"خايف على أولادي"، أقوال مقدم البلاغ ضد شاكر محظور في تحقيقات النيابة

لا تزال قضية البلوجر الشهير شاكر محظور، محل اهتمام ومتابعة واسعة من رواد مواقع التواصل الاجتماعي، لا سيما على فيسبوك وتيك توك، وذلك عقب إحالته إلى المحكمة الاقتصادية بتهم تتعلق بنشر محتوى غير أخلاقي وغسل الأموال.

وتستكمل "تليجراف مصر"، نشر تفاصيل التحقيقات في القضية، حيث حصلت على أقوال مقدم البلاغ المستشار أشرف فرحات ضد صانع المحتوى محمد شاكر، والتي جاءت على النحو التالي:

س: ما سبب حضورك اليوم؟

ج: بناءً على طلب من النيابة العامة.

س: هل تقدمت ببلاغ ضد المدعو شاكر محمد حمزة؟
ج: أيوه.

س: ما سبب تقدمك بذلك البلاغ؟

ج: لاحظت في الآونة الأخيرة انتشار حساب باسم شاكر محظور دلوقتي، والحساب ده بيستخدمه المتهم محمد شاكر، وبيطلع بث مباشر بشكل يومي. 

فوجئت كمان إن أولادي الصغيرين عارفينه، فبدأت أتابع الحساب والمحتوى اللي بيقدمه. اكتشفت إن المتهم بيطلع معاه أشخاص تانيين في البث، أغلبهم سيدات، منهم راقصات، ومنهم سيدات سبق اتهامهن في قضايا مخلة بالشرف، ومنهن سيدات سبق اتهامهم في قضايا الاعتداء على المبادئ والقيم الأسرية.

س: ما الضرر الواقع عليك من تقديم البلاغ؟

ج: أنا خايف على أولادي. عندي أولاد أعمارهم 15 سنة، و9 سنوات، و24 سنة، والصغير 4 سنوات. الجيل ده السوشيال ميديا بقت هي الجزء الأكبر والأهم في حياته، وكلهم بيتابعوا تيك توك وغيره من التطبيقات. 

ومحتوى شاكر اللي بيقدمه أنا خايف على أولادي منه، لأن الشباب بتتفرج على واحد قاعد في البيت بيطلع لايف، وبيطلع مع سيدات عاريات، وبيتحصل على مبالغ طائلة، وده أكيد هيأثر عليهم بالسلب، ويخليهم يسيبوا دراستهم ويلجأوا للايف وتحقيق الثراء السريع زي ما هما شايفين شاكر بيعمل.

بالإضافة إلى إن المحتوى اللي بيقدمه مش هادف بالمرة، يا إما بيطلع يرقص، يا طالع مع سيدات ويقعد يعمل تلميحات وإيحاءات جنسية، والصغير قبل الكبير بقوا فاهمين ده، يمكن مش طول الوقت، لكن باين من المحتوى وطريقته إن القصد من التلميحات والإيماءات دي واضح.

س: من خلال رصدك للحساب محل البلاغ، ما هي طبيعة المحتوى الذي يقدمه؟

ج: هو مش بيقدم محتوى معين، هو بيطلع كل يوم لايف يتكلم، وبيطلع معاه شوية سيدات مشهورين إن محتواهم مخالف للآداب العامة، وده علشان يستفاد إنهم يطلعوا معاه ويعلوا نسبة المشاهدات والهدايا اللي بتجيله، واللي في الآخر بتتحول لفلوس.

وفى وقت سابق قررت جهات التحقيق المختصة، حبس البلوجر “شاكر محظور” 45 يومًا في قضية اتهامه بنشر فيديوهات خادشة للحياء عبر صفحاته بمواقع التواصل الاجتماعي بعد قبول استئناف  النيابة العامة، على قرار المحكمة بإخلاء سبيله  بكفالة مالية 500 ألف جنيه.

 اقرأ أيضا:

"معنديش ممتلكات"، سعدني صديق شاكر محظور يكشف كواليس البث والتحويلات (خاص)

شقق وفيلات بـ89 مليون جنيه، اعترافات تنشر لأول مرة في قضية البلوجر شاكر محظور (انفراد)