والد "عروس المحلة": "جوزها ربطها في السرير خلال شهر العسل" (خاص)

حصل "تليجراف مصر"، على نص أقوال والد روان محمد، ضحية زوجها داخل شقتها بمنطقة الشعبية في مدينة المحلة الكبرى، والتي عرفت إعلاميا بـ"عروس المحلة"، وجرى إحالته إلى محكمة الجنايات.

ورد في أمر إحالة المتهم للجنايات أنه قتل “روان محمد”، زوجته، عمدا دون سبق إصرار أو ترصد، بأن تعدى عليها طعنا بسلاح أبيض سكين، قاصدا قتلها فأحدث إصابتها الموصوفة بتقرير الصفة التشريحية والتي أودت بحياتها، كما أحرز سلاحا أبيض "سكين"، بدون مسوغ قانوني.

وجاءت أقوال والد القتيلة، "محمد عبد السلام" والذي توفي منذ أيام قليلة متأثرًا بمقتل نجلته كالتالي:

(س): ما صلتك بالمتوفاة لرحمة مولاها؟

(ج): أنا والد روان الله يرحمها

(س): ما هي بيانات نجلتك المتوفاة لرحمة مولاها تحديدا؟

(ج): بنتي اسمها "روان محمد عبد السلام محمد مصطفى"، كان عندها 22 سنة، متزوجة من المدعو "أحمد ع أ ع"، ومقيمة معه في مدينة المحلة في منطقة الشعبية لأنه أصلا من المحلة، بقالها سنة وخمس شهور ومخلفة منه طفل عنده خمس شهور وهي ربة منزل.

(س): ومن أين تعرفت نجلتك المتوفية لرحمة مولاها التي كانت تقيم برفقتك بمدينة بلقاس على زوجها سالف الذكر؟

(ج): هما كانوا زملاء في كلية تربية رياضية جامعة المنصورة من دفعة واحدة واتعرفوا على بعض في الكلية واتجوزوا بعد تخرجهم.

(س): وما معلوماتك بشأن واقعة وفاة نجلتك؟

(ج): أنا لسة معرفش أي حاجة عن تفصيلات الوفاة غير إن بنتي اتضربت وماتت بس أنا بتهم جوزها "أحمد ع أ ع"، إنه قتلها.

(س): وعلى أي أساس تتهم سالف الذكر بالتعدي على نجلتك وقتلها؟

(ج): لأن بنتي المباحث لقوها مضروبة في بيتها اللي عايشة فيه مع جوزها وهي وجوزها بينهم خلافات بقالهم سبع أيام وكل يوم بتتصل بأخوها عمر محمد عبد السلام تشتكي إنه بيكلم بنات عليها ومش مهتم بيها وإنه على طول بيضربها وبیشتمها وبيهينها ده بخلاف إنه سبق واعتدى عليها بالضرب المبرح وكان رابطها في السرير ومبهدلها في شهر عسلهم في إسكندرية وأنا اتدخلت وحليت الموضوع وقلت أصبر عليه وبعد الخلفة أكيد هيهدى ويراعي بيته وفضلت صابر عليه لحد ما قتلها.

(س): وما تفصيلات الخلافات التي بين نجلتك المتوفاة وبين زوجها "أحمد ع ع أاع" الذي تتهمه بقتلها؟

(ج): هو من أول شهر جواز بينهم بيضربها وبيبهدلها لدرجة إنهم وهما في شهر العسل في إسكندرية كان ضاربها ضرب مبرح لدرجة إنها رجعت بيتها في المحلة متورمة ومتعورة جامد وعرفت إنه كان رابطها في السرير واتعدى عليها ولما قعدت معاه اتصالحنا وقلت ما أخربش على بنتي في بداية حياتها.

وأخدت عليه وعد إنه يعاملها كويس وصالحتهم وفضلت على مدار السنة والخمس شهور تشتكي كل فترة من سوء معاملته وكانت بتخاف تكلمني وتحكيلي اللي بيعمله وتكلم عمر ابني تشتكيله عشان كانت عارفة إني لو كنت عرفت إنه رجع ضربها تاني كنت هطلقها من أحمد جوزها. 

(س): وما الذي دفعك للتيقن من توجيه الاتهام إلى زوج نجلتك المجني عليها المدعو "أحمد ع ع أاع" بقتلها؟

(ج): أنا تأكدت إنه قتلها بناء على اتصال تليفوني من دكتور طب شرعي طنطا وعرفت إنه جاب رقمي من المباحث وكلمني عشان أستلم جثمانها بعد ما عرفت إن النيابة نقلت الجثة هناك تتشرح وسألته هو بيكلمني ليه وهي عنده في الطب الشرعي وعرفت إنها ميتة بطعن سكينة.

وده غير إن جوزها أحمد مختفي من ساعة ما عرفت بالقصة دي ومش عارف أوصله وسألت عليه هو عند المشرحة قالولي لأ لأني بعت أخدت مراتي هناك عشان تفضل جنب الجثة لحد ما أروحلها لأني رنيت عليه هو وأبوه أكثر من مائة مرة وتليفوناتهم مقفولة ده غير إن روان الله يرحمها كلمت عمر ابني إمبارح الساعه ۱۱٫۳۰ باليل بلغته إنها مش طايقة العيشة مع جوزها ومش قادرة تتحمله وعايزاه يروح ياخدها يروحها بلقاس وابني قالها ميصحش خلي جوزك هو اللي يجيبك فقالتله خلاص هخليه يجيبني وعبد الرحمن اللي هو ابنها اللي عنده خمس شهور الصبح فكل ده يخليني أتهمه إنه قتلها بضربة سكينة زي الطب الشرعي ما بلغني ولأنه مختفي ومش عارف أوصله لحد دلوقتي.

(س): وما قولك فيما ثبت بمناظرة النيابة العامة لجثمان نجلتك من وجود جرح طعني بالبطن بها؟

(ج): ده يأكد صحة الكلام اللي بلغني بيه دكتور المشرحة اللي كلمني وبلغني إنها اتقتلت بطعن سكينة.