"اللايفات بتكسب أكتر"، نص التحقيقات مع مداهم في قضية غسل الأموال والمحتوى الخادش (انفراد)

“مكملتش تعليمي عشان مش حابه.. وتنقلت بين شغلانات كتير، لحد ما دخلت عالم التيك توك واعتمدت على البث المباشر والهدايا الافتراضية كمصدر رزق أساسي”، بتلك الكلمات أدلى البلوجر محمد خالد، المعروف باسم “مداهم”، بأقواله خلال التحقيق معه في قضية تتعلق بنشر محتوى غير أخلاقي وغسل أموال عبر مواقع التواصل الاجتماعي.

أقوال البلوجر مداهم في قضية المحتوى الخادش وغسل الأموال

وتنفرد “تليجراف مصر” بنشر نص التحقيقات الكامل مع “مداهم”، والتي تضمنت اعترافات تفصيلية حول نشأته، وطبيعة المحتوى الذي يقدمه، وآليات تحقيقه أرباحًا من منصات التواصل الاجتماعي.

س: ما هي ظروف نشأتك الاجتماعية؟

ج: أنا اتولدت في قرية باسوس محافظة القليوبية من أسرة متوسطة الحال، وللأسف مكملتش تعليمي، وخرجت من ثانية إعدادي علشان مكنتش حابب التعليم، وبدأت أشتغل من وأنا صغير في ثانية إعدادي، وجربت حظي في كذا شغلانة، منهم شغلانة المصور الفوتوغرافي، وقعدت فيها حوالي سنة، وبعدها إشتغلت في محل الأسماك، وكنت بجيب السمك من تجار الجملة وبوزع علي المحلات لحسابي الشخصي، وبعدها إبتديت أدخل عالم منصات التواصل الاجتماعي وتحديدًا (تيك توك)، وعرفت إن ممكن تجيب شهرة من خلاله عن طريق نشر محتوي علي المنصة دي، وبدأت أجيب فيديوهات خاصه بلعبة Pubg وأنشرها لأن في ناس بتكون مهتمة تتفرج علي المحتوي اللي من النوع ده علشان يتعلموا منه طريقة لعب جديدة، وبعدها بدأ ينزل لي فلوس.

وأكمل: بس كانت الفلوس دي يدوب بتغطي مصاريفي الشهرية، ولما دخلت أكثر في عالم الـ “تيك توك” عرفت إني ممكن أبتدي أصور نفسي لايفات وده يجيب لي فلوس أكثر، وبالفعل بدأت أصور لايفات، وفوجئت إني بتشهر جامد، وإن الداعمين بتوعي بيزيدوا، وكل ما كنت بعمل لايفات أكثر، كنت بشتهر أكتر وبعمل فلوس أكثر، ومن حوالي أربع أيام كان في هوجه على كل صناع المحتوي في تيك توك، وفوجئت يوم السبت، الموافق 2 أغسطس 2025 حوالي الساعة 4 العصر، إن الشرطة اقتحموا البيت عندي مساكن شيراتون، وبهدلوة جامد، وخدوني على القسم، وبعد كده ودوني على نيابة شرق القاهرة الكلية حققوا معايا، وبعدين جابوني على هنا النهاردة، هو ده كل اللي حصل

س: وما هو عمل والدك تحديدًا؟

ج: والدي عندة عربية نقل وبيشغلها.

س: ما هو عمل والدتك تحديدًا؟

ج: ربة منزل.

س: وهل لديك ثمة أشقاء؟

ج: أيوة، عندي أختي أيه 24 سنه متزوجة، وأختي أمنية 20 سنة ومتزوجة، وأخويا أحمد 18 سنة في ثانوية، وأخويا مصطفى 15 سنة في المعهد الديني، وأختي مي 8 سنوات.

س: ومن القائم على إعالتك تحديدًا؟

ج: أنا اللي بصرف على نفسي وبساعد عيلتي.

