الأسد بـ7 آلاف جنيه، اعترفات البلوجر لوشا : "كنت شغال عامل نظافة بس فلوس الميديا أحسن" (خاص)

البلوجر لوشا

A . .A

كشفت التحقيقات مع البلوجر الشهير “محمد.ع.أ” المعروف إعلاميًا بـ"لوشا" تفاصيل جديدة في قضية اتهامه بنشر محتوى مخالف للآداب العامة.

اعترفات البلوجر لوشا

حصلت “تليجراف مصر” على نص التحقيقات الكاملة في القضية المتداولة إعلاميًا للبلوجر "لوشا"، بعد اتهامه بإنشاء وإدارة حسابات على مواقع التواصل الاجتماعي، وبث محتوى وصفته الجهات المختصة بأنه مخالف للآداب العامة.

وفي بداية التحقيقات قال المتهم: اسمي “محمد ع.أ”، عندي 39 سنة، وكنت شغال قبل كدا عامل نظافة في مستشفى الجامعة بطنطا، وحاليًا شغال على السوشيال ميديا، ومقيم في السيدة زينب بالقاهرة ولي محل إقامة آخر في الهضبة الوسطى بالمقطم.

وفيما يلي نص التحقيقات:

س: ما قولك فيما هو منسوب إليك من أنك متهم بإنشاء وإدارة واستخدام حسابك على موقع التواصل الاجتماعي محل الاتهام الأول وارتكاب جريمة معاقب عليها قانونًا وهي قيامك بنشر مقاطع مرئية ومسموعة تتضمن أفعالًا وألفاظًا مخلة على النحو المبين بالأوراق؟

ج: محصلش ومن يوم ما عملت تيك توك وأنا مبقولش أي ألفاظ خارجة أو خادشة للحياء، والاعتراض بس على مسلسل "الشيخ" اللي بقدمه كفيديوهات على الصفحات بتاعتي، وكان على اللغة العربية فقط لا غير.

س: ما قولك فيما هو منسوب إليك من أنك متهم بارتكاب أفعال فاضحة في العلن ومخلة بالحياء وقمت بتوثيقها عبر مقاطع مرئية ومسموعة وقمت بنشرها على موقع التواصل الاجتماعي محل الاتهام الأول على النحو المبين بالأوراق؟

ج: محصلش واللي حصل هو اللي قلته.

س: ما قولك فيما هو منسوب إليك من أنك متهم بقيادة السيارة الرقيمة ماركة “جيب رانجلر” منتهية التراخيص على النحو المبين بالأوراق؟

ج: هي منتهية من شهرين بس.

س: ما هي ظروف ضبطك وإحضارك؟

ج: اللي حصل إن أنا كنت قاعد في البيت يجهر حلقة، لقيت الشرطة بتخبط على باب البيت وأنا فتحت وقالولي إحنا مباحث، وعارفين إنك محترم، تعالي معانا، وروحت معاهم على قسم المقطم، وقعدت مع ضباط هناك، واتعرضت ثاني يوم على النيابة وهو ده كل اللي حصل.

س: متى وأين حدث ذلك؟

ج: أول امبارح يوم السبت الساعة 11 ونص بالليل، والكلام ده كان في الشقة بتاعتي في الهضبة الوسطي بالمقطم.

س: ومن القائم على ضبطك ؟

ج: ضباط كانوا لابسين بدل ميري.

س: هل من ثمة حوار دار بينك وبين القائمين على ضبطك؟

ج: أيوه الضباط قالولي إحنا مباحث المرور، وتعالى معانا على القسم.

س: هل من ثمة تفتيش وقع عليك؟

ج: هما فتشوني، وقالولي هفتش شقتك وأنا قلتلهم تمام ماشي.

س: ومن الذي أجراه؟

ج: ضابط من الضباط اللي مسكوني فتح الشنطة بس وأنا اللي سلمت التليفونات.

س: من مالك الهاتفين المعروضين عليك، وما هو وصفهما؟

ج: الاثنين ملكي والأول ماركة أيفون سيلفر، والثاني ماركة أيفون ومثبت عليه شريحة.

