الإرهابي علي عبدالونيس لـ الإخوان: كفاية أرواح الشباب اللي ضاعت

كشف القيادي الإخواني الهارب علي محمود محمد عبدالونيس، المحكوم عليه بالسجن المؤبد في عدة قضايا إرهابية، نشاطاته داخل جماعة الإخوان بعد القبض عليه من قبل وزارة الداخلية وجلبه من إحدى الدول الأفريقية.

اعترافات الإرهابي علي عبدالونيس

وقال الإرهابي علي عبدالونيس: “لما قابلت يحيى موسى وأحمد الصعيدي بعد الحادث كانوا تحليلهم إن الضربة الأمنية كانت من أقوى الضربات المؤثرة في التنظيم، وكانت هزة تنظيمية بالنسبة لأفراد التنظيم وقياداته، التنظيم والجماعة صوروا الحرب إنها حرب دين وهي مش كده، هي كانت حرب سلطة، وحرب كرسي، وحرب السلطة والكرسي ما تستاهلش ضفر واحد مش دم”.

وأكمل: “أقول لقيادات التنظيم المسلح اللي لسه لحد دلوقتي بيشتغلوا في تنفيذ عمليات ضد الدولة كفاية، كفاية أرواح الشباب اللي ضيعتوها وكفاية أعمارهم اللي بتضيع في السجن بدون سبب وعشان مصالح شخصية أو سياسية أو فلوس، ما هو كل واحد بيدور على مصلحته، وكل واحد بيدور على مصلحة بيجري وراها اللي بيدور على منصب واللي بيدور على فلوس واللي بيدور على جاه، فكفاية”.

الإرهابي علي عبدالونيس: عمري ضاع هدر

وأضاف نادما: “حسبي الله ونعم الوكيل في أي حد بيوجه الشباب وبيضيع أعمارهم مقابل لا شيء يعني، أقول للي كلفني بكده كفاية، كفاية دم عموما يعني، كفاية دم، يعني بعد ما قعدت وفكرت مع نفسي حسيت إن ضيعت عمري هدر، في لا شيء مقابل لا شيء، في فكرة فاضية، عشان كرسي وعشان سلطة”.

ووجه رسالة لزوجته: “تهتم بابننا وتربيه تربية صحيحة، تربية على الإسلام الصحيح، ماتخلهوش ينضم لأي تنظيمات ولا أي مؤسسات ولا أي فكر غير صحيح، وماتنضمش لأي حاجة ولا تخليه ينضم لأي تنظيمات ولا أي مؤسسات، وتعرفه أن الإسلام كفاية يعني، ولو شفت ابني هقوله خلي بالك من نفسك يعني، نفسك غالية فما تضيعهاش في الفاضي، ما تضيعهاش في حاجة ما تستاهلش، كل الدنيا ما تستاهلش إن أنت تضيع نفسك عليها، لا حكم ولا سلطة ولا حرب بين كرسي ولا أي حاجة، مافيش حاجة تستاهل إن أنت تضيع نفسك عليها، وحافظ على نفسك وحافظ على أمك وراعي ربنا في حياتك كلها، ما تعملش حاجة حرام”.

وقال: "الوقفة قدام ربنا صعبة، ما حدش فينا يستحمل الوقفة قدام ربنا، ولازم تكون مستعد للوقفة دي أو لليوم ده، يعني أنا بدعي ربنا يسامحني والله، وبطلب من كل اللي بيحبوني إنهم يدعوا لي إن ربنا يسامحني على أي حاجة غلط أنا عملتها في حياتي، على أي دم حرام أنا شاركت فيه ولا دعيت له ولا حتى دربت حد عليه".

وأنهي حديثه: “مفيش حد بيبقى جاهز يقابل ربنا وهو بيعمل ذنوب ولا وهو حتى مشارك في دم أي حد، والدم دي كبيرة جداً عند ربنا، ودم أي حد أنا شاركت فيه سواء بعلم أو بدون علم أو بقصد أو بدون قصد فأنا ما أتحملش أقف قدام ربنا بيه، ما أقدرش، ما أقدرش أقف قدام ربنا بيه عشان خايف من حساب ربنا طبعا”.

اقرأ أيضا:

اعترافات "صندوق حسم الأسود".. علي عبدالونيس يكشف مخطط استهداف الطائرة الرئاسية

"الداخلية" تُحبط مخططًا إرهابيًا وتلقي القبض على قيادات بحركة “حسم”