لقاء الخميسي: مفيش فروق بين الأديان

حسمت الفنانة لقاء الخميسي الجدل حول ديانتها مؤكدة أنها مسلمة، وأباها مسلم، ولكن والدتها مسيحية.

وقالت الخميسي، عبر برنامج "أسرار"، مع الإعلامية أميرة بدر، على قناة النهار: معنى كلمة مسلمة أني أسلمت قلبي لله، “كل واحد جواه ربنا، شايف ربنا إزاي، ومعتنق ديانة إيه دي تخص كل واحد متخصش حد تاني، وأنا شايفة أن كل الأديان بتعرف ربنا، ووالدتي مسيحية، وعمرها ما دخلتنا في القصة دي”.

وتابعت الخميسي: أمي كانت بتصوم معنا شهر رمضان، وتصحينا نصلي الفجر، هي بتصلي لربنا بطريقتها ورحت معاها مرات كتير جدًا الكنسية وصليت، وهي نفس الصلاة لكن الطقس مختلف، والمسلم زي المسيحي زي اليهودي، والناس مش شايفة كده وكل واحد عنده أفكاره، أنا قرأت في التاريخ والدين كتير جدًا.

وأضافت: مفيش فروق بين الأديان هو نفس الكلام، إحنا محتاجين نعرف ربنا، إحنا جزء من ربنا، مش بيقولك ونفخنا فيه من روحنا؟ الطبيعي نطلع مسلمين يعني أسلمنا قلبنا بـ الإله، يبقى كلنا زي بعض.

لقاء الخميسي عن انتقادات مشهد الرقص في مسلسل الزوجة الرابعة: هو الرقص برا رمضان حلال وفي رمضان حرام؟

وعلى الصعيد الاخر تحدثت لقاء الخميسي على مشهد الرقص الذي أثار الجدل في مسلسل الزوجة الرابعة، مع مصطفى شعبان.

واشادت لقاء الخميسي بدورها في مسلسل الزوجة الرابعة قائلة "كنت خطيرة وكنت مستغربة نفسي، ومصطفى شعبان كان حابب جدًا الشخصية وأستاذ مجدي الهواري رسم الشخصية، وكل واحدة فينا كنا أنواع فاكهة، ومكنش في غيرة بين البطلات، وعلا غانم أعرفها من أيام المعهد هي شخصيتها قوية وعايزة تبقى المسيطرة، ولكن أنا كنت بسيب ليها مساحتها وإحنا كنا كابل خطير وهي مشعة وعندها كاريزما وهي فعلًا شاطرة، وفرقت معايا وعملنا شغل جامد".

وعن انتقادات مشهد الرقص في مسلسل الزوجة الرابعة، علقت لقاء الخميسي: المخرج كان عايز كده، وده شغل، هو الرقص برا رمضان حلال، وجوا رمضان حرام، وطبعًا اتشمت على المشهد بتاع الرقص في الزوجة الرابعة، ولما أنا بتشتم زوجي بيزعل، وده شغلي واللوكيشن مليان ناس وأنا أصلًا مبعرفش أرقص شرقي.

وأكدت لقاء الخميسي، أن نجلها لا يشاهد أعملها، قائلة: ابني مبيتفرجش عليا خالص ومحدش بيتفرج عليا، مبيتفرجوش على عربي أصلًا مع نفسهم في عالم موازي.

برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.

برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.