"الأم المقهورة" تكشف كواليس صادمة: "بناتي رموني في الشارع وجابوا لي بودي جارد" (فيديو)

انتشر مقطع فيديو صادم لسيدة تُدعى أمينة موسى، وهي تدعو على بناتها الثلاث بالخراب والدمار وقت نزول المطر، بعد عقوقهن لها، ولاقى رواجًا واسعًا على مواقع التواصل الاجتماعي.  

طرد الأم في الشارع

وقالت أمينة لـ"تليجراف مصر"، إنها ربت أبنائها على مدار 40 سنة، كانت تمنحهم فيها صحتها وعافيتها وشبابها، وكان جزائها في النهاية هو طردها بالشارع.

وأضافت: "بناتي عاقين أمهم أنا جوزتهم وربيت معاهم أحفادي اتفقوا مع بعض يسيبوني ويرموني.. رفضوا إني أتكلم على الغلط ورفضوا إني خلعت أبوهم فاتفقوا يرموني".

وتابعت الأم المكلومة: "أي أم لما توصل لسني 67 سنة بتحتاج اللي يدهن جسمها واللي يجيبلها علاج لكن أنا وحيدة.. ربنا يردلهم اللي عملوه فيا ويقعد لهم في حياتهم أنا كل فجر بدعي على ولادي من قلبي".

وفي رواية صادمة قالت الأم أمينة: "بنتي رفعت إيديها عليا وده ميرضيش ربنا وجابت لي بودي جارد صحوني نص الليل وطردوني من البيت.. أنهي حيوان ولا شيطان حتى يعمل كدة في أمه؟!".

وأنهت أمينة حديثها بقولها: "أنا مستحقش إن ولادي يعملوا فيا كدة بعد كل اللي عملته علشانهم.. أنا دلوقت عايشة في كل بيت شوية وولاد الحلال هما اللي بيساعدوني".

وكانت السيدة قد نشرت مقطع فيديو انتشر على مواقع التواصل الاجتماعي قالت فيه: "مش راضية عنكم، يا رب تتحوجوا ومتلاقوش، يا رب يحوجكم لعيالكم وماتلاقوهمش زي ما أنا محتاجاكم كدا ومش لاقياكم، يا رب يدمر حياتكم.. اللهم أنزل غضبك على ولادي يا رب.. رايحة أجيب حاجتي من الشارع عشان ولادي ميتين اللهم نزل غضبك على ولادي".

وبالبحث عن هذه السيدة، تبيّن أنها تملك حسابًا على منصة “تيك توك” منذ ثلاث سنوات، باسم "أم العاقات" وحساب آخر يحمل اسم "الأم المقهورة"، كل محتواها هو ظهورها في مقاطع فيديو مختلفة لتدعو على بناتها، ونشر مقاطع لأمهات آخريات طُردن من بيوتهن بسبب أبنائهن.

اقرأ أيضًا: 

"ربنا يدمر حياتكم".. أم تكرس حياتها للدعاء على بناتها وقت نزول المطر