خلاف على 27 فدانا ينتهي بعاهة.. اعترافات ضحية التعدي بخرطوش في الواحات

شهدت منطقة الواحات التابعة لمحافظة الجيزة واقعة مأساوية وبشعة، عقب انتهاء خلاف على 27 فدانا بعاهة مستديمة لشاب والتعدي على 2 آخرين.

اعترافات ضحية التعدي بخرطوش في الواحات

وحصلت "تليجراف مصر" على اعترافات الضحية في جهات التحقيق بالقضية التي حملت رقم 2146 جنح الواحات، وجاءت كالتالي:- 

اللي حصل إن أختي اللي اسمها هويدة أمين وعندها قطعة أرض في قرية الحارة بالخضاروة في الواحات البحرية، مساحتها 27 فدانا وتلت، ومن سنة 2018 وإحنا كنا ماشيين في إجراءات التقنين والملكية، وبالفعل معانا عقد بيع ابتدائي صادر من محافظة الجيزة، ومعانا رخصة تقنين على الأرض.

وأكمل: في سنة 2022 بعنا 6 ونص فدان لشخص اسمه ياسر .أ، وهو من وقت ما بعناله قطعة الأرض اللي جنبنا وهو طمعان ياخد مننا باقي الأرض، وعمل معانا مشاكل كثير وعمل فينا محاضر كتير بسرقة المزروعات من أرضه، وكنا بناخد فيها براءات، وهو كان هدفه الوحيد من كل ده أنه يخرجنا من أرضنا ويستولي على باقي الأرض كلها وتبقى بتاعته.

تفاصيل التحقيقات

وأضاف: "من كام يوم في لجنة من وزارة الزراعة والمديرية كلمونا وقالولنا إننا هننزل تعمل معاينة على الأرض بتاعة أختي عشان يستصدر ولنا كارت الفلاح والكارت ده اللي بنقدر نصرف بيه سماد بعد كده بموجب عدد المزروعات اللي موجودة في الأرض، وبالفعل امبارح 18 سبتمبر 2026 حوالي الساعة 9 ونص الصبح روحنا أنا وأختي ومعانا العامل في الأرض اللي اسمه علاء عبد الحافظ عبد العزيز، واتوجهنا للأرض بتاعة أختي وهناك قابلنا اللجنة اللي جاية تعاين الأرض.

وقال: بعد ما اللجنة خلصت معاينة الأرض، وعدت كل المرزوعات اللي موجودة في الأرض بتاعتنا وكانت الساعة بقت حوالي 11 الصبح، ركبوا العربية اللي كانوا جايين بيها، وأنا وأختي وعلاء ركبنا العربية بتاعة أختي، وكنا لسه هنتحرك ونمشي فوجئنا بالمتهم ياسر، قابلنا على الطريق ووقف العربية اللي كنت سايقها وراح شاتمني وشاتم أختي روحت أنا نازل من العربية عشان أصوره لأني لاحظت أنه ماسك حاجة ورا ضهره، بس كنت متوقع إنها تكون سكينة أو أي سلاح أبيض، وأول ما نزلت بالموبايل ولسه هصور لقيته جاب من ورا ضهره بندقية خرطوش.

وأشار إلى: المتهم ضارب في وشي روحت أنا قعدت أجري عشان استخبى من السلاح، وأختي وعلاء نزلوا من العربية هما كمان وأختي كانت بتصوت عشان حد يلحقنا وياسر كان عمال يجري ورايا وأنا عمال أقوله خلاص خلاص متضربنيش يقوم معمر سلاحه تاني وضاربني وساعتها ضرب عليا حوالي 5 أو 6 طلقات جت في وشي وبطني، وحاول يضرب على أختي كمان بس هي كانت بتجري وهو معرفش ينشن عليها.

وأكمل: وروحت أنا واقف من بعيد وقعدت أجري عشان أوصل للعربية وخدت أختي معايا ولما ركبنا العربية وكنا عايزين نهرب منه بسرعة، راح معمر سلاحه تاني عليا وراح ضاربني في جنب وشي الشمال جت في عيني الشمال وودني الشمال ودراعي وكتفي الشمال وفي شوية بلي خرطوش فلتوا وجم في الباب بتاع العربية من ناحية اليمين.

وقال: ساعتها أنا كنت غرقان في دمي بس دوست بنزين وجريت بالعربية وفضلت أمشي بالعربية لحد ما أغم عليا وأنا سايق ودخلت في شجرة بالعربية، وفوقت بعدها لقيت ناس حوالينا اختي كانت استنجدت بيهم وجم خادونا وطلعوا بينا على المستشفى اللي في قرية الباويطي وهناك في المستشفى كان في نقطة شرطة جم علينا وحكينالهم اللي حصل، وعملوا المحضر وقالولنا لنا أخف أجي بكرة على النيابة وجيت النهارده أنا وأختي على النيابة وده كل اللي حصل.

اقرأ أيضا:

عاهة مستديمة بالعين، مشاجرة شباب تنتهي بكارثة في عزبة النخل

فيديو كشف "المشرط"، طالب يسبب عاهة لزميله في مدرسة إعدادية بأسيوط