عمرو زكي: حسام حسن يتعرض للظلم، واتحاد الكرة لا يحميه

أكد عمرو زكي أن مدرب منتخب مصر حسام حسن يتعرض للظلم من قبل اتحاد الكرة، مشددًا على أهمية دعم المنتخب قبل بطولة أمم أفريقيا 2025. 

وقال زكي في تصريحات مع برنامج الكلاسيكو: “اللي بيحصل مع حسام حسن ظلم، واتحاد الكرة مش بيحميه، وهو رمز كبير جدًا”.

وأضاف: “دور الإعلام لازم يكون لدعم المنتخب، إحنا بندعم الأندية أكتر من المنتخب، وكابتن حسن شحاتة كان بيتحارب بس وقت البطولة كنا بندعمه”.

وتابع نجم الزمالك السابق: “حسام حسن لما قال محترفين وربع ممكن يكون خانة التعبير مش أكتر، لكنه مش هيعمل إلا الصح، وهو مثلي الأعلى كرويًا، النهاردا مفيش الأهلي والزمالك، وحق الناس تشوف المنتخب وتفرح”.

وعن اللاعبين، أضاف زكي: “مصطفى محمد هو الأجدر بقيادة هجوم المنتخب أمام زيمبابوي، لو إمام عاشور جاهز، أكيد هو اللي يقود نص الملعب ويكون صانع الألعاب”.

كما رد على شائعات مرضه الأخيرة: “هناك أشخاص تعمدوا أذيتنا أنا وأهلي، والمعلومة ممكن تأذيني وتأذي أسرتي، وبنتي كانت بتصرخ قائلة: يابابا، هو مفيش غيرك كل شوية يقولوا كلام غلط، المصداقية هي اللي بتخلي أي حد يعرف إذا كنت هطلع للشاشة ولا لأ، محدش كان بيتصل بيا، وأنا بوصل للناس بسرعة”.