كفاح 11 سنة.. "تايسون" بطل أفريقيا بالمصارعة الروماني: نفسي أدخل بطولة العالم

البطل زياد واسرته

محمد طارق مندور

A . .A

من قلب دلتا مصر وبالتحديد مدينة المنصورة، تظهر موهبة شابة لترفع اسم مصر عاليا فى بطولة أفريقيا، إذ حصد الشاب "زياد أحمد فتحي" والشهير بـ "تايسون" المركز الأول في رياضة المصارعة الرومانية ببطولة أفريقيا.

رحله كفاح منذ 11 عاما

وفى تصريحات لـ " تليجراف مصر"، عبر تايسون عن مدى فخرة وسعادته بحصوله على المركز الأول، مضيفا أن هذه اللعبة هي هوايته المفضلة منذ الصغر، حيث يلعبها منذ أكثر من 11 عاما، وهذا اليوم هو حصاد لتلك المدة الكبيرة، التي بذل فيها جهدا كبيرا من التمرين ومواجهة الظروف القاسية التي كانت سببا في تحقيق ذهبية أفريقيا.

4 أشهر معسكر تدريب والنتيجة الذهبية

وأضاف تايسون: "البطولة مجتش بالساهل، بالعكس دى كانت نتيجة تعب شهور من التمرين والحمد لله ربنا وفقنى وقدرت أخلص الماتش بدري علشان الدهب يكون من نصيبى، وأنا كنت متوقع إنى هاخد مركز أول علشان كنت مجهز للبطولة دى كويس أوى، يعنى أنا بقالى 4 أشهر فى معسكرات خارجية، وكل الكباتن كانوا بيدعموني وبيشجعوني قبل البطولة".

حلمه بطولة العالم

ووجه الشكر لوالدته لوقوفها معه في هذه البطولة ودعمها المتواصل له، مضيفا: "أنا نفسي أدخل بطولة العالم وأحقق فيها مركز أول، أنا الفترة الجاية هبدأ اشتغل على كدا وأجهز نفسيا وبدنيا للبطولة، علشان أكون مستعد لما أدخلها وأقدر أجيب الذهبية فيها زي ما جيبتها في أريقيا".

الأم هى الداعم الاول

وأضافت والدة زياد: “اللى حققه ابنى دا فخر، خصوصا إن بطولة افريقيا دي مش سهلة خالص والحمد لله إنه وصلها وقدر يحقق فيها مركز أول، أنا كنت معاه خطوة بخطوة حتى لما سافر للبطولة أنا مسيبتوش، وكنت دايما بشجعه، وهو كان واثق وبيقولى قبل البطولة أنا هاخد الذهبية علشان البسهالك إنتي، ولما فاز جه جري عليا ولبسنى الميدالية، أنا أول ما هو فاز فضلت ازغرط وأنادي عليه، الفرحة كانت مش طبيعية والحمد لله على اللي زياد وصله”.