بيتر ميمي يفك شفرة "الحشاشين": شوية شوية هتفهموا

دافع المخرج بيتر ميمي عن مسلسله "الحشاشين" المعروض حاليا في رمضان، ضد الانتقادات الموجهة للمسلسل بعد عرض 4 حلقات.

وقال ميمي عبر حسابه الشخصي بموقع "فيسبوك" إنه لم يكن يرغب في الحديث عن المسلسل في الوقت الحالي، لعرض 4 حلقات فقط من المسلسل حتى الآن.

من وحي التاريخ

اعتبر بيتي ميمي أن "الحشاشين" عمل من وحي التاريخ، مؤكدا على أن هذا مكتوب نصًا في التترات، وأن المسلسل لا يعتمد على وثيقة تاريخية.

وأضاف: المسلسل دراما تاريخية، هو تارنتينو لما قتل هتلر فى السينما كان حقيقة؟ أو نابليون فى فيلم ريدلى سكوت الأخير هل ده نابليون اللى فى كتب التاريخ؟ دي دراما تاريخية، حاولنا نعمل خيال تصويرى لفترة من الفترات لكن فى شكل درامي، لكن رجعنا فى الديكور و الملابس لمراجع كتيرة ونادرة علشان نعمل عالم مشوفنهوش قبل كده، وميكنش شبه أفلام أو مسلسلات عالمية".

الخلاف حول حسن الصباح

ودافع ميمي عن تفاصيل الشخصية الرئيسية بالمسلسل حسن الصباح، قائًلا إن التاريخ اختلف على شخصيته.

وأوضح: "هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره والمجهود اجتهاد، ماركو بولو أو فلادمير بارتول أو برنارد لويس أو فرهاد دفتي، و كتير جدا، حسن الصباح كان بيعمل معجزات؟ لا طبعا!!! و ده تباعاً مع الحلقات هيتفهم".

أزمة اللغة

الكثير من المتابعين انتقدوا استخدام العامية المصرية خلال أحداث "الحشاشين"، وهو ما حرص بيتر ميمي أن يرد عليه في حديثه عن المسلسل. قائلا: "الحشاشين مسلسل تاريخي بالعامية المصرية، الأحداث بين أتراك وفرس، لما عملوا التاريخ اتكلموا تركي، ولما عملوه الأمريكان بيتكلموا انجليزى، إحنا عاملينه فى مصر والترجمة موجودة فى كل بلد،  المسلسل بيتعرض فى روسيا وأمريكا وأكتر من بلد، كل بلد بلغتها، هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الامريكية.

لماذا الصباح؟

من بين الانتقادات المُوجهة لمسلسل "الحشاشين"، اختيار حسن الصباح لتنفيذ عمل بهذا الإنتاج الضخم، بيتر ميمي رد قائًلا: "ليه حسن الصباح؟ حسن الصباح شخصية فذة وغريبة ومستفزة، مش لازم يكون رمز للخير علشان يتعمل له مسلسل، هتلر وراسبوتين كانوا فى منتهى الشر لكنهم شخصيات فذة غيرت العالم، أو على مستوانا المصرى خط الصعيد أو سفاح الإسكندرية.

ملاحظات

واختتم بيتر ميمي دفاعه عن المسلسل بملاحظات سريعة جاء فيها:
- أم الخليفة رصد كانت نوبية الاصل.
- إسكندرية مدينة فى مصر، لأن فيه مدن كتير باسم إسكندرية حوالين العالم، لزم التوضيح للترجمة لأن فيه غير مصريين بيتفرجوا على المسلسل.
- مجاعة القاهرة الفاطمية مثبوتة تاريخيا لكن تعددت أشكالها حسب المصادر، وهى على فكرة، كانت قبل وصول حسن بفترة مش بعيدة بس ديه دراما (من وحي التاريخ).
- ماتسمى بمعجزات حسن الصباح مقصود تتصور بالشكل ده، وده هيبان تباعا، وخصوصا مشهد الراوي حلقة 8.
- عم ملك شاه اتقتل بوتر القوس لأن ده كان عرف و تقليد.
-مين الست اللى بتظهر لحسن الصباح؟ ده فى حلقة ٣٠ بقى لو ربنا إدانا عمر.
ووجه رسالة للجمهور: “كل سنة وإنتم طيبين، وسعيد إن المسلسل خلاكم تقروا وتسألوا، وشوية شوية هتفهموا المسلسل، صحصحوا معانا كده يا شباب خلونا نعمل شكل جديد، وتبقى بداية ومع الوقت يتعمل أفضل وأكبر وأحسن من اللى احنا عاملينه، و مع الوقت ننافس”.