تفاصيل اللحظات الأخيرة في جريمة مسطرد، شقيق الضحية يروي الحكاية (فيديو)

في شهادة مؤلمة هزّت الشارع المصري كشف شقيق المجني عليه أحمد، تاجر بمنطقة مسطرد تفاصيل صادمة عن الساعات الأخيرة قبل إنهاء حياة شقيقه، على يد طليقته.

وقال شقيق المجني عليه، في تصريحات لـ"تليجراف مصر": “هي بقت طليقته رمى عليها الطلقة التالتة ومكنش ينفع يرجعلها إلا بمحلل وهو كان راجل شرقي ورفض حاجة زي كده”.

وأضاف شقيق المجني عليه أن الضحية كان المنفق الوحيد على أسرة طليقته وأنها وأهلها استغلوا طيبته وكرمه، كانوا شايفين فيه مصدر دخل ورفاهية، الست دخلتلها في أكتر من 10 مليون جنيه، كان عنده 15 محل باعهم واحد ورا التاني عشانها".

وأشار إلى أن الخلافات بدأت عندما حاول المجني عليه زيارة والدته المريضة وهو ما رفضته المتهمة بشدة، متابعًا: “كانت بتقوله متروحش تصرف على أمك الفلوس دي أنا أولى بيها وولادي من جوزي الأول أولى بيها”.

وروى الشقيق تفاصيل اللحظات الأخيرة قائلًا: “يوم الواقعة كان قاعد مع مراته الأولى وولده الصغير، فجأة هي ظهرت استفزته بأبشع الألفاظ وقالتله بتطلقني عشان تعيش مع العالم دي، جابت سكينة وحطتها تحت الشنطة، أول ما قام غرستها في صدره، دي مش خناقة دي نية قتل سبق وإصرار”.

وأكد أن المتهمة جاءت للمكان بنية القتل بعدما أدركت أن طريق الرجوع انتهى قائلاً: “هي جاية جاهزة عزمت النية إنها تقتله خلاص كانت عايزة تنتقم بعد الطلاق عايزة تحرمه من حياته عشان حرمها من فلوسه”.

وأردف: “إحنا في صدمة كل يوم بنصحى نقول يمكن دا حلم يمكن هنلاقي أحمد قاعد قدام المحلات، ده كان ضهرنا وسندنا وكبيرنا اللي مربينا ومعلّمنا الشغل، أمي لحد دلوقتي متعرفش إنه مات لسه خارجة من العناية المركزة بعد عملية”.

وفي نهاية حديثه وجّه شقيق الضحية رسالة مؤثرة: “رسالتي للمتهمة حسبي الله ونعم الوكيل، عند الله تجتمع الخصوم، ورسالة للدولة إحنا مش طالبين غير القصاص العادل سرعة المحاكمة هي اللي هتبرد نار قلوبنا وحق أحمد اللي اتقتل غدر”.