عامان من الابتلاءات، كيف ساهمت رسالة ربانية في إنقاذ رضا إدريس من اليأس؟

حل الفنان رضا إدريس ضيفًا على البرنامج الرمضاني “كلم ربنا”، المذاع عبر راديو 90 90، الذي يقدمه الإعلامي أحمد الخطيب، حيث تحدث عن الابتلاءات الصعبة التي واجهته آخر عامين وكيف أنقذته رسالة ربانية من قاع اليأس.

رضا إدريس يتحدث عن أسوأ أيام حياته

حكى الفنان رضا إدريس في لقائه مع الخطيب عن أسوأ الأيام التي مرت عليه في حياته، والتي عانى فيها هو وأسرته بعدما تقلصت العروض الفنية التي أصبحت تصله حتى انقطعت تمامًا ما اضطره للجلوس بالمنزل، وأثرت تلك الازمة على كل أفراد العائلة الذين دفعوا الثمن باهظًا -كما وصف-.

وقال: "أسرتي وولادي تعبوا معايا جدًا، ودفعوا تمن غالي مش هقدر أحكي تفاصيله،  وصل بيا الحال إني مبقتش قادر أدفع إيجار الشقة اللي عايشين فيها وكنا خلاص هنعيش في الشارع!، عدم وجود دخل ومصاريف مُرعبة، بالذات لما تكون رب أسرة ملهومش غيري".

كتر الزعل أثر على حالتي النفسية

وأضاف إدريس أن أزمة جلوسه في المنزل لانقطاع عروض مشاركاته في الأعمال الفنية لم تقتصر على الجانب المادي فقط، إذ امتدت لحالته النفسبة التي تدهورت بشكل كبير، حتى وصل إلى مرحلة كاد فيها لا يستطيع الحركة تمامًا ولا المشي على قدميه، حينها احتاج للخضوع لجراحة بشكل عاجل لكنه لم يمتلك المال لذلك ولا يحتاج ليشتري الدواء.

يتابع:"سنتين عدّوا عليا وأنا شايف الدنيا واقفة وأنا شايل هم أسرة كبيرة، مقدرتش أدفع مصروفات المدارس والمصاريف اليومية تقيلة جداً، زي جبل على صدري، والإيجار والاحتياجات فوق طاقتي".

واستأنف: "في الأول ماكنش فيه شغل ومحدش سائل فيا، اضطريت أنزل أشتغل في مسرحيات صغيرة وضعيفة مع الهواة اللي أصلا مش معاهم فلوس، فكانت الليلة بـ300 جنيه بس، الـ300 جنيه دول كنت بجيب بيهم أكل علشان نتعشي ونفطر، ورضيت وحمدت المهم أجيب مصاريف البيت والعيال، وكنت بقول لنفسي: يارب عاوز رزق الأكل لولادي حبايبي".

العلاج على نفقة الدولة بعد تدهور الحالة الصحية  

يتابع إدريس أنه بعد فترة من تدهور حالته الصحية اضطر لدفع كل مدخراته ليخضع للعلاج، وبدأ يستدين من الأقارب والأصدقاء ليستطيع سد احتياجات الطعام والدواء له ولأسرته.

وأشار إلى أنه التقى ببعض الأشخاص الذين ساعدوه للعلاج على نفقة الدولة بعدما علموا بحالته، وبالفعل خضع لجراحة متخصصة.

وأكمل: "ولاد الحلال  ساعدوني إنى أتعالج على نفقة الدولة، ورحت لجراح كبير  وقالى لازم عملية وعملتها، كنت طول الوقت أقرأ القرآن وأقول: رب إني مغلوب فانتصر، ووإذا مرضت فهو يشفين، وقتها كنت بقول لربنا أنا مغلوب على أمري، زي طفل تايه بيدور على حضن".  

زيارة للسيدة زينب

ويحكي إدريس عن زيارة كانت له كالنور وسط عتمة الضغوطات، بعدما قرر زيارة مسجد السيدة زينب ليدعو الله، قائلًا: "في يوم جمعة قلت لنفسي لازم أروح لستي السيدة زينب أتكلم معاها وأحكيلها، رحت المسجد، لقيت المقام مقفول علشان كان في تجديد وترميم، ربنا ألهمنى أروح وأخبط والباب اتفتحلى، أول ما دخلت عندها بكيت، وقلتلها: «إزيك يا أمي»، وبقيت تايه مش عارف أقول إيه، كأنى كنت بدور على لحظة فرج، بقيت أبص عليها وأقولها يا أمي وأم العواجز أنا عاجز".

ويستأنف: "مشيت من عندها جالي في جسمي إحساس بإني ارتحت، زي نور بيشق عتمة طويلة، وفي ليلة صعبة وكنا في رمضان، مريم بنتي كانت مخطوبة، أهل العريس جم البيت عندي وطلبوا يقعدوا معايا علشان يتكلموا في العفش والتجهيز، يومها صِعب عليا حالي وحال بنتي وكسرة فرحتها لأني قاعد معاهم وإحنا معندناش حق العشا".

يزيد: "بقيت قاعد عامل نفسي بتفرج على التلفزيون ومفيش ولا مليم ولا أى قدرة إنى أساعدها، نفسي اتكسرت وزعلت على بنتي اللي نفسها تفرح.. بعد ما مشيوا قعدت بعيد من عيون مريم علشان مش عاوزها تزعل مني وتعاتبني".

رسالة ربانية بعد الوصول لقاع اليأس

يتابع إدريس أنه بعدما وصل لقاع اليأس خاصة مع أزمة تجهيزات زواج ابنته مريم، أنقذه الله برسالة ربانية انتشلته من قاع اليأس، فقال: "ساعتها قعدت لوحدي وقلت لربنا بدموعي: «أنا ماليش غيرك، متحوجنيش لحد»، الناس كلها عارفاني، وكل الناس بتشتغل وأنا مش شغال: «يا رب هو الناس سايباني ليه؟ يا رب اشفيني عشان أقدر أشتغل»، «يا رب أنا بنتي في رقبتي وورايا مصاريف وفرح وتجهيزات، أروح لمين غيرك؟»".

يستأنف: "كنت بكلّم ربنا وأنا ببكي وأشتكي لدرجة إني نمت في الصالة م الزعل، وفجأة صحيت على صوت التلفزيون، لقيت مشهد في أحد المسلسلات بيقولوا فيه الآية الكريمة من سورة الشرح: «فَإِنَّ مَعَ الْعُسْرِ يُسْرًا .. إن مَعَ الْعُسْرِ يُسْرًا »،  جسمي قشعر وحسيت إنها إشارة من ربنا، زي رسالة بتتكتب مخصوص ليا، صدري انشرح، وقلت: «الله أكبر»، كانت ليلة 25 رمضان، وسبحان الله في نفس الليلة وأنا بجهز السحور، التليفون رن، لقيت أحد المنتجين الكبار بيكلمني، بيقولي: «جهز ورقك وجوازك، عندنا مسلسل أجنبي خارج مصر في أوروبا بعد العيد»، في الأول مصدقتش لأنه قاللي أجرك كذا وهبعتلك عربون الصبح.. كان مبلغ كبير.. بعد ما قفل معايا دخلت في نوبة بكاء من الفرحة وبقيت أقول الفرج وصل الفرج وصل".

اقرأ أيضًا:

"ربنا سترها معايا"، أول تعليق من عبدالمنصف على زواجه 7 سنوات دون علم لقاء الخميسي