فارس: أنا اكتشفت أحمد سعد ورامي صبري.. والأغاني الآن تنجح بالدعاية

تحدث المطرب فارس، عن علاقته بالفنان أحمد سعد ورامي صبري، وقال إنه أول من اكتشف موهبتهما، عبر شركة الإنتاج الخاصة به. 

وقال فارس، في لقائه مع الإعلامية إنجي هشام، في برنامج "المنسي"، المذاع عبر شاشة قناة “هي” إنه أنشأ شركة إنتاج فني، وكان رامي صبري وأحمد سعد، أصحابه، فحاول مساعدتهم من خلالها.

اللي عايزني يجيلي

وتابع: علاقتنا مبقتش أوي، وأنا من النوع اللي عايزني يجيلي، أنا مبدورش على حد، أنا عارف أن هما ناس كتير ومحترمة وأكيد عندهم حياتهم، والناس كلها عارفة أن فارس مش بتاع مصلحة.

أما عن علاقته بالمطرب والمحلن عمرو مصطفى، فأجاب فارس: عمرو مصطفى ملحن موهوب وجميل، وهيوصل هيوصل، وعصبيته دي أي كلام، وهو أطيب من الغلب. مضيفا: أنا ممكن كنت محطة من محطاته وفهمته إزاي يتعامل مع النجوم، لأنه كان بيخاف لأنه لسه جديد.

وقال فارس: بعدي عن الوسط الفني كانت غلطة لأني كنت في قمة نجاحي ساعتها، وحسيت أن الفن عمل لي مشكلة في منطقة معينة في حياتي الشخصية وكرهت الشهرة خالص وبعدت، ومكنش عندي ثروة زي ما بيتقال وأنا عمري ما بصيت للناحية المادية، ودايمًا ببقى عايز أعيش كويس.

ارجع للفن

وتابع: كل أصحابي قالولي ارجع تاني للفن، ولكن ساعاتها الموضوع طلع من قلبي، وقدر الله وما شاء فعل، وفي ناس ميحبوش يشوفوني لأني بفكرهم بأيام مش حلوة بالنسبة لهم، لكن في ناس كويسين كتير.

العودة من جديد

أما عن تفاصيل عودته من جديد، فعلق فارس: الشاعر وائل توفيق كان أكتر واحد بيزنّ عليا علشان أرجع للفن وأغني أغنية عصبي بتاعته وكان بيجيلي كل يوم، وغنيت الأغنية ولكن فوجئت أنها متباعة قبل كده، ودي برضو أثرت عليا، وقلت: شكلها معرقبة، وأنا غلطان إني غنيت لحن متباع، والمنتج عنده حق، والملحن هو اللي غلطان.

وأضاف: الإمكانيات دلوقتي اختلفت أوي ومش لازم الأغنية تكون حلوة، في أغاني كتير ناجحة وعاملة مشاهدة وهي مش حلوة، وزمان كان الواحد بيختار اللي هو عايز لكن دلوقتي بيتفرض عليه، ومش كفاية أن الأغنية تكون حلوة وأن المطرب صوته حلو، المهم أن يعمل لها دعاية جامدة جدًا.

وأردف: في فنانيين بيشتروا المشاهدات، إزاي أغنية نازلة بقالها ساعة تعمل مليون؟ بيلعبوا على نفسية المتلقي، دول لو قاعدين مستنيين في اليوتيوب مش هيجيب مليون في ساعة، وحتة التواجد دي مهمة جدًا.

الفن ثقافة

وقال فارس: أنا وحميد الشاعري كنا مقربين جدًا وكنا عايشين مع بعض في بداية حياتنا، وأنا مصري من أم ليبية وهو ليبي من أم مصرية، وهو أخويا مش صديقي بس، وحميد شاطر في كل حاجة وهو من الشخصيات النادرة، ولازم في كل لقاء أتكلم عليه.

مكنتش ناوي أغني 

وتابع: أنا مكنتش ناوي أغني أوي لأني كنت بدرس هندسة وكنت بلعب جيتار وبغني غربي، وحميد الشاعري شجعني على الغناء ووقف جنبي، وكمان أستاذ طارق عبد الله المنتج، وعملت أول ألبوم ليا اسمه فارس والمزداوية هكتبلك، ومكنش في دماغي أن هحترف كنت بغني كهواية، والألبوم نجح.

وأضاف: حميد الشاعري ده حاجة غريبة، واللي هو بيعمله لوحده، بتعمله مؤسسات كبيرة، بيصنع نجوم لوحده، وهو وقف جنبي بشكل غريب.

برنامج المنسي

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.