ميدو: "صاحبت ملكة جمال بلجيكا بس محبتهاش"

عقّب أحمد حسام "ميدو"، لاعب الزمالك السابق، على تصريحاته الأخيرة بشأن أن كان يلعب كرة القدم من أجل البنات.

وقال ميدو، خلال استضافته ببرنامج "أسرار" مع الإعلامية أميرة بدر، المذاع على قناة النهار، "حافز لعب الكرة علشان البنات كنت ساعتها صغير وعندى 17 سنة، وكلامي ده كان خلال قصة لأن البنات اللي شفتها هناك حلوين ومش معنى كده إني كنت في مصر واقع يعني".

ملكة جمال بلجيكا

وأضاف "حلمي اتحقق وصاحبت ملكة جمال بلجيكا، وسبتها لأن حياتنا مختلفة ومحبتهاش بس كانت حلوة، ودلوقتي هي ممثلة مشهورة في بلجيكا، كان مشكلتي على صورها اللي على المجلات، ويسرا مراتي أحلى منها وقمر، وكل ما الوقت بيعدي بحبها أكتر، أي راجل وست عشان يعرفوا يعيشوا محتاجين لغة حوار، مش عيب إن الراجل يعبر عن حبه لمراته والعكس صحيح، مبدأ الرجالة بتاع الست للبيت ده مش عندي، أنا عندي أخرج معاها وأسهر ونرقص سوا ونلبس أحلى لبس، وقفشتني كتير، واللي بيحللي مشاكلي معاها هي حماتي وأمي".

وتابع “الست الجدعة اللي تحافظ وتبقى باقية على بيتها ومش معنى كده إنها تبقى مهزقة، لأن فيه صحاب كتير وحشين أوي، متسمعيش ليهم، وبرامج الستات اللي بتنصح الستات كلهم مطلقات، طيب ماتسبيهم، ليه تنصحيهم وبتخربي بيوتهم، وهما أربعة أو خمس ستات بينصحوا الستات كلهم مطلقات متسمعهومش لأن هدفهم مش أنتي ولكن شغلها فقط، مفيش ست يبقى عندها شخصية قدام جوزها، لازم يبقى فيه تنازلات من الطرفين”.

وعن واقعة مرتبه عندما تولى الإدارة الفنية لفريق الزمالك، قال ميدو "مرتضى كتب مرتب حازم مدير الكرة 100 ألف جنيه، وكتب مرتبي كمدير فني 140 ألف جنيه، أخدت منه الورق والقلم وعكست الكلام وقلتله ميصحش حازم يبقى أقل مني وهو أقدم مني، وحازم ميعرفش القصة دي بالمناسبة لإني لأول مرة أقولها".

وواصل ميدو “غلطة حازم إمام إنه حمل نفسه فوق طاقته وتصدر المشهد وطلع على المسرح، بس هل هو سبب خراب الكرة في مصر، غلط إنه اتفاوض وهو مش شغلته، المفروض في ناس شغلتها الحسابات والتفاوض، خد قرارات فنية كتير خاطئة، لأن مصر كانت ممكن تكسب البطولة دي، ومتفائل بحسام حسن”.

وعن إمكانية عودته للتدريب، قال ميدو "ممكن أمسك نادي الزمالك في وقت من الأوقات، علشان أمسك الزمالك لازم أبقى جاهز للمواجهات، في ناس كتير أكيد مش عايزاني وهتحاربني، أنا أصغر مدرب درب الزمالك وأصغر لاعب مثل مصر، وإن شاء الله هبقى أصغر رئيس للزمالك، وعمري ما أنزل انتخابات قدام حازم إمام لكن ممكن أبقى نائب له، وحازم مينزلش قدامي لأنه عارف إني هكسبه".