فيديو منذ 6 سنوات ..ماذا قالت سيدة الإسكندرية لـ " لميس الحديدي " ؟

نشرت الإعلامية لميس الحديدي ، فيديو لحوار أجرته مع سيدة الإسكندرية ، روت في الفيديو عام 2020 ، بعض التفاصيل عن معاناتها التي انتهت بها فجر اليوم إلى هذه النهاية الصادمة، بعد أن حاربت سنوات لتظل جوار طفلتيها رغم الظروف القاسية التي واجهتها، والضغوط النفسية والاجتماعية التي لم تفارقها على مدار سنوات طويلة.

حوار سيدة الإسكندرية مع لميس الحديدي

وظهرت سيدة الإسكندرية قبل 6 سنوات مع الإعلامية لميس الحديدي في برنامج "القاهرة الآن" على قناة العربية الحدث عندما كانت تقدم الحديدي برنامجها، ودارت الحلقة حول العنف ضد النساء، وكانت السيدة الراحلة كضحية للعنف مع أخريات.

خلال هذه الحلقة، كشفت عن تفاصيل حياتها المؤلمة، وعن التحديات اليومية التي واجهتها مع زوجها وأسرته، مجسدة قصة تنذر بضرورة حل مشكلات الكثيرمن النساء اللواتي يعانين بصمت خلف أبواب مغلقة.

وقالت سيدة الاسكندرية خلال لقاءها مع الإعلامية لميس الحديدي:

"أنا زي معظم البنات بيجي لها عريس فوالدتي كانت عايزة تطمن عليا الموضوع كان صالونات أنا مكنتش أعرفه، ظاهرياً إنه حد ثقافياً واجتماعياً وعلمياً كويس، واتخطبت أربع شهور وحسيت إني أنا مش مرتاحة فكان في بعض الإقناع من والدتي إن هي عايزة تطمن عليا، خصوصاً إن أنا والدي متوفى.

"وقد كان.. من تالت شهر زواج أنا لقيت شخص تاني خالص، ولقيت بقى الموضوع مش تغير منه بس، لا دي تدخلات من أهله فظيعة، يعني أنا كنت ممكن أصحى الساعة 9 الصبح ألاقي مامته قدامي في أوضة نومي بتشمني بتتكلم معايا وهي في أوضة نومي ألاقيهم بيخبطوا عليا 9 الصبح ألاقي تدخل في أدق تفاصيل حياتي، هو من تالت شهر جواز سافر بره مصر".

“والده كان بيتدخل في أدق التفاصيل، طب أنا مش حابة كده، يعني أنا حابة يكون ليا مساحتي، فأتكلم برضه كل حاجة بالزعيق كل حاجة لقيت إن أنا بعد كده بولد، يعني كنت حامل وبخلف لوحدي، هو مش بيجي مش بيحضر مش عايز يبقى موجود كل حاجة بابا وماما، بابا وماما، لدرجة إن أنا كان عندي مشكلة وإجهاض، أهله كان ممكن يتخانقوا معايا إن ماتكلميهوش ماتعرفيهوش ماتقوليلهوش، سيبيه في حاله، سيبيه هو بره ماتدخليهوش في حاجة”.

“هو دوره إن بيبعتلك فلوسك شهرياً وبس، ففضلت كده، طيب خدني معاك نسافر، فسافرت وكنت معاه ومافيش مشكلة، أنا تزوجت وأنا في تالتة كلية حقوق جامعة إسكندرية.. كل سنة بيأجل، يعني أنا سافرت معاك وكل سنة لأ يروح هو يأجل يقولي عشان البيت، أنتي جيبتي بنت، أنا بعد 11 شهر لقيتني حامل في البنت التانية، البنت التانية طيب أنا فين؟ طب كليتي أنا عايزة أكمل، لأ أجلي البيت، طبعاً أنا كنت شايلة مسؤولية كل حاجة”.

“العنف كان لما أنا سافرت لقيته اتغير أكتر فبقى في عنف معايا، مش هتطلعي من البيت مش هتروحي في حتة أنتي مالكيش حد هنا، أحاول إني أنا أروح للسفارة ماعرفش، السفارة المصرية ماعرفش، البنات واحدة اتضربت وهي عندها 6 شهور، واحدة اتضربت وهي عندها 9 شهور، يعني طول الوقت زعيق طول الوقت”.

