المتهم بالتعدي على أسرة بالشيخ زايد: "إخواتي كانوا بيتفسحوا وأبويا خبط المجني عليهم" (خاص)

حملت التحقيقات مع الملاكم المتهم بالتعدي على أسرة في منطقة الشيخ زايد، تفاصيل جديدة بشأن الواقعة، مؤكدًا أنه لم يكن يعرف أن والده كان موجودًا في مكان الواقعة عند نادي “بيفرلي هيلز”، وأنه علم لاحقًا أن والده صدم المجني عليهم بسيارته.

وتستكمل “تليجراف مصر” نشر نص التحقيقات مع المتهم في القضية التي تقرر تأجيل أولى جلساتها إلى 29 نوفمبر الجاري، للنطق بالحكم، وجاءت أقوال المتهم كالتالي:

س: ما سبب ومناسبة تواجد سقيقيك (علي وعاصم) بالزمان والمكان سالفي الذكر تحديدًا (نادي بيفرلي هيلز)؟

ج: كانوا بيلفوا بالعربية عادي وبيتفسحوا.

س: وهل ثمة حوار دار بين شقيقيك والمجني عليهما سالفي الذكر؟

ج: أيوة.

س: وما طبيعة مضمون ذلك الحوار؟

ج: بالليل في اليوم دا كان إخواتي علي وعصام بيلفوا بـ"الجولف كار"، وكانوا قريبين من بيت حازم، ولما كانوا بيلفوا لقوا حازم وقريبة سعيد بينادوا عليهم، وبعدها إخواتي راحوا لهم بعد كدا، سعيد فضل يتكلم مع إخواتي ويقول لهم: "اللي انتوا بتعملوه مع حازم دا مينفعش"، وإخواتي قالوا له: "إحنا ماعملناش أي حاجة". 

فضل سعيد يهددهم لأنه أكبر منهم، ويقول لهم: “لو حاجة ثانية حصلت لحازم أنا هزعلّكم”، بعد كدا، إخواتي قالوا لهم: "إحنا لازم نمشي دلوقت علشان المفروض كانوا هيروحوا يجيبوا أخويا الثالث محمود من عند (بيفرلي هيلز). سعيد وحازم قالوا لهم: "تمام ماشي، روحوا هاتوا أخوكم وإحنا هنكمل كلامنا هناك عند نادي بيفرلي هيلز".

س: ما الذي حدث عقب ذلك؟

ج: إخواتي علي وعصام مشيوا وسابوهم، وكلموني وحكوا لي اللي حصل بينهم.

س: وهل قص عليك شقيقك ما حدث بينهما وبين المجني عليهم سالفي الذكر آنذاك؟

ج: أيوة.

س: وما رد فعلك تجاه ما قصه عليك سالفو الذكر تحديدًا؟

ج: أنا قلت لهم خلاص، أنا هروح نادي بيفرلي هيلز علشان أحل معاهم الموضوع وأتفاهم معاهم، وانتوا روحوا بيتنا.

س: وهل استجاب شقيقاك المتهمان علي وعصام للطلب سالف الذكر؟

ج: أيوة، هما فعلًا روحوا بيتنا.

س: وهل كان شقيقاك سالفا الذكر متواجدين بمكان الواقعة تحديدًا الكائن في نادي بيفرلي هيلز؟

ج: لا.

س: وكيف وقفت على ذلك؟

ج: علشان أنا قلت لهم إن أنا هقابل سعيد وحازم وأتفاهم معاهم، وانتوا روحوا بيتنا.

س: وهل تقابلت مع المجني عليهما سالفي الذكر؟

ج: أيوة.

س: وما ظروف تقابلك مع المجني عليهما سالفي الذكر تحديدًا؟

ج: أنا فعلًا رحت النادي علشان أتكلم معاهم، وفعلًا سعيد وحازم جم عند النادي، وأنا اتقابلت معاهم أمام بوابة النادي.

س: متى وأين حدث ذلك تحديدًا؟

ج: أمام نادي بيفرلي هيلز الساعة 9 مساءً بتاريخ 15 أكتوبر 2025.

س: وما سبب ومناسبة تواجدك بالمكان والزمان سالفي الذكر؟

ج: أنا رحت هناك علشان أتكلم مع سعيد وحازم وأتفاهم معاهم وأحل المشكلة بينهم وبين إخواتي علي وعصام.

س: وهل ثمة أي حوار دار بينك وبين المجني عليهما سالفي الذكر بمكان الواقعة تحديدًا آنذاك؟

ج: أيوة.

س: ومع من تحدثت تحديدًا؟

ج: أنا اتكلمت مع سعيد بس علشان هو الكبير، ومتكلمتش مع حازم.

