أديب عن قرار تحريك أسعار البنزين: المواطن مش بيروح شغله راكب جمل

علق الإعلامي عمرو أديب على قرار الحكومة بتحريك أسعار المنتجات البترولية مع تثبيت الأسعار لعام كامل كحد أدنى.

وقال أديب، خلال برنامجه "الحكاية" على قناة “إم بي سي مصر”: "كل أنواع الطاقة زادت اليوم 2 جنيه زيادة في كل أنواع البنزين والسولار، هذا الخبر غير مريح وغير سعيد للجميع"، مؤكداً أن الجميع كان يتوقع هذه الزيادة لكن الآمال كانت معقودة على أن تكون أقل أو أن يتم تأجيلها.

وتساءل أديب عن منطقية الزيادة في ظل تحسن بعض المؤشرات الاقتصادية: "اسأل الناس.. حتى الناس اللي مش غاوية اقتصاد يقولولك: هو مش الدولار نزل؟ هو مش سعر برميل البترول قليل برة؟"، مشيرًا إلى أن بعض الدول خفضت أسعار المحروقات في نفس اليوم الذي زادت فيه في مصر.

وتابع مقدم "الحكاية": "الشعب المصري ملوش في معدلات التضخم ومؤشرات الاقتصاد لكن خبير في الأسعار اللي بيشوفها في سوق الخضار ومطعم الفول".

وأشار إلى أن "السولار مش بتاع الأغنيا، ده بتاع العيش والمصانع والمزارع، لو التاجر قرر رفع سعر الفرخة لـ ألف جنيه الحكومة مش هتقدر تكلمه".

كما حذر من التأثير المتسلسل للزيادة، موضحًا أن "السولار بيبقى ليه تأثيرات غير مباشرة على غلاء المعيشة"، مستشهدًا بارتفاع أسعار الخبز والسلع والخضار والنقل والصناعة، "كله هيصب على الزبون والمواطن بيسأل هعمل إيه؟".

وانتقد أديب السياسات الحكومية، قائلًا: "يجب أن تفكر الحكومة بجدية لما تيجي ترفع الأسعار.. الناس هتعمل إيه؟".

وعقب الإعلامي عمرو أديب: “الناس فرحانة ببلدها لها يومين، كنت استنى شوية في رفع أسعار البنزين!، من 2019 لحد دلوقتي رفعتوا البنزين 20 مرة، المواطن بيروح شغله بالمواصلات مش راكب جمل وبيأكله سريس، كله بيكسب والمواطن الوحيد اللي بيخسر”.

وأكمل أديب: "الطبقة المتوسطة انسحقت تمامًا"، مطالبًا الحكومة ببرامج اجتماعية موازية لرفع الدعم، وأضاف: "لما بتوفر المبالغ دي من الوقود، بتكون حطتها لي فين؟ أنا بشوفها فين؟، لازم المواطن يشعر بأن الأموال دي بتعود عليه بخدمات أفضل وتخفف من أعباء المعيشة".