س: بشكل عام ما هي أنواع المقاطع المصورة التي يتم نشرها على منصة (تيك توك)؟ 

ج: المقاطع بتنقسم إلى نوعين إما فيديوهات أو لايفات، بالنسبة للفيديوهات دي بتكون فيديوهات سبق تصويرها وصاحب الحساب بينشرها على صفحة، ودي مبتجبش فلوس، ولكن الغرض منها بيكون الشهرة لصاحب الحساب، واللي بيفتح له الطريق بعد كده إنه يشتغل بشهرته في مجال الدعايا والإعلان ويعمل إعلانات للشركات اللي بتكون عايزة تسوق لمنتجاتها عن طريق صفحته، أما النوع الثاني فهو اللايفات ودي بتبقي عبارة عن إن صاحب الحساب بيفتح كاميرا التليفون، وبيصور نفسه بشكل مباشر، ودي بتجيب فلوس عن طريق الداعمين اللي بيدعموا المحتوي اللي بيصوره عن طريق إرسالهم الهدايا افتراضية بيكون ليها قيمة مادية. 

س: وضح لنا ما المقصود بكلمة (الداعمين)؟ 

ج: هم المتابعين بتوعنا اللي بيدخلوا يتفرجوا علينا وإحنا بنصور اللايف، وبيبعتولنا الهدايا الافتراضية. 

س: وضح لنا ما المقصود بكلمة (الهدايا)؟

ج: الهدايا دي بتكون عبارة عن أشكال رمزية (زي الأسد، الوردة، قلب، شلال، قطار، وغيرها من الأشكال)، ولكل شكل من دول قيمته النقدية اللي بعد كده بحولها لفلوس أعرف أسحبها من على حسابي على (تيك توك).

س: وما هي آلية صرفك لتلك المبالغ المرسلة إليك من هؤلاء الداعمين؟

ج: بشكل عام، حساب منصة (تيك توك ممكن أربطه على حساب بنكي ( جنيه مصري / دولار أمريكي) أو محافظ فودافون كاش أو حساب PayPal، والفلوس اللي بيتم إرسالها من الداعمين بيتم تحويلها لأي من الحسابات دي، وبالنسبة لي فأنا من ساعة ما اشتغلت في المجال ده، وأنا بخلي الفلوس تنزلي على حساب PayPal، وبعد كده بحولهم لحسابي الدولاري البنكي.

س: وما هي آلية حصول الداعمين على تلك الهدايا الافتراضية؟

ج: عن طريق انهم برضوا بيربطوا حساباتهم على منصة (تيك توك) على حسابات بنكية، بحيث لما يحبوا يشتروا هدايا افتراضية يتم خصم قيمة تلك الهدايا من حساباتهم البنكية، ويتم إيداع مقابل الفلوس اللي تم خصمها في صورة عملات افتراضية (Coins) يتكون موجودة في محافظ التيك توك بتاعتهم علشان يقدروا يشتروا بيها الهدايا اللي عايزينها بعد كدة.
س: وضح لنا ما المقصود بكلمة (Coins)

ج: دي تعتبر عملة منصة (تيك توك) الرسمية، وليها اسم دارج أخر زي الماسات أو النقطة، يعني لما الداعم بيتم خصم فلوس من حسابة البنكي علشان عايز يشتري هدية افتراضية معينة، بينزلة مقابل الفلوس دي (Coins) على حسابه على تيك توك، بحيث إنه يستخدم الـ Coins دي بعد كدة في شراء الهدايا اللي عايزها، ولما مثلًا الداعم بيبعت رمز الأسد لصاحب المحتوى، قيمة الأسد دي، واللي هي ٣٠ ألف Coins بيتحولوا في صورة Coins محفظة صاحب المحتوى.

اقرأ أيضًا:

"شربت بسبب الضغوط"، نص التحقيقات مع البلوجر مداهم في قضية المخدرات (خاص)