"دخل علينا الأوضة"، صاحب "شقة بدر" يروي تفاصيل اقتحام أتوبيس مدرسة لمنزله

شهد حي النرجس بمدينة بدر، في الساعات الأولى من صباح اليوم، واقعة مروعة بعدما اصطدم أتوبيس تابع لإحدى المدارس الدولية بإحدى الشقق السكنية، مخترقًا غرفة النوم بشكل كامل، ما أسفر عن تهدم جدار الغرفة وإصابة قاطني الشقة بحالة من الهلع.

صاحب "شقة بدر" يروي تفاصيل اقتحام أتوبيس مدرسة لمنزله

يروي محمد، صاحب الشقة المتضررة، تفاصيل الحادث، لـ"تليجراف مصر"، قائلًا: “كنت نايم في أوضة النوم حوالي الساعة 6 صباحًا، وفجأة صحيت على صوت رهيب كإنه انفجار أو قنبلة، لقيت الدنيا مليانة تراب وغبار، والجدار وقع، ومراتي سحبتني بسرعة لإن الحيطة كانت ممكن تقتلني”.

وأضاف: "كنت حاسس إني بحلم ومش مستوعب اللي حصل، أول حاجة عملتها إني جريت أتطمن على بنتي مريم، عندها 4 سنين، لقيتها ماسكة ودانها من الخضة وبتعيط".

وأشار محمد إلى أن سكان العقار بأكمله نزلوا إلى الشارع في حالة ذعر، قائلا: "كل أهل العمارة نزلوا من الخوف، وأنا اتصلت بوالدي ووالدتي ييجوا بسرعة لإني كنت في حالة صدمة".

صاحب شقة بدر: “أتوبيس المدرسة داخل علينا أوضة النوم”

وتابع: "لما خرجت أشوف اللي حصل، فوجئت بأتوبيس مدرسة داخل في أوضة النوم، والسواق قال لي مش معايا فرامل".

وأكد صاحب الشقة أنه تم الاتصال بالنجدة وتحرير محضر بالواقعة، مشيرًا إلى أن إدارة المدرسة لم تتواصل معهم إلا في اليوم التالي، وحتى الآن لم يتم عرض أي تعويض أو فتح باب تفاوض.

وأكمل: “إحنا مش طالبين غير حقنا، حق التلفيات وحق الخضة والهلع اللي اتعرضنا له.. إحنا كان ممكن نموت”.

من جانبه، قال والد محمد إن نجله اتصل بوالدته بعد صلاة الفجر بصوت مليء بالخوف، موضحًا: “كان بيكلم أمه وهو مخضوض جدًا، مسكت التليفون منه، قال لي الحقني يا أبويا.. أتوبيس دخل عليا أوضة النوم، وأنا بصراحة مكنتش مصدق”.

وأضاف بنبرة امتزج فيها الذهول بالألم: "قلت له يعني إيه أتوبيس يدخل أوضة النوم؟ دي أول مرة أشوف حاجة زي كده في حياتي، يعني إنت كنت مثلًا ماشي بالسرير في الشقة عكس يعني ودخل فيك الأتوبيس ولا كان المفروض تحط إشارة مرور برا البيت علشان إنت ع الطريق؟".

وطالب والد الأسرة المتضررة بتعويض عادل عن الخسائر المادية والتأثير النفسي الذي تعرضت له الأسرة، خاصة الطفلة الصغيرة.

اقرأ أيضًا..

دخل في السرير، أتوبيس مدرسة يقتحم شقة سكنية بمدينة بدر (صور)