إبراهيم صلاح: الزمالك في أزمة كبيرة ونحتاج لتكاتف الجميع للخروج منها

أكد إبراهيم صلاح، نجم الزمالك السابق، أن نادي الزمالك يمر بأزمة كبيرة تستدعي تضافر جهود جميع المحبين للنادي، من مجلس إدارة ورؤساء سابقين ورجال أعمال وجماهير، للخروج من الوضع الحالي.

وقال صلاح عبر برنامج "الناظر" على قناة النهار: “الواحد بقى يحزن، كل يوم نصحى على خبر أسوأ من اللي قبله، ومفيش أي تحسن خالص، وأنا واحد من الناس بقيت محبط من اللي بيحصل في النادي، وشايف الوضع كارثي”.

وأضاف: “الناس كلها قاعدة، كل يوم بيان واستغاثة، وكان أولى بينا إننا نتجمع ونتكاتف ونصفي الأمور بينا وبين بعض، لكن ده ما بيحصلش، وإحنا راحين كل يوم للأسوأ”.

من جانبه، أشار الإعلامي أحمد شوبير إلى أن محاولات بعض نجوم النادي مثل أيمن يونس للتقريب بين الأطراف غالبًا ما تتلاشى سريعًا، وقال: “بعد 24 ساعة تلاقي كل الكلام ده زي ما بيقولوا في المثل البلدي: كلام الليل مدهون بالزبدة، يطلع عليه النهار يسيح”.

وأضاف إبراهيم صلاح: “دي هي مشاكلنا، حتى الأزمة الأخيرة، الناس جوه الزمالك بتحارب بعض، والموضوع بقى صعب جدًا. الواحد خايف ييجي يوم ونقول مفيش زمالك خلاص، وده شيء صعب قوي”.

وأكد أن المشاكل متكررة منذ انضمامه للزمالك عام 2008، مع تغيّر مجالس مؤقتة ولجان متتابعة، مشيرًا إلى أن الوضع لا يُرى إلا في الزمالك فقط.

وختم صلاح حديثه بالدعوة لتوحيد الصفوف: “نتمنى الناس تقعد وتتجمع، ونشوف الأصلح للنادي، ونحط إيدينا في إيدين بعض، ونحقق حاجة كويسة تليق باسم نادي كبير زي الزمالك، نادي كبير ميستاهلش كل اللي بيحصل له”.