بيرقصوا وطايرين من السعادة.. ليلة زفاف عريس المرج المنتهية حياته على يد زوجته (فيديو)

حصلت “تليجراف مصر” على مقطع فيديو من حفل زفاف “أحمد” عريس المرج، وزوجته “هبة” التي أنهت حياته بعد 6 أشهر من زفافهما.

فرح عريس المرج ضحية زوجته 

وظهر في مقطع الفيديو العروسان وهما يرقصان ويحتضنان بعضهما في قمة السعادة والسرور أثناء احتفالهما بـ"ليلة العمر".

شقيقة عريس المرج تروي تفاصيل اللحظات الأخيرة في حياته

وفي وقت سابق، روت شقيقة الشاب “أحمد”، المعروف إعلاميًا بـ"عريس المرج"، تفاصيل اللحظات الأخيرة في حياة شقيقها، قبل أن تنهي زوجته حياته في ليلة زفاف صديقه.

“أخوكي مغمى عليه ”

وبدأت شيماء شقيقة عريس المرج، حديثها لـ"تليجراف مصر": "كنت جايه من شغلي وقابلت أخويا قدام البيت وسلمت عليه، وبعدها بـ5 دقايق لقيت مراته بتنادي عليّ بتقولي اطلعي بسرعة، ومكنتش متعوده إنها تنده عليا في الوقت ده، وطلعت أجري لقيتها بتقولي أخوكي “مغمى عليه”.

مراته كانت واقفه ساكته

وأكملت شقيقة المجني عليه: “لما طلعت عند أخويا لقيته واقع على الأرض قدام باب الحمام، حاولت أفوقه لكنه لم يستجب نهائيًا، وفي نفس الوقت مراته كانت واقفه في حالة صمت تام ومفيش منها أي رد فعل، وبعد شدتني من إيدي على البلكونة وقالتلي اندهي على أي حد من الشارع، وندهت على جيراني ورجعت عند أخويا تاني”.

متعور وبيجيب دم

وأضافت شيماء: “لما الجيران طلعوا عندنا حاولنا نشد أحمد راح اتقلب على ظهره، وببص عليه لقيته متعور في الكتف وبيجيب دم جامد، ولما شوفته كده فضلت أصرخ بصوتي كله، والجيران حاولوا تشغيل التوكتوك بتاعه لنقله إلى المستشفى، لكنهم فشلوا في العثور على المفتاح، واضطروا إلى دفع التوكتوك يدويًا، وفي الوقت ده كانت زوجته بتتكلم في التليفون، ومكانش في منها أي رد فعل”.

لون جسمه متغير

وأكملت شقيقة المجني عليه: “لما وصلنا المستشفى، لاحظت تغيير في لون جسم أخويا، وفي الوقت ده عرفت إن أخويا مات، مراته كانت خلصت عليه في خمس دقائق بس، اللي أنا سبته فيهم تحت بعدما سلمت عليه ودخلت أغير هدومي”.

الولد الوحيد بعد 5 بنات

وأوضحت شيماء: “أحمد أخويا كان الولد الوحيد بعد 5 بنات، والدتي توفيت وهو في سنة 5 ابتدائي، ووالدي توفي وهو في سنة تانية صنايع، وأحمد اعتمد على نفسه ونزل اشتغل وقرر أنه يخطب، ومسك شقة والدي شطبها بالكامل وجهز نفسه واتجوز”.

بخاف أنام

وأكدت شقيقة عريس المرج قائلة: "مرات أخويا كانت دايمًا بتتعمل مشاكل معاه، وكانت دايما بتروح عند بيت أهلها في أي وقت، ولما سألت أحمد قالي معرفش والله يا شيماء أنا بقيت بخاف أنام، دي بتيجي بتشدني من على السرير وأنا نايم وتقولي قوم وديني بيت أهلي.

عاوزه حق أخويا

واختتمت شيماء حديثها قائلة: “أنا مش عاوزه غير تحقيق العدالة، أنا مش عايزة غير حق أخويا، هو حياته راحت، ولازم هي تتعدم وحياتها تروح زي ما حياته راحت”.

اقرأ أيضًا:

"مراته خلصت عليه في 5 دقايق"، شقيقة عريس المرج تروي تفاصيل اللحظات الأخيرة (فيديو)

"يد الغدر" تنهي أحلام "أحمد" بعد زواجه في المرج

"على التيك توك طول النهار"، شقيقة عريس المرج تكشف أسباب الخلافات