شقق وفيلات بـ89 مليون جنيه، اعترافات تنشر لأول مرة في قضية البلوجر شاكر محظور (انفراد)

شاكر محظور دلوقتي

A . .A

كشفت التحقيقات في قضية التيك توكر محمد شاكر المعروف على السوشيال ميديا بـ "شاكر محظور دلوقتي"، والمتهم فيها بنشر الفسق والفجور، تفاصيل جديدة وشهادات مهمة أدلى بها المتهم، وتم الكشف عنها لأول مرة.

انفراد بنص التحقيقات مع البلوجر شاكر

وتستكمل “تليجراف مصر”، نشر نص التحقيقات مع التيك توكر شاكر، والتي تقرر تأجيل أولى جلسات القضية إلى 11 يناير الجاري وجاءات كا التالي:

س: فور تقديم الداعم الهدية لك أو لأي شخص عبر البث المباشر، هل يتطلب الأمر قبول الهدية أم بمجرد إرسالها لك تصل لحسابك على تطبيق "تيك توك"؟
ج: هي بتوصل على طول على محفظة التيك توك بتاعتي في شكل نقاط زي ما قلت قبل كده.

س: قررت سلفًا أن شكل الهدايا وقيمتها مختلفة، وضح لنا ذلك الأمر؟
ج: فيه هدية زي الأسد بـ300 دولار بتساوي على التطبيق 30 ألف نقطة، وغيرها من الهدايا، ده بس اللي أنا فاكره دلوقتي.

س: ما هي كيفية تحويلك للنقاط اللي بتحصل عليها من خلال الهدايا لعملة نقدية؟
ج: النقاط دي بتبقى على محفظتي اللي على المنصة وأنا بحولها على الحساب البنكي.

س: هل بإمكانك تحديد العائد المادي عليك من خلال حصولك على تلك الهدايا؟
ج: الهدية لما بتوصل لي باخد نص قيمتها، في المثال اللي قلت عليه بتاع الأسد يوصل لي 150 دولار، يعني على محفظة تيك توك 15 ألف نقطة.

س: من واقع البحث عبر محرك البحث جوجل تبين أن منصة تيك توك بتحصل على ما يقارب 70% من قيمة الهدية، في حين قررت أنك بتحصل على 50%، فما تعليلك؟
ج: فعلاً الكلام ده صح بس ده للحسابات اللي لسه مبتدئة أو نسب مشاهدتها ودعمها قليلة، لكن نسب المشاهدة عندي عالية جدًا وبطلع لايف مدة طويلة، وده وصلني إن اللايف بتاعي اسمه لايف برو (بروفيشنال).

س: وضح لنا الفارق بين البث المباشر العادي والبث المباشر الاحترافي؟
ج: اللايف العادي أي حد بيطلع لايف ومش شرط وقت معين ولا أيام معينة ولا عدد متابعين ولا داعمين، لكن اللايف البروفيشنال بيتطلب إني أطلع لايف كل يوم ولساعات طويلة وعدد متابعين كبير وكمان عدد داعمين كتير.

س: هل بإمكانك الوقوف على الأشخاص الداعمين لك؟
ج: الداعمين عندي كتير جدًا، أعرف منهم ناس قليلة جدًا، على سبيل المثال اللي فاكرهم دلوقتي عزيز صديقي، هو منشئ الحساب اللي أنا شغال عليه دلوقتي وده من أكبر الناس الداعمين لي، وفيه واحد اسمه المستشار ده مصري، والسوالي ده واحد إماراتي.

س: هل تقف على مصدر أموال هؤلاء الأشخاص؟
ج: كل واحد فيهم شخص معروف، واحد شغله عقارات وأراضي، وواحد مستشار، وعزيز بيشتغل أمين صندوق جمعية عمومية في الكويت.

س: أوصف لنا من وجهة نظرك طبيعة المحتوى اللي بتقدمه عبر منصات التواصل الاجتماعي؟
ج: محتوى اجتماعي كوميدي.

