فتوح يقطع الطريق على المنافسين: زملكاوي ومكمل مهما كانت الإغراءات

أكد لاعب نادي الزمالك أحمد فتوح، تمسكه بالاستمرار داخل القلعة البيضاء، نافيًا وجود أي نية للرحيل أو الاحتراف الخارجي في الوقت الحالي، مشددًا على أن الزمالك هو خياره الأول والأخير.

وقال فتوح في تصريحاته عبر قناة «أون سبورت»: «عمري ما زعلت من أحمد سيد زيزو، هو صاحبي وأخويا، ومفيش بينا أي خلاف».

وأضاف: «أقرب الناس ليا في الكورة إمام عاشور، وبعده محمد عبد المنعم ومصطفى محمد ورمضان صبحي».

وتحدث لاعب الزمالك عن رمضان صبحي، قائلًا: «رمضان شخصيته قوية وأنا عارفه من زمان، ويقدر يرجع أقوى من الأول، وأتمنى يكون موجود في الزمالك، وكل حاجة واردة».

وحسم فتوح موقفه من الرحيل، مؤكدًا: «أنا مكمل في الزمالك مهما كانت الإغراءات، ومفيش خطة احتراف حاليًا، ومش هروح الأهلي ولا بيراميدز، بقالي 12 سنة في النادي، والحاجة الوحيدة اللي تخليني أمشي إنهم يكونوا مش عايزني أكمل».

وأوضح فتوح أن التفاوض خلال فترات التجديد أمر طبيعي، قائلًا: «التفاوض وقت التجديد طبيعي، لكن عمري ما بعت الزمالك في أي حاجة».

وأشاد بقائد الفريق شيكابالا، قائلًا: «شيكابالا قالي أنا مبطل كورة ومش قادر أتفرج على حد بعدي غيرك، ودايمًا بيقولي إني أحرف منه، لكن والله شيكابالا أحرف لاعب شوفته في حياتي، وعمري ما عملت حساب لحد في الملعب غيره».

وأضاف: «مفيش حد بيدخل دماغي أو بركز معاه غير نفسي، وماتش الأهلي زي أي ماتش بالنسبة لي».

وتابع فتوح: «أنا شايف شيكابالا يقدر يلعب في برشلونة، ولو احترفت نفسي ألعب في مانشستر سيتي».

أحمد فتوح: 20 مليونًا راتب سنوي رقم مناسب بالنسبة لي

وكشف لاعب الزمالك تفاصيل موقفه التعاقدي، قائلًا: «متبقي لي سنة وشوية في عقدي، ولسة محدش اتكلم معايا في الزمالك، وآخر السنة هيكلموني وهجدد، وأرقامي وراتبي في المعقول داخل النادي، و20 مليون رقم كويس جدًا بالنسبة لي».

وأوضح سبب الجدل السابق حول تجديد عقده: «كان عندي مشاكل بيت وعربية، وده اللي خلاني أتكلم في الفلوس وقتها، وكان فيه كلام عن منحة خارج العقد».

وأعرب فتوح عن ثقته في قدرات الزمالك، مؤكدًا: «الزمالك بالجيل الحالي قادر يحقق بطولات، ومفيش حاجة كبيرة على نادي الزمالك».

واختتم فتوح تصريحاته قائلًا: «جالي عروض قوية من أندية مصرية بمبالغ كبيرة في كل فترة تجديد، لكن دايمًا بجدد بأرقام أقل من اللي بتدفعه أندية تانية، وده قراري الشخصي، واللي ناقص الزمالك شوية استقرار وشوية فلوس، واللي جاي هيكون أفضل».

كما أشاد بمدرب المنتخب حسام حسن، قائلًا: «حسام حسن بيعشقني وبيحبني من أيام سموحة، لعبت ماتشين أو تلاتة وخدني المنتخب لإنه مقتنع بيا».

اقرأ أيضًا:

الونش: الزمالك يمر بفترة صعبة والجميع يتحمل المسؤولية

معتمد جمال عن غيابات الزمالك: تمنيت وجود هذا اللاعب أمام المصري غدا