"أنا سترك وغطاكي".. اعترافات نجار أنهى حياة زوجته بسبب رسالة واتساب (خاص)

قضت محكمة جنايات الجيزة الدائرة 32 بإجماع الآراء بإحالة أوراق متهم بقتل زوجته إلى فضيلة مفتي الديار المصرية لأخذ الرأي الشرعي لإعدامه، بعد إنهاء حياة زوجته داخل منزلهما بمنطقة الطريق الأبيض في الجيزة.

نص التحقيقات مع المتهم

وحصلت "تليجراف مصر"، على نص التحقيقات في الواقعة، وجاءت أقوال المتهم كالتالي:

س: ما تفصيلات إقرارك؟

ج: “اللي حصل إنى متجوز سميرة بقالي 13 سنة وحياتنا كانت بسيطة وهادية مفيش فيها أي مشاكل ومن حوالي 6 شهور جاتلي صورة من رقم غريب على الواتساب لبنت بملابس غير لائقة من ظهرها ووشها وملامحها مش باينة بس أنا شكيت ساعتها إنها مراتي.. والصورة ديه مش في بيتي وبصراحة شكيت في سلوك مراتي وحاولت ساعتها أكلم الرقم اللي بعتلي الصورة ديه بس لقيته مقفول وواجهت مراتب ساعتها بالصورة وهي قالتلي إنها متعرفش عنها حاجة وده أصلاً مش أنا واتخانقنا ساعتها جامد وضربتها وعورتها وهي غضبت وراحت قعدت عند أبوها فترة كبيرة وعرفت ساعتها إنها عملتلي محضر بسبب إني ضربتها وعورتها”.

س: وماذا حدث بعد ذلك؟

ج: “من حوالي شهر أخدت أبويا وأخويا وروحت عند حمايا علشان أراضي مراتي وأرجعها البيت هي وبناتي، بسبب إنها كانت غضبانة وقاعدة عند أبوها بقالها كذا شهر هي والبنات، ولما روحنا علشان أرجعها البيت لقيتهم بيقولولي إني مش بصرف عليها هي وبناتي ومش بجبلهم فاكهة في البيت ولا أكل، وقالولي برضوا أنت مسجلتش بنتك”كيان" ليه لغاية دلوقتي، وساعتها اتكلموا معايا كمان على إني بشرب مخدرات واتفقت معاهم إني هبطلها في أقرب فرصة، وفعلا اتراضينا وأخدت مراتي وبناتي ورجعت على بيتي".

س: ماذا حدث يوم الواقعة؟

ج: "بعد ما رجعنا بيومين موضوع الصورة اللي جاتلي ده مش راضي يطلع من دماغي وعلى طول مخليني شاكك في تصرفاتها وسلوكها، فروحت مدخل بناتي في أوضة الأطفال وقفلت عليهم ودخلت الأوضة الثانية أنا وهي واتكلمت معاها وقولتلها اللي بيحصل ده مش هينفع ولازم تحكيلي إيه اللي حصل معاكي عشان أبقى في ضهرك وسترك وغطاكي وأنا مسامحك، وهي ساعتها قالتلي هحكيلك كل حاجه بس تبقى حنين معايا.

س: وكيف تطورت المشاجرة؟

ج: “بعدها بقولها احكيلي بقى إيه اللي حصل فلقيتها بتقولي مفيش حاجه حصلت وكدبت عليا تاني وأنا ساعتها محستش بنفسي غير وأنا عمال أضرب فيها بإيديا وبسلك كهرباء مقطوع في جسمها كله وهي عماله تصوت وتقولي حرام عليك، وبعدها مسكت خشبة كانت موجوده جنب السرير وضربتها ضربة جامدة في نص رأسها راحت دماغها اتفتحت جامد”.

س: ماذا فعلت بعد ذلك؟

ج: “سيبتها وقفلت عليها أوضة النوم، وبعدها دخلت لقيتها بتنزف دم جامد، وبالليل لقيتها قاطعة النفس ومش بتتكلم ولا بتتحرك، فخفت وجبت معطر وفضلت أرش في الشقة علشان الريحة كانت قوية، وبعدها أخدت هدومي وهربت من البيت وروحت عند صاحبي في فيصل وقولتله إن مراتي تقريبًا ماتت مني وأنا بضربها، وبعدها الحكومة قبضت عليا”.

س: متی و أین دارت أحداث تلك الواقعة؟

ج: الخناقة حصلت بيني وبين مراتي يوم الأربعاء الموافق 2025 م تقريباً الساعة 11:00 صباحاً في بيتي بمنطقة الطريق الأبيض بالجيزة.

س: حدد لنا طبيعة نشأتك البيئية والمعيشية؟

ج: أنا عايش في نفس العمارة مع أبويا وأمي بس أنا في شقة منفصلة.

س: ما وصف المسكن محل الواقعة؟

ج: هو بيت في الدور الأول مكون من أوضتين وصالة ومطبخ وحمام.

س: حدد لنا مستواك التعليمي ؟

ج: أنا كنت بدرس وخرجت من المدرسة في رابعة ابتدائي.

س: حدد لنا طبيعة عملك؟

ج: أنا بشتغل نجار موبيليا.

اقرأ أيضا:

بسمة بوسيل: اتطلقت من تامر حسني "مرتين"، والغيرة ليست السبب

"أفضل صديق حلمت به".. بسمة بوسيل تثير الجدل رفقة منسق أزياء