س: من خلال ما رصدته النيابة العامة من مقاطع خلال ظهورك عبر البث المباشر وظهورك مع سيدات وتضمن تلك المقاطع إيحاءات وتلميحات جنسية مخالفة للعادات والقيم الأسرية المصرية، فما تعليقك؟
ج: الفيديوهات المعروضة دي مش اللايف الحقيقي نفسه، وبالإضافة لكده حتى لو حد ظهر معايا مش بيبقى من المحتوى بتاعي ولا بيقعد معايا اللايف كله، أنا بطلع من 6 لـ8 ساعات لايف، واللي بيظهر معايا لو شكله ممكن يجيب لي مشكلة بقفله فورًا علشان حاجتين: أولًا ده مش المحتوى بتاعي، ثانيًا التيك توك بيقفل أي محتوى جنسي ومش هخاطر بالحساب بتاعي، وفيه فيديو واضح إني خرجت من اللايف.

س: كافة المقاطع المعروضة عليك حاليًا، هل أنت الشخص الظاهر بها؟
ج: أيوه أنا.

س: ذكرت أن المقاطع المعروضة أجزاء مقتطعة من البث المباشر الخاص بك، فهل تقوم بحفظ أو تسجيل البث؟
ج: أنا اللايف بتاعي 8 ساعات أكيد مش هعرف أسجله.

س: ما كيفية ظهور تلك المقاطع عبر الشبكة المعلوماتية؟
ج: الناس بتسجل من اللايف وبتنشر وبتتقطع براحتها.

س: هل بإمكانك إلغاء خاصية تسجيل البث المباشر؟
ج: لا، أي حد يقدر يسجل، وأنا معرفش مين اللي سجل.

س: تبين من خلال المقاطع المرصودة تكرار ظهورك خلال البث المباشر مع سيدات فقط وظهورهن بشكل مخالف للقيم والعادات المصرية، فيما تفسر ذلك؟
ج: أنا بطلع لايف بقالي 3 سنين كل يوم، وفي اليوم من 6 لـ8 ساعات، الناس اللي شكلها مش كويس وبتطلع معايا بيبقى ظهورها ثواني ومش بتكمل، ولو حد طلع مرة مش بيطلع معايا تاني، وأنا مش هتحاسب على الضيف اللي طالع معايا.

س: اشرح لنا كيفية ظهورك مع الغير من خلال خاصية البث المشترك على منصة تيك توك؟
ج: الناس ممكن تطلب تدخل معايا لايف، بس أنا قافل الخاصية دي علشان أنا مشهور وعندي متابعين كتير، ولو كلهم ضغطوا طلب لايف مرة واحدة اللايف هيقفل، علشان كده أنا قافلها، لكن فيه خاصية تانية اسمها اختيار عشوائي، ساعات بدخل مع ناس طالعين لايف في نفس الوقت، أحيانًا أعرفهم وأحيانًا لا.

س: قررت في تحقيقات النيابة في القضية رقم 13830 لسنة 2025 جنح التجمع الأول أن حسابك الحالي على منصة تيك توك باسم صديقك الكويتي، فما سبب تسليمه لك الحساب؟
ج: هو صديقي وكان بيدعمني على حسابي القديم، ولما الحساب اتحظر هو اداني الحساب علشان أطلع منه لايف، وعزيز ده مدير أعمالي في الخليج وأنا عامله توكيل وهو عاملي توكيل هنا في مصر.

س: قررت أيضًا أن حسابك على تيك توك ما زال مرتبط بحساب صديقك الكويتي وأن كافة الأرباح تتحول على حسابه بالكويت، فما مدى ثقتك به؟
ج: هو صديق للعيلة ومدير أعمالي ومسئول عن كل الأرباح، وأنا عامله توكيل وهو عاملي توكيل، وده كله ثقة بينا.

س: هل لهذا الشخص دور في إدارة صفحتك على تيك توك؟
ج: لا.

س: هل صحيح أن كافة التحويلات تتم أولًا على حساب صديقك ثم تصل إليك في مصر؟
ج: أيوه ده اللي بيحصل.

