شاهد عيان يكشف تفاصيل حريق مصنع الزيتون: الحريق نشب قبل مغادرة العمال بدقائق

كشف شاهد عيان تفاصيل جديدة بشأن حادث اندلاع حريق في مصنع ملابس بمنطقة الزيتون في القاهرة.

توقيت قاتل

وقال شاهد عيان لـ"تليجراف مصر": "الحريق نشب، قبل الساعة الخامسة، وكان من سوء الحظ إن العمال كان فاضل لهم 10 دقائق ويغادروا المصنع، هم دول اللي صعبانين عليّ، هم بييجوا مع بعضهم الساعة 9 الصبح.. ناس غلابة".

وتابع: “المكان دا فاتح بقاله حوالي خمس سنين، وهو مصنع بهذا الشكل، أنا بشوف عربية كبيرة بتنقل منه قماش، المكان ده بيخش فيه حوالي أربع خمس عربيات بتدخل تفضي حمولتها وتطلع تاني”.

مصنع في جراج ومداخل مغلقة

وأضاف الشاهد: "المكان مليان مشاكل ولسه المفروض يتراجع كله، لأن صاحب المصنع استغل الجراج كمصنع رغم إنه المفروض للسيارات، الراجل كان قفل المكان على نفسه والعمال جوه شغالين في الأول، اللي كانوا في الجزء الأمامي من الجراج قدروا يطلعوا سالمين، لكن اللي في الجزء الخلفي النار كبست عليهم وماقدروش يطلعوا بالطريق العادي، فاضطروا رجال الإنقاذ يكسروا باب المدرسة اللي ورا عشان يدخلوا ويخرجوا العمال".

ساعات من الرعب ومحاولات الإنقاذ

وتابع: “الحريق كبير واستمر لحد الساعة 2 بالليل تقريبًا، وجميع الخدمات مفصولة عن العقار دا حتى اللحظة مياه وكهرباء وغاز، ولسة منتظرين تقرير اللجنة الهندسية، والسبب بنسبة 90% ماس كهربائي، لكن لسة برضو فيه تحقيقات، إحنا مرة واحدة لقينا الدخان طالع والمكان دا لا يقل عن 1500 متر جراج كبير”.

ضحايا تحت الركام وأغلبهم صغار

واستكمل: “المكان اشتراه على إنه جراج لكن استغله كمصنع، الناس هنا بتشتغل من 9 لـ5 وأغلبهم فتيات وصبيان صغيرين، حالات الوفاة 8 حالات و15 مصاب، الحريق اندلع قبل ما يروحوا بـ10 دقائق ربنا يرحمهم ويصبر أهاليهم، وبالنسبة للخسائر المادية السقف بتاعه في الدور الأرضي وقع، وفي شقة في الدور الإداري تأثرت شوية ودي ملك صاحب العقار”.

تدخل صعب وجهود شاقة للحماية المدنية

واختتم الشاهد روايته: “الحماية المدنية جم وبذلوا مجهود كبير بس الدخلة بتاعته كانت صعبة، لأنه شاغل الواجهة بس والباقي كله جوا، فاضطروا يهدوا من المدرسة عشان يدخلوا لأن الممرات ضيقة فعلاً، والنيران فضلت مشتعلة حوالي 3 أو 4 ساعات وبعدين عمليات تبريد لأن الحاجات اللي فيها نسيج وكمبيوتر ممكن تولع تاني، ولو عنده إطفاء بودرة في السقف كانت الخسائر قلت، والحي والمحليات لازم يشوفوا إزاي مصنع تحت عمارة سكنية، وبيقولوا إن صاحب المصنع اتقبض عليه”.

تحقيقات مستمرة وانتظار تقرير هندسي

ولا تزال الجهات المختصة تواصل تحقيقاتها للوقوف على ملابسات الحريق وأسبابه النهائية، في انتظار تقرير فني من كلية الهندسة لتحديد مدى تأثر العقار وسلامته الإنشائية.

اقرأ أيضًا:

التحريات: مصنع الزيتون المحترق صادر ضده قرار إغلاق منذ 8 سنوات (خاص)

مصدر أمني يكشف سبب اندلاع حريق مصنع الزيتون.. ماذا حدث بالمخزن؟ (خاص)