س: وما هو مضمون ذلك الحوار تحديدًا؟

ج: أنا اتكلمت مع سعيد وقلت له: "مينفعش، وانت كبير كدا إنك تتخانق وتهدد إخواتي، وهما صغيرين"، سعيد قال لي: “وهم مينفعش اللي هما بيعملوه مع قريبي حازم دا”، اشتد الكلام بينا، وبعدين سعيد زقني في صدري، وأنا زقيته برضو.

س: ما مدى تطور ذلك الحوار تحديدًا؟

ج: شدينا مع بعض في الكلام وزقينا بعض، ومسكنا تي شيرتات بعض.

س: وهل كان برفقتك شخص آخر عند تقابلك مع المجني عليهما سالفي الذكر؟

ج: لا، كنت لوحدي.

س: وهل ثمة أي تعدٍ صدر منك نحو المجني عليهما سالفي الذكر تحديدًا آنذاك؟

ج: أيوة.

س: وكيف كان ذلك التعدي تحديدًا؟

ج: سعيد بدأ الأول وزقني في صدري، وأنا زقيته برضو، ومسكنا تي شيرتات بعض.

س: ومع مَنْ تحديدًا كان ذلك التعدي؟

ج: أنا وسعيد، وملمسناش حازم خالص.

س: وهل سددت لأي من المجني عليهما ضربات تحديدًا؟

ج: أنا سددت دفعة خفيفة على صدر سعيد بعد ما هو دفعني، بسبب إننا شدينا مع بعض في الكلام.

س: وكم عدد الضربات التي كلتها إليهما تحديدًا؟

ج: ضربة واحدة.

س: وكيف كلتها إليه تحديدًا؟

ج: ضريته ضربة بكف إيدي.

س: وأين استقرت تلك الضربات تحديدًا؟

ج: في صدره.

س: وهل نتج ثمة إصابات جراء ذلك التعدي تحديدًا؟

ج: لا، علشان إحنا بعدها مسكنا في تي شيرتات بعض، وما حصلش أي حاجة، دي كانت دفعة خفيفة نتيجة الشد في الكلام.

س: وما هي المسافة الفاصلة بينك وبين المجني عليهما تحديدًا؟

ج: كنا واقفين وشنا في وش بعض وقريبين من بعض، وحازم كان على يميني.

س: وهل صدر من المجني عليهما سالفي الذكر ثمة استغاثة جراء ذلك التعدي تحديدًا؟

ج: أيوة.

س: وما طبيعة تلك الاستغاثة؟

ج: حازم اللي كان واقف معانا نده على أبوه وزعق، وأنا فوجئت بيه جاي عليا جري وبيعدي الشارع، وأول ما شوفته وحسيت إنه جاي يضربني، سبتهم وجريت وهربت.

س: وما هو دور المجني عليه المتواجد برفقتهم المدعو أحمد محمد عبدالخالق (والد حازم) بشأن الواقعة تحديدًا؟

ج: أنا فوجئت بيه جاي عليا جري، وأما شوفته، وحسيت إنه جاي يضربني، سبتهم وجريت وهربت.

س: وما مدى علمك بكون المجني عليه أحمد سالف الذكر متواجدًا بمحيط الواقعة؟

ج: لا، ما كنتش عارف، أنا فوجئت بيه جاي عليا.

س: وما هي حالة الضوء والرؤية تحديدًا آنذاك؟

ج: الإضاءة والرؤية كانت كويسة وواضحة، علشان في أعمدة إنارة بالشارع.

س: وما حالة الطريق من حيث المارة تحديدًا آنذاك؟

ج: الناس كانوا ماشين عادي.

س: وهل كان ثمة أي كاميرات بمحيط الواقعة وثقتها تحديدًا؟

ج: معرفش، بس الأكيد فيه كاميرات طبعًا عند النادي.

س: وهل كان ذلك التعدي عن سبق إصرار وترصد؟

ج: لا خالص، أنا أصلًا رايح علشان أقابل المجني عليهم وأتفاهم معاهم ونحل الموضوع، وبعد كدا مسكنا أنا وسعيد في بعض.

س: وهل كان بحوزتك أي أسلحة أو أدوات ظاهرة أو مخبأة حال قيامك بواقعة التعدي عليهما تحديدًا آنذاك؟

ج: لا.

س: وهل قمت بمواصلة التعدي عليهما؟

ج: لا خالص، أنا وسعيد بعد ما مسكنا تي شيرتات بعض وزقينا بعض، وحازم نده على أبوه، أنا سبتهم وجريت.

