل بعد أن يكون صور بالفعل جزء منه.. حدث زي ده على مدار تاريخ الصناعة كان يستحيل حدوثه إلا لمرض المخرج أو وفاته وأسباب عارضة".

وتابع: "دي كانت حاجة بتحصل كل عشر سنين مرة، في العشر سنين اللي فاتوا بس حصل ده أكثر من عشر مرات، على سبيل المثال لا الحصر: المخرجة كاملة أبو ذكري (مسلسل ذات)، المخرج هشام عكاشة (مسلسل البلطجي)، المخرج هاني خليفة (مسلسل لعبة النسيان)، وفي أمثلة أكثر بكثير”.

واستكمل: “طبعا كل حدث من دول له أسبابه المختلفة، وترك المخرج للعمل ممكن يكون رغبة منه هو بعد اكتشافه لاستحالة تكملته أو العمل عليه، لكن تكرار الحدث لازم يكون له دلالة.. هل لأن الصناعة مابقتش مدركة إن أصل العملية الإبداعية هي المخرج؟ هل الصناعة شايفة إن المخرج مجرد واحد "جاي يصور" المكتوب وخلاص؟ شايفينه مصوراتي؟".

عمرو سلامة يناشد نقابة السينمائيين

وواصل عمرو سلامة: “كل دي أسئلة مهمة، لكن السؤال الأهم، إزاي نقابة السينمائيين مطبعة مع تكرار الحدث ده بشكل لم يكن له مثيل في تاريخ الصناعة، إزاي ده بيتكرر مع إن قوانين حقوق الملكية الفكرية واضحة وضوح الشمس، إزاي في مواقف كثير من دي سابت ده يحصل بدون حصول المخرج على حقوقه الكاملة ومستحقاته”.

وأضاف: “اللي أنا فاهمه إن النقابة دورها تحمي أعضائها، وعلشان كده بتاخد رسوم وعندها سلطة، فشلنا مع نفس النقابة في فرض ظروف إنسانية، من تصوير 12 ساعة فقط، وإجازات منطقية للعاملين، آليات واضحة لعدم تأخير أجور العاملين لشهور وساعات لسنين وساعات بتضيع خالص”.

عمرو سلامة: لن أنكر إن النقابة بتتعب وقررت أطالب بحقي للنهاية

واختتم: “لن أنكر إن النقابة بتتعب، وليها دور مشرف في مواقف كثير، وبترعى الفنانين صحيًا وبتأمنهم بعد تقاعدهم، ولكن إحنا لازم لما نلاقي علامات استفهام نشاور عليها علشان نتطور، أنا شخصيا في مشكلة دلوقتي بتنظر فيها النقابة والقضاء وقررت أطالب بحقي للنهاية".

اقرأ أيضًا:

عمرو سلامة يلوّح بـ"مقاضاة" شركة إنتاج كبرى أهدرت حقوق "ما وراء الطبيعة"

عمرو سلامة "نادم" على إخراج فيلم لـ أحمد حلمي: حسيت بالفشل (فيديو)

عمرو سلامة يحلم بـ"الأستاذ".. ماذا قال عن أحمد مكي ومحمد رمضان؟