“كانت تالين 6 شهور واتضربت يعني ضربة على صدرها كانت هتموت، إيلان كانت 9 شهور وكانت واقفة ساندة كده على الكنبة وإحنا احتدينا في النقاش.. برجله كده وقعها، معايا أنا اترفع عليا سكينة قبل كده، أتكلم شوية يخبط دماغه في الحيط، أتكلم شوية يكسر حاجات في البيت، أتكلم شوية طبعاً إحنا عايشين في توتر وفي غربة مش يعني، وكنت ساكتة، وكنت كل ما أقول لأهلي يقولولي استحملي وكملي عشان ماينفعش طلاق عشان الولاد”.

“قالي أنا هنزلك ومكنتش عايزة أنزل، كنت معاه ومأجلة كليتي وسايبة شغلي وسايبة أهلي وأنا معاه لحد ما تقف على رجلك لحد وتبقى كويس، لحد ما وصل بقى دكتور مهندس.. وأنا بنزل نفسياً وجسدياً بتتدمر وهو بيعلى”.

“لما رجعت مصر تحول العنف عليا منه لوالده، بقى بييجي كل يومين تلاتة مافيش أي احترام لحرمة المنزل، في أي وقت ألاقيه بيخبط عليا 9 الصبح 8 الصبح 10 الصبح، لما أعترض أنكل يعني كنت اديني تليفون لأ أنا أدخل في أي وقت، لو اتكلمت ألاقي زعيق ألاقي كلام لفظي مش حلو، الممكن يطلع الصوت للجيران على السلم”.

"أنا مش عارفة أتعامل مع الجو ده مره قولت كل واحد يكون في حاله، كنت في أوضتي اتأخرت في إني أنا ألبس وأطلع يعني وقلت أنا مش عايزة أطلع، لأ هتطلعي فوالده سمعني وأنا بقول لأ مش هطلع، فدخل اتعدى عليا والموضوع كبر وصل على السلم والجيران سمعت وأنا واقفة بقوله كفاية يعني لو سمحت كفاية لو سمحت الصوت أنا بقالي أربع خمس سنين ساكنة في العمارة دي محدش يسمع عني حاجة محدش يعرف عني حاجة أرجوك كفاية، مكنتش أول مرة طبعاً، كتير جداً كان ييجي شتيمة وزعيق وألفاظ وتحرش لفظي وكلام ماينفعش يتقال".

“وقال ابني هو مصدر للصرف وبس، عايزة تتكلمي تخرجي تتفسحي تدلعي تفضفضي عندك مشكلة أنا موجود، طب هو إيه دوره طب أنا اتجوزته ليه؟ اتجوزتي أنتي بيتصرف عليكي وبس، بتجيلك فلوسك وتقعدي تربي بناتك وبس، وأنا موجود أنا اللي في إيدي كل حاجة، في إيد بابا وفي إيد ماما”.

“أنا قلتله إن نطلق مش عاوزة منك حاجة، حتى الشقة أنا مش عايزاه لأني مقدرة قد إيه شاب في مقتبل حياته بيبقى جايب شقة وتعبان فيها فأنا مش عايزاها، خدها وأنا عايزة شقة صغيرة ليا أربي فيها بناتي، لأ قلتله خلينا لو فشلنا كأزواج بلاش نفشل كآباء خلينا علاقتنا مع بعض كويسة عشان خاطر البنات، قالي لأ أنا طلاقي مش الطلاق المودرن بتاعك أنا طلاقي طلاق المحاكم هدخلك المحكمة”.

عادةً إن الراجل هو اللي بيخاف يدخل المحكمة مش هو اللي بيدخل الست المحكمة فقلتله ليه أنا مش عاوزة أعمل كده يعني بلاش خلينا أصدقاء خلينا لعل الله يحدث بعد ذلك أمراً يعني خلينا محترمين، لأ هتخشي المحكمة ولقيت إن بدأ يقول لكل الناس أنا مطلقها".

