أيمن منصور يودع محمد صبري بكلمات مؤثرة

قال أيمن منصور كابتن نادي الزمالك الأسبق إن الراحل محمد صبري كان علامة مميزة في تاريخ القلعة البيضاء، سواء داخل الملعب أو خارجه.

وأكد منصور في تصريحات لراديو "صوت الزمالك": فراقه ورحيله صعب بالنسبالنا كلنا ربنا يصبر أسرته ويصبرنا ويصبر جمهور الزمالك اللي كان بيحبه وبيقدره.

وأضاف: آخر تواصل بيني وبين محمد صبري كان من حوالي شهر، خلال برنامجه، وقتها اتكلمنا وضحكنا وكان كالعادة في قمة التواضع.

وتابع منصور: "محمد صبري كان بيتعامل مع كل ضيوفه في البرنامج بشكل محترم وبأخلاق عالية وكان دايمًا شخص مرحاب وطيب وبيحب الناس".

كما استعاد ذكرياته معه داخل الملعب قائلاً: تصويبات محمد صبري كانت رائعة، وكان معروف بتسديداته القوية من خارج الـ18 وسجل أهداف جميلة كتير، وكمان سجل أكتر من هدف في الأهلي، ودي حاجة جمهور الزمالك عمره ما هينساها"

واختتم منصور: محمد صبري مش بس لاعب كبير ده كان إنسان محترم وخلوق، وهيفضل علامة في تاريخ الزمالك".

حقيقة إقامة حفل داخل نادي الزمالك

وفي سياق متصل، كشف مصدر داخل نادي الزمالك لـ"تليجراف مصر" عدم وجود أي حفلات أو فعاليات ترفيهية داخل مقر النادي خلال هذه الفترة، مؤكدًا أن ما يُنشر عبر السوشيال ميديا بشأن إقامة حفل بعد وفاة الكابتن محمد صبري غير صحيح على الإطلاق.

بعد إعلان الحداد على محمد صبري، حقيقة إقامة حفل داخل نادي الزمالك