س: وهل يشاركك أحد في استخدامهما؟

ج: لا أنا اللي بستخدمهم لوحدي.

س: بكم اشتريت الهاتفين؟

ج: الأيفون 12 كان بـ 8000 جنيه والأيفون 16 كان بحوالي 39 ألف جنيها.

س: وما هو مصدر تحصلك على تلك الأموال؟

ج: من شغلي لما كنت بعمل فيديوهات على الفيس بوك واليوتيوب والتيك توك.

س: وما هو رصيد المحفظة الالكترونية المربوطة برقمك؟

ج: عليها حوال 600 ألف جنية.

س: وما هو مصدر حصولك على تلك الأموال المشار إليها؟

ج: المتابعين بتوعي في لايفات التيك توك والفيديوهات بتاعتي على الفيس بوك واليوتيوب وأنا بحول الفلوس بعد كده في المحفظة بتاعتي.

س: وما هو تاريخ تحصلك على ذلك المبلغ آنف البيان؟

ج: من ساعة ما اشتغلت في مجال السوشيال ميديا من حوالي سنتين ونصف بالظبط.

س: وما هي طبيعة تلك المنصة "التيك توك" وبيئة عملها ؟

ج: هي عبارة عن تطبيق زي برنامج يتحمل من على آب ستور اللي على الأيفون، وأنا منزله عندي على التليفون ، والمنصة دي عباره عن منصة تواصل اجتماعي بتعمل عليها حسابات خاصة وترفع من خلالها فيديوهات، وكمان تفتح من خلالها فيديوهات بث مباشر بيحضرها كثير من المتابعين في نفس وقت نشرها، واللي بيعملوا اللايفات بيجيلهم فلوس في حالة لو في حد من المتابعين بعت لهم فلوس، والفلوس دي اسمها دعم، وبيكون له صور مختلفة عبارة عن هدايا ليها قيمة معينة لكل نوع من الهدايا شكل، ممكن تتحول لفلوس بعد كده وده زي اللي حصل معايا والفلوس اللي معايا من خلال هدايا التيك توك.

س: وهل تلك المنصة متاحة للكافة بحيث يمكن لأي شخص الدخول عليها وإنشاء حساب خاص عليها والتعامل مع المحتوى الذي تقدمه؟

ج: أيوة لكن علشان الحساب يكون عنده صلاحية إنه يعمل بث مباشر، أو إنه يدخل حولات لازم يكون عدد المتابعين بتوعه وصل الألف متابع لكن أقل من كده ميقدرش غير إنه يرفع فيديوهات من خلال الحساب بتاعه.

س وما هي كيفية عمل تلك المنصة من خلال ذلك التطبيق؟

ج التطبيق ده تحمله على التليفون ويفتح لما يدوس عليه، ولازم علشان أدخل عليه أكون مشغله نت سواء واي فاي أو من الباقة، الخاصة بالشريحة بتاعة تليفوني.

س: وما هو الهاتف الذي كنت تستخدميه في الدخول على ذلك التطبيق والتعامل معه؟

ج: كنت بدخل من خلال التليفونين بتوعي سواء الآيفون أو التاني من اللي اتمسكوا معايا، لكن أكثر تليفون كنت بستخدمه في الدخول على التيك توك والتعامل مع حسباتي الآيفون اللي اتمسك معايا.

س: كم عدد حساباتك الخاصة على منصة التيك توك والفيس بوك واليوتيوب؟

ج: عندي حساب واحد على كل منصة

س: وما هي بيانات هذين الحسابين واسم المستخدم الخاص بكليهما؟

ج الحساب بتاعي اللي علي الفيس بوك باسم / لوشا the lion.