"وساب البيت وساب الدنيا ومشي قطع المصاريف قطع كل حاجة وأنا مطلقها، فخدت ولادي رايحة لجدهم بقوله يا أنكل يعني نتكلم مع بعض قاللي أنتي عملتي اللي أنا مستنيه جيبتي الولاد هاتي دول أنتي بره، طب فين صاحب الشأن؟ ماعرفش، طب في أنهي بلد؟ ماعرفش، طب أكلمه طيب بناته عايزاه.

“أنا صممت إن أنا آخدهم معايا وأنا نازلة، طب نتكلم طب نتفاهم طب المصاريف طب هو فين.. كان الرد ابني مطلقك، طب فين القسيمة؟ مافيش قسيمة، طيب خلاص أنا هاخد بناتي لأ، طيب يطلع من البلكونة يا فلان ويا فلان ويا فلان حراس العقارات اللي حواليهم اطلعوا، اتكتفت بقى واتضربت منه من جد الأولاد قدام الأولاد يعني أنا بنتي أربع سنين لحد دلوقتي تقولك جدو ضرب مامي”.

“ولحد دلوقتي أنا هو مسافر مش راضي يتواصل مع بناته ممكن مش راضي يصرف عليهم مش راضي يطلقني فبيقول أنا مطلقها بس مش راضي يديني قسيمة، باباه طبعاً كان مبهدل فيا على طول واتقالتلي أنتي والدك متوفي أنتي مالكيش حد فيا ترجعي معانا إحنا كده تحت طوعنا يا إما هنفضل ممرمطينك كده في المحاكم، فرفعت خلع”.

المجلس الأعلى للإعلام يحظر نشر أي مقاطع مصورة تتعلق بالواقعة

وقرر المجلس الأعلى لتنظيم الإعلام، برئاسة المهندس خالد عبدالعزيز، إلزام جميع الوسائل الإعلامية الخاضعة لأحكام القانون رقم 180 لسنة 2018، بعدم نشر أي مقاطع مصورة تتعلق بواقعة إلقاء سيدة لنفسها من الطابق الثالث عشر بمدينة الإسكندرية.

حظر نشر اسم المتوفاة
كما شدد المجلس على حظر نشر أي أخبار تتضمن التصريح باسم المتوفاة، احترامًا لحرمة الوفاة، وتطبيقًا للأكواد المهنية الصادرة عنه، وعلى رأسها كود التغطية الإعلامية لحوادث الانتحار، الصادر بقرار المجلس رقم 62 لسنة 2021.

وقرر المجلس مخاطبة الجهاز القومي لتنظيم الاتصالات لاتخاذ الإجراءات اللازمة لحذف هذه المقاطع من جميع منصات التواصل الاجتماعي أينما تم نشرها بالمخالفة لهذا القرار، مع تكليف الإدارة العامة للرصد بمتابعة التنفيذ.

تحذير تليجراف مصر

وتحذر "تليجراف مصر" من الانتحار، مناشدة من تراودهم مثل هذه الأفكار التوجه إلى طبيب نفسي في محاولة لحل مشكلاتهم، وما قد يتعرضون له والتفكير بإيجابية حول استمرارية الحياة التي منحها الله للإنسان، فلابد من الذهاب إلى الطبيب المختص، وعرض أنفسهم على المعنيين لحل المشكلة، وعدم التطرق للأفكار الانتحارية التي تراودهم والذهاب إلى الطبيب المختص، وعرض أنفسهم على المعنيين لحل المشكلة.

وتعمل الدولة على تقديم الدعم للمرضى النفسيين؛ من خلال أكثر من جهة خط ساخن، لمساعدة من لديهم مشاكل نفسية، أو رغبة في الانتحار، أبرزها الخط الساخن للأمانة العامة للصحة النفسية، بوزارة الصحة والسكان، لتلقي الاستفسارات النفسية والدعم النفسي، ومساندة الراغبين في الانتحار، من خلال رقم 08008880700، 0220816831، طوال اليوم.

اقرأ أيضًا:

"مش طليقها السبب الوحيد".. مفاجأة جديدة في رحيل البلوجر بسنت سليمان