أسرة عقار الخليفة المنهار: "قاعدين في الشارع وكل حاجتنا تحت الركام"

في مأساة جديدة تهز منطقة الخليفة بوسط القاهرة، انهار منزل قديم في شارع الفلكي حارة 11، ليتحول في لحظات إلى تراب قضى على حياة الأب، وأصاب الأم بإصابات بالغة، تاركًا الأسرة بلا مأوى تعيش في الشارع منذ يوم الحادث. 

أسرة عقار الخليفة المنهار 

والتقت "تليجراف مصر" مع فاطمة حسين، ابنة صاحب العقار الراحل وقالت: “إحنا كنا عايشين يوم عادي فجأة البيت اتقلب علينا، مفيش أي صوت، ولا إنذار، كنت في المطبخ بسخّن أكل لابني، ولما رجعت لقيت نص البيت واقع وولادي بيصرخوا".

وتابعت روايتها: “السلم اختفى ونزلت أنا وولادي من جنب الحيطة لقينا الناس بتدور على أبويا وأمي جوه الركام، أمي لما طلعت وشها مجروح، وإيديها ورجليها مصابة، كان شكلها صعب جدًا، وأبويا قعدوا يدوروا عليه أكتر من ساعة".

وأضافت: “أبويا ما ماتش في اللحظة، نقلوه المستشفى، وقعد يومين، وكانوا هيدخلوه عملية، روحنا يوم الخميس الصبح لقيناهم بيقولوا مات".

وأكملت فاطمة: “إحنا قاعدين في الشارع، وابني في تانية ثانوي، لا بيذاكر ولا بيروح مدرسة، كل حاجته تحت الركام، حتى الأجهزة الكهربائية والعفش كله اتبهدل".

صوت الزوجة المصابة: كنت بين الحياة والموت

واستطردت زوجة المتوفى (الأم)، التي تعرضت لإصابات خطيرة، حديثها: "كنت بعمل حاجة بسيطة في أوضتي وفجأة حسيت بالأرض بتقع لقيت نفسي تحت الركام".

وتابعت: "نقلوني إلى المستشفى وقعدت 3 أيام بين الحياة والموت، وبعدها قالولي إن جوزي توفى، ومن يوم الحادث، وإحنا 5 أفراد قاعدين في الشارع". 

واختتمت الأم حديثها: “عايزين شقة تجمعنا نعيش فيها زي الناس، نربي فيه أولادنا ونبدأ حياتنا من جديد، إحنا مش طالبين غير مكان نعيش فيه بدل الشارع".

اقرأ أيضًا:

"إني أتنفس تحت الأنقاض"، شاهد عيان على انهيار عقار الخليفة يكشف كواليس إنقاذ مُسن

"كنت بعمل الفطار سمعت صوت رزعة"، شاهدة عيان تروي تفاصيل إنهيار عقار الخليفة