س: هل اشتبه في تعاملاته المالية؟
ج: لا، هو قدم التوكيل وورق رسمي إنه مدير أعمالي ومسئول عن الأرباح.

س: ما الفائدة العائدة عليه من ذلك؟
ج: مفيش أي فائدة، هو صديقي ومن أوائل الناس اللي بتدعمني.

س: وضح لنا طبيعة التوكيلات بينكما؟
ج: أنا عامله توكيل بإدارة أعمالي في الخليج وهو عاملي توكيل عام، وكل ده موثق في الشهر العقاري والخارجية.

س: تبين أن التحويلات البنكية الخاصة بأرباحك لا ترد مباشرة من تيك توك وإنما من حساب عبد العزيز سعود شديد العدواني؟
ج: أيوه فعلاً.

س: تبين أنه يمكن التحويل عبر باي بال أو بايونير، لماذا لم تستخدم تلك الوسائل؟
ج: الحساب على المنصة ظاهر عندهم إنه مرتبط بحساب عزيز، ولو غيرت أي بيانات الحساب البنكي الصفحة كانت هتقفل، فكان الحل إن الفلوس تتحول له وهو يحولها لي.

س: كيف غيرت اسم الحساب والرابط إذا كان لا يجوز التغيير؟
ج: الاسم والرابط ينفع يتغيروا، لكن التحويل البنكي لا، التيك توك بيعتبر ده اختراق ويقفل الصفحة.

س: سبق وأن قررت أن أرباحك كانت ترد لحساب البريد المصري؟
ج: أيوه بس ده من حساب قديم واتقفل ومبقاش عليه أي حاجة دلوقتي.

س: وضح لنا حسابك بالبريد؟
ج: مش فاكر رقمه، فتحته في فرع المنصورة.

س: ثبت أن لديك حسابات بالبنك الأهلي والبنك التجاري الدولي؟
ج: البنك الأهلي فرع إدفو أسوان فتحته سنة 2017، والبنك التجاري الدولي فرع مدينتي من حوالي 3 أسابيع، ومش فاكر أرقام الحسابات.

س: علل التناقض بشأن مستأجر الوحدة السكنية؟
ج: في الأول أنا اللي كنت مأجرها شهر بشهر، وبعد ما ربنا كرمني مدير أعمالي بقى هو اللي بيأجرها سنة بسنة باسمه.

س: من القائم بسداد الإيجار؟
ج: أنا.

س: قيمة الإيجار؟
ج: 50 ألف جنيه في الشهر علشان مفروشة.

س: الهدف من استئجار الوحدة؟
ج: سكن وتصوير اللايف.

س: هل تعتبر استوديو؟
ج: لا، دي شقة سكن وبصور في الصالة.

س: بخصوص استقالتك من وزارة الداخلية؟
ج: قدمت استقالتي بإرادتي، والكلام اللي في الفيديو مفيش عليه دليل، وأنا مش برد.

س: وضح الوحدات السكنية الخاصة بك؟
ج:
1- شقة مدينتي 7 مليون تقريبًا، سددت 4 مليون
2- شقة مدينتي تحت الإنشاء 8 مليون، سددت 1.7 مليون
3- بنتهاوس الساحل 16 مليون، سددت 2 مليون
4- فيلا O West بـ54 مليون، سددت 9 مليون

س: من القائم بالسداد؟
ج: أنا.

س: ما مصدر الأموال؟
ج: مليش أي مصدر غير التيك توك.

س: سبب اختلاف محل الإقامة؟
ج: غيرت بطاقتي على شقة واستلمتها قريب، وكنت ساكن إيجار.

س: قيمة التشطيب؟
ج:حوالي 4 مليون جنيه.

س: أنشأت شركة؟
ج: أيوه بس مش فاكر السجل.

س: الغرض من الشركة؟
ج: إعلانات وتوكيلات، وشراكة مع أبليكيشن إماراتي.

س: مدير أعمالك يتقاضى 50 إلى 100 ألف؟
ج: أيوه وممكن أكتر.

س: لديك أكثر من مدير أعمال؟
ج: أيوه، علشان شغلي كتير وأنا محتاج تنظيم.