س: ومن القائم على إنشاء تلك الحسابات، وإدارتها ؟

ج: أنا

س: وهل كان يشاركك أحد في استخدامها؟

ج: لا

س: من متى أنشأت تلك الحسابات على وجه التحديد؟

ج: أنا عملت الحسابات دي من سنتين ونصن وكلها مكنتش بتجيب فلوس في الأول، بس من فترة بدأت في البث المباشر " اللايف" أو الجولات اللي بتتعمل والمتابعين اللي بيكونوا موجودين وقت اللايف بيبعتوا حاجه اسمها دعم لصاحب اللايف، ولو هو محبوب بيدعموه والدعم بيكون عبارة عن هدايا بيبعتوها لصاحب الحساب، والهديا دي بتكون بفلوس كتير ويقدر بعد كده صاحب الحساب إنه يحول الفلوس كاش من خلال المحفظة اللي هو رابطها على حسابه على التيك توك زي ما أنا عامله، وبالنسبة للفيس بوك واليوتيوب فالفلوس بتاعتها بتيجي عن طريق زيادة نسب المشاهدة على الفيديوهات بتاعتي وكده.

س: وما هو المقصود بالجولات وما هي طريقة عملها والتفاعل معها؟

ج: الجولات دي حاجه جوة اللايف؛ وهي عبارة عن إن الشخص اللي طالع لايف بيدوس على خانة اسمها مضيفين ويظهر له أسماء الناس اللي فاتحين لايف في نفس الوقت على التيك توك أو الناس اللي صاحب الحساب بيتابعهم، وبيختار اللي هو عاوز يدخل معاه في جوله، أو تحدى ولو الشخص الثاني قبل إنه يدخل الجولة، يبدأوا يتنافسوا مين اللي هيجيله داعمين أكثر، واللي بياخد هدايا أكثر من الداعمين اللي بيتابعوا اللايف هو اللي بيكسب الجولة، أو التحدي واللي يكسب التحدي يأخد هدايا من التيكتوك علشان كسب التحدي وبيكون كل مكسبه من الهدايا اللي خدها من الداعمين بس واللي بتتحول بعد كده لفلوس على كاش.

س: وما المقصود بالهدايا أو الدعم الذي أشرت إليه بأقوالك ؟

ج: الهديا دي عباره عن رموز بأشكال مختلفه كل رمز له قيمة معينه، وبتتحول لفلوس يمكن سحبها، والمفروض إن المتابع اللي هيقدم دعم الدعم ده أو الهدية بيشتريها من خلال فلوس بيشحن بها محفظته أو الفيزا اللي هو رابطها بالحساب بتاعه على التيكتوك، وبعد كده بيقدر يحولها لهدايا ويبعتها لصاحب اللايف اللي هو عاوز يدعمه.

والهدايا دي ليها أشكال وقيم مختلفة أقل حاجه فيها يتكون الوردة، ودي بتدي صافي لصاحب اللايف ربع جنيه، وفيه القلب بيدي حوالي ۱۰۰ نقطة وصاحب اللايف بيكون نصيبه منها حوالي ٢٠ جنيه، وفيه صدفيه بتدي ۲۰۰ نقطة وبيكون نصیب صاحب اللايف منها ٤٥ جنيه، وفيه القطر بتدي ۱۰۰۰ نقطة وبيكون نصيب صاحب اللايف منها ٣٠٠ جنيه ، وفيه الحوت بتدي ۱۲۰۰ نقطة وبيكون نصيب صاحب اللايف منها ٥٥٠ جنيه ، وفيه حوت مدينة المستقبل بتدي ٦٠٠٠ نقطة وبيكون نصيب صاحب اللايف منها ٢٥٠٠ جنيه ، وفيه الأسد بتدي ۳۰۰۰۰ نقطة وبيكون نصيب صاحب اللايف منها ٧٠٠٠ جنيه ، وفيه اليونيفرس وبيكون نصيب صاحب اللايف منها ١٠٠٠٠ جنيه .

س: وما هي كيفية تحويل تلك الهدايا إلى أموال تقديه؟

ح الهدايا لما بتتبعت لصاحب اللايف بتدخل في حسابه على التيك توك بقيمتها بعملة الدولار فيبان في الحساب بتاع التيك توك الرصيد الخاص بالشخص وبعد كده يحولها على المحفظة بتاعته ويسحبها.

بعد القبض عليه.. بيان من الداخلية بشأن البلوجر "لوشا"

البلوجر لوشا لوشا اعترفات البلوجر لوشا قضية البلوجر لوشا

رابط مختصر