محمد أبو الغار يكشف دور الأزهر والكنيسة في إزالة الهواجس بشأن أطفال الأنابيب

واجه رائد أطفال الأنابيب في الشرق الأوسط، العالم محمد أبو الغار، مع بداية انتشار مراكز أطفال الأنابيب، العديد من الأسئلة التي كانت تتردد على أذهان الآباء، وعلى رأسها مشروعية الحمل خارج الرحم.

أطفال الأنابيب حلال ولا حرام؟

وأوضح أبو الغار خلال لقائه الإعلامية منى الشاذلي، في برنامج" معكم منى الشاذلي" المذاع عبر قناة “أون”: “ حلال ولا حرام ده السؤال اللي جه في دماغ كل الناس مش عشان الخلط بس لا الفكرة نفسها أن أنت بتعمل حاجة يمكن تكون مخالفة لربنا ومخالفة للقواعد الإلاهية”. 

وأضاف: “المشكلة دي اتحلت الصراحة بفتوى الأزهر والدكتور فتحي إسكندر صديقي جاب حاجة مشابهة من الكنيسة أنهم بيسمحوا بأطفال الأنابيب، والفتاوتين وضعوا في براويز واتعلقوا في مدخل المركز”.

الخجل من أطفال الأنابيب

ولفت أبو الغار إلى أن من المشاكل الأخرى التي واجهت المركز في بدايته، كانت خجل النساء من تأخرها في الحمل، ومن الخضوع لإجراءات أطفال الأنابيب قائلًا: “الست بتكون مكسوفة من تأخرها في الحمل، بيتهيألها أن في حاجة غلط وكونها رايحة تعمل أطفال أنابيب بيكون صعب خالص عليها، لدرجة كانوا بييجوا مستخبيين زمان لكن دلوقتي بقى عادي”.

وأضاف: “إحنا في البدايات كما بنتصل ونتكلم عشان الإحصاءات بتاعت المركز ، وعشان نتأكد أن الطفل والأم في حالة صحية سلمية فكان لازم نكلم الناس، عبر قسم مخصوص للمتابعة”.

وقالت استشاري العقم وأطفال الأنابيب، منى أبو الغار، إن السيدات قديمًا كن حريصات على عدم كشف سبب حملهن.

وأضافت: “ كانت الست تحمل ومتقولش حملت إزاي ولو المركز كلمها في البيت لأي سبب ممكن ميردوش ممكن يغيروا رقم التليفون لأنهم مش عايزين أي تواصل”.

توائم أطفال الأنابيب

وأجابت منى أبو الغار على شيوع إنجاب الأطفال التوأم عبر الأنابيب، قائلة: “مش المفروض يكون ده العموم أن الناس تجيب توأم من أطفال الأنابيب، كان في الأول الناس بترجح أعداد كبيرة عشان تزود نسب النجاح، لكن لما التقنية نسب النجاح بتاعتها بقت ممتازة بقينا بنقلل عدد الأجنة، لأن الفكرة بالنسبة لنا إحنا كدكاترة مش فكرة صح أوي لأن مشاكل الحمل في التوأم كتير”.

اقرأ أيضًا:

بدأ بـ 3 أطباء.. تفاصيل إنشاء أول مركز لأطفال الأنابيب في مصر