س: وما هي المدة الزمنية المستغرقة من مكان تقابلك مع المجني عليهما إلى قيامك بالتعدي عليهما؟

ج: خمس دقايق تقريبًا.

س: وما مدى علمك بوجود المتهم مصطفى (والد الملاكم المتهم) سالف الذكر بمحيط الواقعة مترصدًا للمجني عليهم ومستقلًا للسيارة المضبوطة والمستخدمة في ارتكاب الواقعة؟

ج: معرفش خالص إن أبويا كان هناك وفوجئت باللي حصل بعد كدا.

س: وما تعليلك لوجوده بمكان الواقعة وارتكابه الواقعة على النحو المبين بالتحقيقات؟

ج: معرفش.

س: وما الذي صدر منك تحديدًا آنذاك؟

ج: أنا سبتهم وطلعت أجري من المكان خالص.

س: وما هي ظروف تقابلك مع المتهم المدعو مصطفى سالف الذكر تحديدًا؟

ج: أنا ما قابلتهوش خالص، ومعرفش إنه كان موجود في مكان الواقعة أصلًا، وعرفت بعد كدا إنه خبط فيهم بالعربية.

س: متى وأين تم ضبطك تحديدًا؟

ج: أنا رحت وسلمت نفسي في قسم ثاني الشيخ زايد علشان عرفت إن الشرطة بتدور عليّا للضبط والإحضار الصادر ضدي من النيابة العامة، وحكيت لهم اللي حصل، وجابوني هنا النهاردا.

س: من كان برفقتك آنذاك؟

ج: أنا رحت القسم لوحدي.

س: ومن القائم بضبطك تحديدًا وكم عددهم وما هي بياناتهم؟

ج: دخلت على المباحث وحكيت لهم اللي حصل، ومش فاكر عدد الضباط.

س: وما الذي دعا سالفي الذكر لضبطك تحديدًا آنذاك؟

ج: علشان أنا حكيت لهم كل اللي حصل وجابوني على القسم.

س: وهل ثمة حوار دار بينك وبين القائمين بالضبط؟

ج: أيوة.

س: ما مضمون ذلك الحوار تحديدًا؟

ج: أنا حكيت للشرطة كل اللي حصل، قبضوا عليا وجابوني هنا النهاردا، وهو دا كل اللي حصل.

س: وهل تم تفتيشك؟

ج: أيوة.

س: وما الذي أسفر عنه ذلك التفتيش؟

ج: مافيش معايا أي حاجة خالص.

س: ما قولك فيما جاء بمحضر الضبط المحرر والمؤرخ في 18 أكتوبر 2025 الساعة 11:45م؟

ج: كل اللي حصل حكيته بالتفصيل دلوقت.

س: وما تعليلك لما شهد به كل من المجني عليهما حازم وسعيد حال سؤالهما بتحقيقات النيابة العامة؟

ج: كل اللي حصل حكيته بالتفصيل دلوقت، أنا مضربتش حد، ومعرفش إن أبويا كان في المكان أصلًا.

س: وما تعليلك لما قرره كل من المتهمين مصطفى عصام الدين علي عبداللطيف (والدك)، ونجلاه “علي وعصام” حال استجوابهم بتحقيقات النيابة العامة؟

ج: كل اللي حصل حكيته بالتفصيل دلوقت.

س: وما تعليلك لما أثبته سالف الذكر بمحضر الضبط المحرر بمعرفته؟

ج: أنا فعلًا رحت وسلمت نفسي في القسم وحكيت كل اللي حصل.

س: وما تعليلك لما ثبت بمحضر مشاهدة المقطع المرئي المصور والموثق للواقعة محل التحقيق والمستخلص من مكان الواقعة تحديدًا؟

ج: أنا مكنتش أعرف إن أبويا في المكان أصلًا، وعرفت بعد كدا إنه خبط المجني عليهم بالعربية.

س: هل لديك ثمة سوابق جنائية؟

ج: لا.

س: هل لديك اسم شهرة؟

ج: لا.

س: أنت متهم بالتعدي بالضرب على المجني عليه المدعو سعيد إسماعيل عمدًا مع سبق الإصرار والترصد، محدثًا به ما ألمّ به من الإصابات الثابتة بالتقرير الطبي المرفق بالأوراق والثابتة بمناظرة النيابة العامة، فهل هذا صحيح؟

ج: محصلش، أنا وهو زقينا بعض وشدينا بعض في التيشيرتات، لكن مفيش أي إصابات.

س: هل لديك أقوال أخرى؟

ج: لا.

لقراءة أول جزء من التحقيقات:

"خناقة عيال"، أقوال الملاكم المتهم بالتعدي على أسرة بالشيخ زايد (خاص)